„Ферари“ подготвува помоќен луксузен „пуросангве“ - цена: 450.000 евра

„Ферари“ (Ferrari NV) работи на перформанс-верзија на својот модел со четири врати „пуросангве“ (Purosangue), според лица запознаени со плановите на компанијата, со што овој клучен модел ќе добие освежување неколку години по лансирањето.

Новата варијанта ќе биде конципирана за да ја подобри управливоста, но ќе го задржи атмосферскиот мотор V12, велат изворите, кои побараа да останат анонимни бидејќи станува збор за интерни планови. Почетокот на производството се очекува во втората половина од годинава.

Надградената верзија на моделот „пуросангве“ дополнително ќе ја нагласи тркачката ДНК на брендот, а наедно ќе му овозможи на италијанскиот производител на суперавтомобили да освежи еден од своите поважни модели и да воведе повисоко ценовно ниво, без значително зголемување на производствените единици.

Лиценцирани фотографии/Ferrari

Генерално, „Ферари“ во 2025 година произведе речиси 14.000 автомобили, задржувајќи го ограничувањето на производството за да ја зачува ексклузивноста на брендот. Компанијата претходно соопшти дека планира производството на моделот „пуросангве“ да го ограничи на околу 20 отсто од вкупното годишно производство, што го забавува темпото на испораки и покрај силната побарувачка.

Во февруари компанијата објави нови цели за 2026 година, кои ги смирија инвеститорите во однос на способноста на производителот на суперавтомобили да ги одржи растот и високите маржи.

„Ферари“ и претходно нудеше перформанс-пакети. Конфигурацијата „асето фиорано“ (Assetto Fiorano), која се користи кај моделите СФ90 (SF90 Stradale) и 296 ГТБ (296 GTB), обично вклучува унапредувања на шасијата, компоненти за намалување на тежината и други модификации што ја подобруваат управливоста, со дополнителна цена од околу 30.000 долари или повеќе.

 Лиценцирани фотографии/Ferrari

„Пуросангве“, првото „ферари“ со четири врати и четири седишта, одигра важна улога во проширувањето на базата на купувачи на компанијата, надвор од традиционалните спортски двоседи.

Со почетна цена од околу 450.000 евра, овој кросовер од претставувањето во септември 2022 година придонесе за побогато портфолио на модели и повисока просечна продажна цена. Побарувачката беше силна, а првите примероци брзо беа распродадени.

Одлуката да се задржи мотор со внатрешно согорување покажува дека „Ферари“ и натаму гледа силна побарувачка за бензински погони со високи перформанси, и покрај тоа што развива хибридна и електрична стратегија. „Пуросангве“ - кој компанијата го нарекува Ferrari utility vehicle - се натпреварува со ценовно подостапни луксузни спортски модели како „ламборгини урус“ (Lamborghini Urus), „астон мартин ДБХ“ (Aston Martin DBX) и „порше кајен“ (Porsche Cayenne).

Внатрешноста на „ферари пуросангве“  Лиценцирани фотографии/Ferrari

Производството би можело да започне веќе следната есен во фабриката на „Ферари“ во Маранело, велат изворите.

Ова лансирање ќе биде дел од пошироката стратегија на „Ферари“ за 2026 година. Главниот извршен директор Бенедето Виња изјави дека компанијата планира меѓу 2026 и 2030 година во просек да нуди по четири нови модели годишно, во сегментите на мотори со внатрешно согорување, хибридни и електрични погони.

Акциите на „Ферари“ минатиот петок во Милано ги намалија претходните загуби и се тргуваа 2,2 отсто пониско. Од почетокот на годината вредноста на акциите падна за 5,4 отсто.
​