Ќе се отвора академија за џентлмени: Мажите ќе се обучуваат да бидат господа

Терминот џентлмен во 21 век има широка примена. Порано џентлмените биле родени благородници, сега се само добро воспитани луѓе. Денес потеклото и парите не го прават мажот господин, туку карактерот и однесувањето.

На Балканот поимот џентлмен сè уште најчесто се користи за да се опише начинот на кој мажот ги третира жените. Џентлменството е сè поприсутна тема и во македонскиот медиумски простор, особено во последниве пет години.

Во 2018 година се одржа првиот саем за мажи кај нас „Џентлменс експо“ (Gentlemen’s Expo),  на кој посетителите преку интерактивни презентации имаа можност да дознаат корисни информации за своите омилени производи.

Истата година на Скопје му се случи и првиот официјален избор за мажи на годината, гала-вечер на која се наградуваат поединци во различни категории. Овој настан доби поддршка од голем број компании и институции, а е комплетно креиран и реализиран од истата агенција што го потпишува и првото телевизиско шоу за џентлмени кај нас, едноставно насловено „Џентлмен магазин“. Проектот има цел да креира позитивна енергија преку промоција на добрите навики на успешните луѓе во Македонија, пишува во официјалната најава за емисијата.

Речиси една деценија на денешниот современ маж му се обраќа и компанијата „Сињори“ (Signori), која создава уникатни машки костуми по мера и која мошне успешно ја гради својата приказна и надвор од границите.

„Џентлмен е маж со манири, но и со совршено скроен костум“, порачува Ненад Пантовиќ, еден од сопствениците.

Signori

Токму тој за „Блумберг Адрија“ првпат открива детали за најновиот предизвик на „Сињори“, инаку македонски бренд што постојано се обидува да понуди нешто различно и иновативно на пазарот.

Клубот на господа станува академија

Пантовиќ и неговиот бизнис-партнер еднаш месечно на различни локации, најчесто поскапи ресторани и барови во Скопје, обединуваат млади и успешни мажи, неретко нивни клиенти со кои разменуваат мислења и бизнис-идеи. На заедничка маса седат одбрани поединци со префинет вкус и стил, хедонисти што уживаат во одлична храна, во квалитетен пијалак и во добра пура.

„Во ’Сињори џентлменс клуб’ се добредојдени оние што го негуваат пред сè бонтонот, луѓе што се џентлмени или сакаат да станат, кои преку дружба и заедничка иницијатива и организација се подготвени и сакаат да помагаат како на поединци, така и на општеството. На нашите настани присуствуваат познати и успешни мажи од бизнисот, политиката, спортот, уметноста, па  има што да се слушне, да се размени мислење и да се научи“, вели Пантовиќ.

Signori

Овој успешен претприемач смета дека сега е вистинско време настанот да го издигнат на едно повисоко ниво и да прерасне во еден поформален концепт - академија за џентлмени.

Првата академија за господа кај нас треба да понуди структурирани работилници, семинари и часови за различни аспекти на префинетост, бонтон, лидерство и личен развој. Планирано е да се обучуваат поединци што отелотворуваат префинетост, вкус и чувство за стил, како што вели Пантовиќ, усогласувајќи се со идеалите на модерниот господин.

Проектот е во завршна фаза, но сè уште е рано да се зборува за начинот на пријавување, како и за евентуалната партиципација на идните студенти.

Џентлменството сепак е скапа играчка

Формалното образование за џентлмени е тренд и во светски рамки. Сè почесто на современите мажи им се нуди менторство и се разменуваат значајни академски, професионални, сервисни и тимски искуства.

Овие обуки истовремено се и скапа играчка. На пример, завршната школа за џентлмени на Лакшри академи (Luxury Academy) во Лондон опфаќа петдневна резиденцијална програма и чини 11 илјади фунти.

Предавањата се одржуваат на луксузен селски имот на 60 милји од Кембриџ. Вклучени се и дополнителни наставни активности, меѓу кои и јавање, обука за лов и гаѓање во глинени гулаби. Студентите имаат на располагање спа, вежбалница и голф-терени, кои им се достапни по часовите. Секој „иден господин“ има посебна спална соба со приватна бања.

Општествени кодекси на облекување, лична презентација и говор на телото, бонтон за јадење и забава, како и локални манири на маса, се само дел од вештините што ги нуди оваа академија. Овде ќе научите како да напишете говор, со која порака да наздравите, како да одберете накит и тоалетна вода, но и како да го препознаете најдоброто вино. Освен групна настава, се нудат и индивидуални часови, а обуката е достапна за мажи над 21 година.

Три бонус совети за совршен џентлменски изглед

Иницијаторите на првата академија за џентлмени кај нас, Ненад Пантовиќ и Крис Поповски, брендот „Сињори“ (Signori) го основаа во 2014 година, со основна дејност дизајнирање и производство на машки костуми по мера.

Signori

Тие сметаат дека клучот за изработка на совршен костум е комуникацијата со клиентите и заедничкото креирање на крајниот производ. „Совршениот крој е повеќе од облека, тоа е начин на живот“ е мотото на компанијата.

Во моментов нема коментари за веста. Биди прв да коментира...

Остави коментар