Едноставноста е клучот во изборот на накит како инвестиција

Додека според годишниот извештај за луксузни инвестиции на компанијата „Најт Френк“ (Knight Frank) нивото на инвестиции во некои категории на луксузни стоки падна во 2023 година [ретко виски (-9 проценти), класични автомобили (-6 проценти), чанти (-4 проценти) и мебел (-2 проценти)], a уметничките дела (+11 проценти), накитот (+8 проценти) и часовниците (+5 проценти) придонесоа за омекнување на падот. Пазарот на накит порасна во вредност од 8 отсто во текот на изминатата година, што е зголемување од 2 отсто во споредба со 2022 година.

Повеќедецениската релевантност на одредени парчиња ги прави да се истакнат како особено профитабилни можности за инвестирање во овој сегмент. Ограничените серии или моделите што не се произведуваат дополнително ја зголемуваат вредноста на секундарниот пазар. Издвојуваме некои што имаат изразена индивидуалност, силен наратив и поврзаност со брендот интегрирана во дизајнот, поради што автоматски претставуваат симбол на статус и стил за сопственикот и за јавноста.

Љубовна белезица „картие“ (Cartier Love Bracelet) 

Белезицата што веројатно со децении најмногу се користи како симбол на заветување на љубов е дизајнирана од Алдо Ципуло во Њујорк. Доаѓа во изведби од жолто, розово и бело злато во класична верзија (цена: од 7.050 фунти), а ако сакате уште полуксузна верзија од класичната белезица, сега се достапни изведби со дијаманти и со скапоцени камења (цена: од 11.000 фунти до 59.500 фунти). Доколку сакате да ја продадете вашата белезица на секундарниот пазар, се надеваме дека некој не го зел клучот, бидејќи оригиналното пакување со шрафцигер, сметка и сертификат е најдобра гаранција дека ќе ја добиете највисоката цена. Процентот на задржување на оригиналната набавна вредност е 79 отсто, според веб-страницата за продажба на користен накит и луксузни добра „Рибег“ (Rebag).

Ван Клиф и Арпелс Алхамбра (Van Cleef & Arpels Alhambra)

Белезицата од Ван Клиф и Арпелс во облик на детелина е новата замена за љубовната белезица на „Картие“, вели колумнистката на „Блумберг“ Андреа Фелстед.

Bloomberg

Таа открива дека поширок спектар на купувачи сега бараат парчиња како белезицата „алхамбра“ на ист начин како што ги бараа чантите на „Луј Витон“ (Louis Vuitton) пред една деценија и верува дека ненадејната популарност на парчето е показател дека сегментот „луксуз од висока класа“ - главно часовници и накит - е поотпорен отколку во минатите кризи.

Кога „Ришмон“ (Richemont) го презеде овој златар (за 310 милиони евра во три фази од 1999 до 2003 година), имаше само една линија „алхамбра“. Сега има шест колекции под ова име, меѓу кои и „лаки“ (Lucky), со мотиви на срца и пеперутки, и византиска (Byzantine), со цврсти и отворени златни детелини. Додадени се и други линии покрај „алхамбра“, вклучувајќи ги „перли“ (Perlee), со своите мали златни монистра, и „фривол“ (Frivole), со ливчиња во облик на срце. Цената започнува од 5.000 долари.

T-белезица од „Тифани“ (Tiffany T bracelet)

Во пролетта 2023 година, околу две години откако беше купена од ЛВХМ (LVHM), „Тифани“ (Tiffany & Co.) повторно ја отвори својата култна водечка локација на Петтата авенија во Њујорк, а новата уметничка насока што вклучува креативни соработки им вдахна нов сјај и зголемена вредност на најпрепознатливите прчиња од оваа куќа. Со просечно задржување на вредноста од 50 отсто, одредени стилови се покажаа како особено успешни, како што е чокерот со приврзок во форма на срце (Return To Tiffany Heart Tag Choker), со 94 отсто просечно задржување, кој првично беше лансиран во раните 2000-ти, но веројатно својата популарност може да ѝ ја припише на колекцијата „Ритрн ту Тифани“ со Бијонсе (Return to Tiffany x Beyoncé) од минатото лето, пренесува „Лав лакшри“ (Love Luxury). Една од белезиците што се секогаш актуелни е Т-белезицата. Основниот модел во жолто злато започнува од 2.500 фунти.

Во декември минатата година беше лансирана ограничена верзија на белезицата во соработка со уметникот Даниел Аршам, инспирирана од скулптурата на Венера од Арл.

Оваа ексклузивна белезица од бело злато од 18 карати е рачно украсена со 105 дијаманти над 1 карат и над 74 цаворити над 2 карата. Зелената нијанса на цаворитот - живописниот зелен скапоцен камен на „Тифани“ што куќата му го претстави на светот во 1974 година - укажува и на бојата на скулптурата и на бојата на студиото „Аршам“. Пакувањето со реплика од бистата, во која е сместена белезицата, пристигнува во брендирана кутија „тифани блу“ (Tiffany Blue) опкована во метали. 

„Хермес колие де шен“ (Hermès Collier de Chien)

Во 1837 година, меѓу ѕидовите на својата работилница на улицата Басе-ду-Ремпа бр. 56, Тиери Хермес изработил колекција на прекрасни узенгии, еден вид ремек-дело наменето за: коњи. Подоцна, во 1927 година, не е за изненадување што Хермес црпел инспирација од светот на коњите за да го создаде своето прво парче накит, белезицата „филе де сел“ (Filet de Selle). Сепак, една од најдобрите инвестиции е направена малку подоцна, во 1949 година. Колекцијата на белезици „колие де шен“ (Collier de Chien) стана препознатливо парче накит на куќата.

Со текот на годините, „Хермес“ создаде ограничени верзии на белезицата „колие де шен“, кои вклучуваат егзотични кожи, живописни бои и делови обложени со дијаманти. Исто така, брендот повремено произведуваше верзии од чисто злато.

Белезицата „колие де шен“ задржува 66 отсто од својата вредност кога се нуди на пазарот за препродажба, што ја прави паметна инвестиција, посочуваат од „Мај арт брокер“ (My Art Broker). Цената за нова белезица започнува од 1.250 фунти па нагоре, во зависност од додатоците, видот на кожата и металите. А добрата вест е што не треба да чекате со години за белезицата, како во случајот со чантите „биркин“ од овој бренд.