.webp){kind=icon}
Во рекламна кампања за накит, македонската пејачка Каролина Гочева неодамна позираше во раскошна вечерна тоалета, која можете да ја имате и вие доколку сте подготвени да платите 76.260 денари.
Вечерниот миди-фустан „Лара“ (Lara midi embellished evening dress) е гламурозен фустан изработен од проѕирна црна ткаенина, по целата должина украсена со камчиња. Во горниот дел кројот личи на дијамант и е со длабоко деколте, а одоздола е споен со шорцеви.
Приватна архива/Моника Димова/Lara midi embellished evening dress
Креацијата е дел од колекцијата „Полноќен гламур“ (Midnight glamour), инспирирана од златната доба на Холивуд, а ја потпишува Моника Димова, дизајнерка и креативна директорка на истоимениот бренд, основан во 2019 година, со седиште во Милано.
Прочитај повеќе
Погледнете ја изложбата на Бенкси во Љубљана
Графитите, социјалната критика и мистеријата одат рака под рака со уличната уметност, со која британскиот уметник владее неколку децении.
26.01.2024
Кога реалити ѕвезда ќе стане претприемачка и ќе заработи милијарди
Успехот на брендовите за убавина поддржани од познати личности во голема мера е поврзан со бројот на следбеници на социјалните мрежи.
26.01.2024
Сите трикови за добар лет, но и за добар сон во авион
Основачката на „Фејсџим“, Инге Терон, открива како да заспиете во рок од 10 минути при секој лет, но и каде да патувате.
17.02.2024
Брендот „Моника Димова“ (Monika Dimova) црпи инспирација од винтиџ-гламурот и сите креации се ретроелеганција преточена во модерниот свет. „Користиме висококвалитетни материјали, како свила, волна и рачно извезени ткаенини, кои ги набавуваме од Италија, Дубаи, Индија и од Турција“, вели младата креаторка.
За потребите на друг промотивен настан, Гочева пред неколку месеци носеше уште една гламурозна креација на Димова. „Аурора“ (Aurora asymmetric draped black feather dress) е црн мини-фустан во асиметричен крој, изработен од креп, со еден ракав што завршува со пердуви и светкава мрежа во горниот дел украсена со рачно извезени камчиња. Дизајнот, кој е достапен и во бела варијанта, е дел од колекцијата „Недостижен сон“ (Ethereal Dream) и чини 73.222 денари.
Приватна архива/Моника Димова/Aurora asymmetric draped black feather dress
„Производствениот процес зависи од комплексот на дизајнот“, вели Димова. Фустаните се изработуваат поединечно за секој клиент и потребни се од 7 до 14 работни дена, вклучувајќи ја испораката. Луксузните креации, меѓу кои има и јакни, здолништа и кроп-топови, најмногу се продаваат во Саудиска Арабија, Обединетите Арапски Емирати, Англија и во САД.
„Интерес има и кај жените од регионот Адрија, иако генерално луѓето овде се со помала куповна моќ. Сепак, забележувам дека и на овие простори има дами што знаат и можат да препознаат квалитетни и уникатни парчиња и некои од нив биле мои драги клиентки“, вели Димова.
Најскапиот дизајн што го продала е специјално изработена долга креација од висококвалитетна свила со пердув за клиентка од Катар.
Освен во скопското ателје и на официјалниот сајт на брендот, производите на Моника Димова се достапни и во три онлајн продавници, кои исто така продаваат на интернационално ниво, Тоа се британските „Калт Миа“ (Cult Mia) и „Лоун дизајн клаб“ (Lone Design Club) и шпанската „Мадам Војаж“ (MadamVoyage).
Моника Димова дипломира на институтот „Марангони“, реномирано приватно училиште за мода и дизајн во Милано. Таа креира уште од дете, но дури по завршувањето на студиите почувствувала дека љубовта кон модата може да ја преточи во сериозен бизнис.
Во релативно кратката кариера успеа да оствари соработка со повеќе интернационални онлајн трговци од Англија, Шведска и од Шпанија. Нејзините производи беа дел и од луксузниот трговски центар во Стокхолм - HK.
„Напредуваме во секој поглед како компанија, но и јас како дизајнерка. Моите планови се амбициозни“, порачува Димова, која пред неколку дена се врати од Грција, каде што снимаше едиторијал за новата колекција.
