На работ на Лаго Ескондидо во Патагонија, северна Аргентина, во подножјето на планините покриени со снег, се наоѓа огромниот имот на британскиот милијардер Џо Луис. Луксузниот имот често е место за забава за одредени јавни функционери и највисокорангирани вработени во инвестициската фирма на Луис и други компании во кои 86-годишникот има удел.
За време на една посета во 2006 година, десетици бизнисмени оделе на јавање коњи и на риболов и им се восхитувале на „Сонот“ на Пикасо и на две верзии на „Жените од Алжир“, кои ги красат ѕидовите на вилата, според фотографиите до кои дојде „Блумберг“. Овие патувања, во кои доминираат дарежливоста и богатството на Луис, делумно се начин на кој успешниот инвеститор со децении негува лојалност и почит меѓу своите најблиски советници, доверливите вработени и моќните личности.
Сепак, повеќе од 15 години по тој излет во Аргентина, навиката на Луис да им дава раскошни поволности на вработените и соработниците го доведе до правни проблеми. Тој се изјасни за виновен пред федералниот суд на Менхетн за обвиненијата дека на своите долгогодишни приватни пилоти и љубовни партнерки им пренесувал доверливи, тајни информации за тргување со акции.
„Иако имав информации од материјално значење што не беа јавни, за одредени компании со кои јавно се тргува, почнав да им давам препораки“ на други луѓе да купат акции, призна Луис пред американската окружна судијка Џесика Кларк на сослушувањето. „Тогаш знаев дека тоа што го правам е погрешно и многу ми е срам“.
Договорот за признавање вина најверојатно драстично ќе ја намали казната на Луис, бидејќи кривичното дело предвидува максимална казна од 45 години затвор. Неговиот адвокат Дејвид Зорноу рече дека Луис се откажал од правото на жалба освен ако не биде осуден на затвор.
Луис, кој беше обвинет минатата година, призна дека пренесувал информации за движењата на пазарот поврзани со компаниите во кои инвестирал. За разлика од другите водечки случаи на т.н. инсајдерско тргување, Луис лично не профитирал од трговијата. Наместо тоа, обвинителите тврдат дека тој им давал информации на своите пилоти, како замена за формален пензиски план, и на своите партнерки, со цел да ги опсипува со внимание.
Bloomberg
Пилотите Патрик О'Конор и Брајан Воу, како и Луис, беа обвинети за измама со хартии од вредност минатата година. Додека поранешната девојка на Луис, Каролин Картер, не беше обвинета, таа беше тужена од Комисијата за хартии од вредност. За една од трансакциите наведени во обвинението, Луис наводно им позајмил на гореспоменатите пилоти по 500.000 долари за купување акции на „Мирати“ (Mirati Therapeutics Inc.) пред веста за клиничко испитување на компанијата да стане јавна во 2019 година.
Пилотите претходно ја негираа вината, но се појавуваа пред судот на одделни рочишта.
Портпаролот на Луис го окарактеризира патувањето во Аргентина во 2006 година како одмор за „семејството на г. Луис и неговите најблиски колеги“. Поранешен соработник што бил на имотот рече дека тоа не било секогаш строго семејна работа. Вработените често барале покани за такви патувања, сметајќи го гестот како знак дека се во милост на шефот.
На фотографиите од патувањето се гледа како Луис триумфално го прикажува својот улов и ги води колегите на коњи низ потоци во близината на неговиот имот.
„Риц Карлтон на вода“
Луис, кој сега е „тежок“ околу 7,6 милијарди долари според индексот на милијардери на „Блумберг“, го напуштил средното училиште за да се приклучи во угостителскиот бизнис на неговиот татко во Лондон. Тој ја подигна компанијата на следно ниво, во синџир на тематски ресторани, потоа ја продаде и го искористи профитот за да се позиционира како трговец со валути. Луис се пресели во исклучително богатото село Лифорд Кеј на Бахамите за да избегне даноци во Велика Британија.
Според финансиските сознанија, неговиот прв голем резултат бил облогот против британската фунта во 1992 година. Истата позиција му донесе на Џорџ Сорос милијарда долари, иако заработката на Луис најверојатно била многу помала, според брокерите. Уште една голема победа постигнал со инвестирање во рускиот енергетски гигант „Газпром“ на почетокот на 2000-тите, според двајца луѓе упатени во овој потфат.
Сепак, голем дел од неговиот успех оттогаш е поврзан со „Тависток груп“ (Tavistock Group), холдинг-компанија што поседува повеќе од 200 бизниси низ светот, вклучувајќи ги и „Сент Реџис“ (St. Regis) со пет ѕвездички во Атланта и голф-клубот „Ијзлворт“ (Isleworth) во Флорида. Луис исто така ја поседува Албани, ексклузивна затворена заедница во Насау на Бахамите, каде што повремено беше забележуван како игра падел со соосновачот на FTX, Сем Банкмен-Фрид, пред неговото апсење во 2022 година.
Најголем дел од богатството сега му е во недвижен имот, а неговата компанија гради ексклузивно одморалиште околу езерото Нона (комплексот се наоѓа во близината на Орландо, Флорида). Тој исто така гради луксузна ергела и коњички клуб во округот Палм Бич со Џастин Тимберлејк и со голферот Тајгер Вудс.
Луис, преку семејниот фонд и неговиот биотехнолошки фонд „Боксер капитал“ (Boxer Capital), со седиште во Калифорнија, има удели во три компании што се централни точки во обвинението за инсајдерско тргување против него, вклучувајќи ги и „Аустралијан агрикалчурал“ (Australian Agricultural Co.) и „Мирати“. Компаниите не се обвинети за никакво прекршување.
Bloomberg
Луис, кој исто така некогаш беше сопственик на фудбалскиот клуб Тотенхем хотспур од Премиер-лигата, држи до својата приватност и ретко зборува со новинари. Тој претпочита да води бизнис од својата суперјахта „Авива“ (Aviva), каде што може да остане подалеку од очите на јавноста. Пред неколку години крстосуваше по Медитеранот и се забавуваше со луѓе како покојниот австралиски медиумски магнат Кери Пакер, но сепак успеа да ги повика трговците кога дојде време за бизнис, рекоа двајца запознаени со неговиот социјален круг.
На бродот долг 100 метри - опишан од еден поранешен колега како „Риц Карлтон на вода“ - Луис е познат по тоа што ги поканува членовите на одборот на палубата на состаноци кога е закотвен во Ист Ривер во Њујорк или пристаниште во Калифорнија. Бродот има терен за падел под палубата.
Во септември 2019 година, Луис поканил вработен во „Боксер капитал“ - кој исто така бил во одборот на „Мирати“ - да ја посети „Авива“ во Калифорнија. За време на еднонеделниот престој, вработениот споделил информации за резултатите од клиничкото испитување на „Мирати“ и претстојните корпоративни објави, предвидувајќи дека цената на акциите би можела да достигне повеќе од 100 долари, рекоа обвинителите. Тој не добил пријава.
Луис, кој бил еден од најголемите акционери на компанијата, им рекол на својата партнерка Картер - поранешна мис на американските Девствени Острови - и на пилотите да купат акции на „Мирати“, според обвинителите.
Аргентина
Откако купи повеќе од 12.000 хектари во аргентинската провинција Рио Негро пред речиси 30 години, Луис не ја ограничи својата дарежливост само на вработените. Тој исто така забавуваше директори на компании, судии и владини претставници додека ги држеше подалеку од локалните жители шо сакаа пристап до јавното езеро.
Неколку години по купувањето на имотот, хеликоптерот на Луис експлодирал додека летал над изолиран дел од Аргентина, при што загинал неговиот пилот. Иако тој самиот не бил на летот во 1999 година, им кажувал на луѓето дека тоа бил обид за атентат, според едно лице информирано за разговорот.
Луис е добропознат по тоа што многу инвестира во својата приватност и безбедност.
Фотографиите од патувањето во 2006 година ги прикажуваат „Сонот“ и „Жените од Алжир“ како висат на ѕидот во украсената дневна соба.
Таа година, сепак, е документирано дека милијардерот Стив Вин случајно се забил со лакт во „Сонот“ додека им ја покажувал сликата на пријателите, што фрла сомнеж за автентичноста на делото што виси на ѕидот на имотот на Луис во Аргентина.
.webp){kind=icon}