Климатските промени беа главната причина последниве години одржливоста да стане еден од врвните приоритети во светот. А, бидејќи купувачот е секогаш во право, многу компании почнаа да го следат т.н. модел на тројна крајна линија (triple bottom line), па освен на профитот, одлучија да му се посветат и на своето социјално влијание, како и на влијанието врз животната средина.
Зелените бизнис-идеи не само што почнаа позитивно да влијаат врз животната средина туку го променија и нашиот животен стил. Како потрошувачи сѐ повеќе се обидуваме да егзистираме одговорно и да уживаме совесно во нештата што ги носиме и користиме секојдневно, како што се на пример модата и дизајнот. На оваа тема пред три години интензивно почнала да размислува и Теона Манго.
Поради глобалната пандемија, во 2020 година од Лондон, каде што била на додипломски студии, принудно се вратила во родната земја и тогаш сфатила колку малку луѓето овде се грижат за одржливоста и колку македонскиот пазар е всушност сиромашен кога станува збор за еколошките производи.
„Нешто што најмногу ми бодеше очи беа пластичните ќеси во маркетите. Во тоа време беа бесплатни и не се продаваа торби за пазарења за повеќекратна употреба. Платнените торби што беа достапни не собираа доволно. Така одлучив да го започнам ’Бијонд грин’ (Beyond Green) и прв производ да бидат токму платнените торби за пазарење“, објаснува таа.
Тие се шијат кај нас, додека ленот се увезува од Индија, бидејќи, како што вели, во Македонија нема 100 отсто лен што е со екосертификати. Нејзиниот стартап е во фаза на ребрендирање и веб-страницата не е активна, па торбите во моментов се достапни на концептуалната онлајн-продавница УРМА (URMA), каде што се продаваат за 600 и за 700 денари во зависност од дизајнот.
Првите производи на Beyond Green беа платнени торби за пазарење | Теона Манго/Beyond Green
На оваа платформа можете да набавите и биоразградливи маски за телефони, кои се изработуваат во Канада. Направени се од пченична слама, може слободно да ги компостирате и во рок од пет до осум недели целосно се разградуваат и можат да послужат како ѓубриво за растенија. Во моментов се достапни во четири бои и чинат 950 денари.
Уште еден уникатен производ под етикетата на „Бијонд грин“ се и рачно изработените свеќи од пчелин восок, произведени на падините на планината Плачковица. Дури и саксијата, по целосното догорување на свеќата, може да се искористи за засадување семе од лаванда, кое го има како додаток на свеќата кога ќе ја купите.
„Во изминатите три години понудивме десетици екопроизводи, присутни сме во десетина физички продавници во Македонија, Србија, Норвешка и во Данска, имаме лојална база потрошувачи, кои се навраќаат на секој нов производ што го вадиме и, најважно од сѐ, добиваме голем број позитивни коментари за нашите производи и за целокупниот концепт“, вели Теона.
Теглата можете да ја користите и за да го засадите семето од лаванда што доаѓа како додаток со свеќата | Теона Манго/Beyond Green
Целта на „Бијонд грин“ не е само да продава еколошки производи туку и да едуцира и искрено да промовира производи што се еколошки и одржливи и можат да направат разлика со нивната употреба. Теона е горда што основала бренд што е еколошки и одржлив во сите аспекти, од набавката и производството до маркетингот и продажбата. Таа нагласува дека користат материјали што се етички набавени и кои се биоразградливи, рециклирани или целосно рециклирачки. Секое лице вклучено во сите нивни процеси е соодветно платено и се стреми кон минимален и нула отпад од пакување.
Теона признава дека кога таа оди во шопинг, сѐ уште е далеку од совршена. Сепак, последниве години драстично променила некои навики. Не само што престанала да купува парчиња од брендови за брза мода (fast-fashion) туку престанала и да соработува со нив, но и да ги рекламира на својот инстаграм-профил и на блогот, затоа што добро заработува и како инфлуенсерка и креаторка на содржини.
Таа милува да одбере облека направена од одржливи материјали, а почнала да носи и парчиња што се од втора рака. Теона купува работи за кои е комплетно сигурна дека ќе ги носи и дека ѝ требаат, а не само затоа што се моментално во тренд или на попуст.
Beyond Green нуди и биоразградливи маски за телефони, кои се направени во Канада | Теона Манго/Beyond Green
Родена и израсната во Битола, Манго е со моментална адреса на живеење во Њујорк, иако често е на некоја друга страна од светот. Дека слабост ѝ се уникатните, неретко луксузни патувања, веднаш е воочливо и кога ќе ја побарате на Инстаграм, каде што е особено влијателна.
Таа вели дека со секое наредно патување е чекор поблиску до себе и дека секоја наредна дестинација ѝ носи внатрешни промени. Теона тврди дека парите потрошени на патување се една од најдобрите инвестиции што човек може да ги направи за себе. Освен што запознава нови традиции и култури, редовно ја набљудува и свесноста на локалните жители за животната средина. А, нејзините искуства говорат дека скандинавските земји и Швајцарија се дефинитивно без конкуренција кога станува збор за одржливоста и екологијата.
.webp){kind=icon}
