Цените на половните рачни часовници од луксузните брендови „Ролекс“ (Rolex), „Патек Филип“ (Patek Philippe) и „Одемар Пиге“ (Audemars Piguet) ќе продолжат да паѓаат, бидејќи понудата останува висока, според аналитичарите на „Морган Стенли“ (Morgan Stanley) и платформата за истражување на пазарот „Воч чартс“ (WatchCharts).
Вкупната понуда на пазарот на половни производи почнува да се намалува, но севкупните нивоа на резерви остануваат покачени, се наведува во извештајот на аналитичарите на „Морган Стенли“, предводени од Едуард Обин и „Воч чартс“.
По растот во 2021 година, цените на најбараните часовници драстично паднаа на секундарниот пазар поради економските грижи и падот на криптовалутите. Вкупниот пазарен индекс на „Воч чартс“, кој ги следи 60-те најтргувани часовници по вредност од топ 10 брендови, падна за околу пет отсто во првата половина на 2023 година.
„Ролекс“ има најмногу модели што на секундарниот пазар се тргуваат над малопродажната цена
Bloomberg
Многу часовници од врвните брендови продолжуваат да се тргуваат далеку над нивните малопродажни цени бидејќи продавниците прибегнуваат кон листи на чекање таму каде што побарувачката ја надминува понудата. Сепак, бројот на часовници што се тргуваат по пониски од малопродажните цени се зголемува, како што растат цените во продавниците и паѓаат цените на секундарниот пазар.
„Ролекс“ има 89 часовници, што претставува 72 отсто од половните модели следени од „Воч чартс“, кои се тргуваат над малопродажното ниво. Има и 43 модели на часовници од „Патек Филип“, или околу 48 отсто од вкупниот број на таа марка, како и 34 модели од „Одемар Пиге“ или околу 71 отсто од неговите часовници. „Вашерон Константин“ (Vacheron Constantin) има 8 модели, околу 19 отсто од неговите часовници, кои и натаму одат премиум над нивните малопродажни цени, покажува извештајот.
.webp){kind=icon}
