Во 2011 година Том Форд изјави: „Маж никогаш не треба да носи кратки панталони во град“. Со сета почит кон овој исклучително елегантен дизајнер – тие времиња одамна се минато.
Минаа две години откако Педро Паскал прекрши една од последните модни заповеди на „Мет Гала“, носејќи кратки панталони над колена со чизми и црвен капут од „Валентино“. Австралиецот Џејкоб Елроди – висок 196 см – направи нешто слично на модната ревија за пролетта 2024, комбинирајќи кратки панталони што ги откриваат бутовите со вратоврска и кожен блејзер. Смели ѕвезди како Крис Пајн, Колман Домингo и Фарел Вилијамс исто така ги носеа на црвениот тепих. Надвор од официјални настани, Пол Мескал и Доналд Гловер често стануваат вирални на социјалните мрежи благодарение на модели што можат да се опишат само како – па, речиси минимални.
Фарел Вилијамс на ревијата на машката модна облека од „Луј Витон“ во Хонгконг минатата година
Фото: Billy H.C. Kwok/Getty Images AsiaPac
Дизајнерите годинава одговорија со кратки панталони од сите кроеви и стилови на модните писти за машка мода. Кај „Драјс ван Нотен“ (Dries Van Noten) и „Диор“ (Dior) беа лесни и широки, кај „ЏВ Андерсон“ (JW Anderson) тесни како велосипедски. „Ралф Лорен“ (Ralph Lauren) ги претстави елегантно скроени и како за на колеџ. „Тод Снајдер“ (Todd Snyder) се одлучи за широки бермуди со набори. „Гучи“ (Gucci) понуди речиси минијатурни модели. „Бриони“ (Brioni) ги обликуваше како класични панталони, додека „Фенди“ (Fendi) им додаде спортски шлиц од страна. „Нил Барет“ (Neil Barrett) претстави одличен модел во стил за на одмор со јакна во комплет.
Во стил на „Белиот лотос“, но не само за на одмор
Фото: Depositphotos
Накратко (уф, ау), живееме во златната ера на кратките панталони – ера што е или прекрасно изразна или на работ на хаос, во зависност од вашиот став кон овој моден елемент.
Доволно е да погледнете по улиците во топол ден: сè е дозволено – од спортски шорцеви што откриваат од средината на бутот и тексас модели под колена (омилени кај генерацијата зед, фасцинирана од естетиката Y2K), до широки модели што ги носат модно освестените ентузијасти. Дури и контроверзните „карго“ панталони се вратија. Сето тоа покажува колку модниот свет се фрагментираше. Можете да ги обвините Инстаграм и Тикток, кои ја урнаа секоја идеја за единствена естетика. Или поширокото чувство, присутно во многу делови од општеството, дека правилата од минатото повеќе не важат.
Можеби е бесмислено да се поставуваат догми во време што е модно нескротливо, но сепак постојат некои основни правила. „Шорцевите може да бидат добри, лоши или погрешно избрани – одлуките што ги носите ги прават одлични“, вели Тод Снајдер.
Над колената е во ред, велат стилистите. Ако одите под колено, „влегувате во ничија земја“. Тоа е многу незгодна пропорција
Фото: Depositphotos
„Правилната пропорција, соодветните обувки, начинот на кој ги стилизирате – сето тоа го одредува успехот на изгледот“.
Кога сте во дилема, изберете должина над коленото (меѓу 17 и 25 см). „Тоа изгледа елегантно бидејќи потсетува на кројот на училишните униформи“, вели Снајдер.
Њујоршкиот моден консултант и познат љубител на шорцеви Ник Вустер, вели: „Штом преминете под коленото, влегувате во ничија земја. Тоа е многу незгодна пропорција“.
Ендру Вајц, стилист од Лос Анџелес што работи со бизнис-лидери и со поранешниот спортист и сега претприемач Том Брејди, препорачува да започнете со памучни и ленени модели и да се држите до класични бои, како морнарско сина, маслинеста или бела за летни настани од повисок ранг. (Каки бојата може брзо да даде „вибрации на чичко Ване“, па бидете внимателни.)
Шорцевите влегоа на модните писти пред повеќе од една деценија, но исто така и во гардероберите
Фото: Depositphotos
„Лоро Пиана“ (Loro Piana), „Брунело Кучинели“ (Brunello Cucinelli), „Клуб Монако“ (Club Monaco) и „Џ. Кру“ (J. Crew) нудат модели што вреди да се разгледаат.
Сите модни експерти предлагаат кратките панталони да се комбинираат со нешто пософистицирано за да се балансира нивната неформална природа – на пример, маица со јака, плетена поло-маица или класична кошула со копчиња. „Секогаш ми се допаѓа идејата за контраст и мислам дека ви требаат два спротивни концепта“, вели Вустер, кој често ги комбинира своите шорцеви со сако и чевли, како моделот „лонгвинг бруги“.
Или послушајте го советот на дизајнерот Том Браун, кој со години носи костуми со сиви фланелски шорцеви: „Само напред. Ако имате самодоверба во тоа што го носите, никој не може да ви го одземе тоа. Секогаш ќе изгледате добро ако сте верни на себе“.
.webp){kind=icon}
Во моментов нема коментари за веста. Биди прв да коментира...