„Одемар пиге нео фрејм“ со цена од 71.000 долари може да биде најпосакуваниот часовник во 2026 година

Пишувам од Швајцарија, каде што имав среќа да престојувам во хотелот со пет ѕвезди „Чеди Андермат“ (Chedi Andermatt), во долината Урсерен, во Швајцарските Алпи.

Повторното отворање на овој хотел го следев уште во 2019 година, откако новиот сопственик го трансформираше мирното гратче во ски-комплекс со цел да го претвори во глобална луксузна дестинација. „Чеди“ е огромен хотел, составен од повеќе од девет поврзани колиби, со извонредни ресторани и инфинити базен, во кој можете да пливате со поглед кон суровите планински врвови.

Андермат, Швајцарија | Chris Rovzar/Bloomberg

Прекрасната планинска долина беше домаќин на „Одемар Пиге соушал клаб 2026“ (Audemars Piguet Social Club 2026), годишниот традиционален настан на независниот швајцарски производител на часовници „Одемар Пиге“, на кој брендот за медиумите и пријателите ги претставува највозбудливите модели за годината. Кога ја добив поканата, таа пристигна со детална програма и повеќе насоки – вклучувајќи препораки за обувки и упатства да понесеме повеќе капути.

Успеав да сместам две комбинации за вечерните забави и мојата ски-опрема во една рачна торба, и никогаш не сум бил погорд на себе. (А дебелата зимска јакна ја носев насекаде.)

Генералната директорка Иларија Реста ги поздрави присутните на појадокот, осврнувајќи се на 150-годишнината од постоењето на брендот, која „Одемар Пиге“ ја одбележи минатата година, и даде јасно ветување: „Целта на ‘Одемар Пиге’ е да остане семејна компанија и да продолжи да биде независна и во следните 150 години“, рече таа. „И зошто е тоа така? Не станува збор само за управувањето. Станува збор за духот, посветеноста на долгорочното, креативната слобода и постапувањето на исправен начин – не само за нашиот бизнис туку и за индустријата во целина.“

Иларија Реста| Audemars Piguet

Поминав еден ден учејќи за историјата на изработката на часовници, слушајќи за иновациите на кои работи „Одемар Пиге“ и од каде произлегуваат нивните идеи, како и дружејќи се со мајсторите што ги прават часовниците толку убави.

Во еден момент директорот на музејот и наследството на „Одемар Пиге“, Себастијан Вивас, се појави со перика и мустаќи како Алберт Ајнштајн и зборуваше за различните квалитети низ текот на времето. Ја вежбав вештината на рачна обработка со фасети на една компонента (бев многу лош) и користев рачна дупчалка за текстурирање, каква што мајсторите користат за да го создадат нивниот финиш „замрзнато злато“ на некои часовници – што, за среќа, е техника што простува грешки.

Прототип на часовник од злато на „Одемар Пиге“. Прототип на „ројал оук“ од бело, розево и жолто злато. Еден ден можеби ќе постои и верзија за сериско производство. | Chris Rovzar/Bloomberg

 

Исто така се запознав и со колекцијата за 2026 година, која опфаќа широк спектар стилови: беа претставени нови модели во линијата „мини ројал оук“ (Mini Royal Oak) од 23 милиметри со кварцен механизам, како и нови бои за „ројал оук офшор дајвер“ (Royal Oak Offshore Diver) и за моделот „селфвиндинг флајинг турбијон“ (Selfwinding Flying Tourbillon) од колекцијата „код 11.59“ (Code 11.59). Тоа не беше особено револуционерно, бидејќи станува збор за нов визуелен изглед на веќе постоен часовник, но резултатот беше исклучително елегантен.

Нов турбијон часовник со бројчаник од бело злато | Chris Rovzar/Bloomberg

Часовниците што ме фасцинираа најмногу

Нео фрејм џампинг (Neo Frame Jumping Hour)

Часовникот е широк 24,6 милиметри и долг 34 милиметри (без вклучени држачи), што звучи како мал, но се носи како часовник со средна големина. | Audemars Piguet

Одличниот Марк Каузларих од „Ходинки“ (Hodinkee), кој е исклучително трпелив на вакви патувања и ми ги објаснува финесите на механизмот како да сум мало дете, ми раскажа дека кога „Ходинки“ објавил фотографија од новиот часовник „нео фрејм џампинг“ (Neo Frame Jumping Hour) на социјалните мрежи, за рекордно кратко време добил 2.000 споделувања и 6.000 допаѓања.

Часовникот е впечатлив поради неколку причини. Прво, станува збор за нова форма за модерен „одемар пиге“. Во минатиот век брендот изработувал различни часовници со смел дизајн во повеќе форми, вклучувајќи и модели со „џампинг аур“ како овој, особено во ерата на арт-деко. Но во последните децении, „Одемар Пиге“ стана препознатлив пред сѐ по октогоналните линии на „ројал оук“ и „ројал оук офшор“. Во 2019 година беше развиен и едноставниот, кружен „код 11.59“ (Code 11.59).

Правоаголник, пак, со ребрести декоративни детали од страните што се спојуваат во држачите, сличен на оние кај „жаже-лекултр реверсо“ (Jaeger-LeCoultre Reverso), не сме виделе со децении.

Не, ова не сум јас што се обидувам да го присвојам часовникот… | Chris Rovzar/Bloomberg

Дизајнот е многу графички и едноставен. Куќиштето е од розово злато, а сафирното стакло на бројчаникот е обложено со црна ПВД-обвивка, што му дава изглед на оникс. Ремчето е од црна текстурирана кожа. Постои само прозорец за часовите, кој не се менува постепено, туку „скока“ во новата позиција – оттука и називот скокачки час. Дополнително, има и индикатор за минутите. Тоа е сè.

Компликацијата „џампинг аур“ е многу современа: само во последната година видовме верзии на овој долго заборавен стил кај брендовите „Картие“ (Cartier), „Фиерс“ (Fears) и „Бремонт“ (Bremont). Главниот директор за индустрија во „Одемар Пиге“ (Audemars Piguet), Лукас Раџи, ме увери дека инспирацијата доаѓа од минатото.

„Во дваесеттите и триесеттите години бевме многу активни со моделите ‘џампинг аур’ . Сакавме да изградиме мост меѓу минатото и иднината, кој ќе биде поголем и со поиздржлив механизам“, вели тој. „Естетиката е навистина футуристичка.“ Овој часовник ќе биде во постојана ротација и ќе биде дел од новата колекција „нео фрејм“, која ќе продолжи да истражува нови начини на прикажување на времето. Цената ќе изнесува 71.200 долари.

 

Џебен часовник „150 години наследство“

Џебниот часовник е исто така омаж на уметничките занаети, со 1.400 рачно обработени компоненти и со детални гравури на страничните површини од платинестото куќиште. | Audemars Piguet

Како и многу брендови што ги знаете и ги сакате, „Одемар Пиге“ започнал со изработка на џебни часовници, но престанал кога рачниот часовник станал стандард. Кога Иларија Реста го презеде „Одемар Пиге“ во 2024 година, таа изјави дека „отсекогаш сонувала да има ваков часовник“.

„Ја споделив оваа желба со директорот за концепција на часовници Џулио Папи“, вели Реста, „а неговиот одговор беше исклучително краток, но многу ефективен: ‘Ќе го направам.’“

На предната страна се наоѓаат прекрасен вечен календар, хронограф и турбијон (механички „вртлив кафез“). На задната страна има сложен аналоген компјутер, кој ги организира лунарниот календар, западниот календар и лунисоларниот календар, овозможувајќи да се пресмета, на пример, на кој ден паѓа празникот Дивали или Лунарната нова година во која било година.

„Ни самиот не знаев зошто Велигден секогаш паѓа на различен датум“, вели Жулијен Мартел, дизајнерот на механизмот, пред да ми покаже како џебниот часовник може да одреди на кој ден во неделата паѓа мојот роденден оваа година. „Научив многу додека го изработував ова“, додава тој.

Во декември „Одемар Пиге“ го откупи својот најпознат џебен часовник на аукција во „Сотби“ (Sotheby’s) во Њујорк. Часовникот „грос пјес“ историчарите го опишуваат како „крунско достигнување“ на „Одемар Пиге“, а компанијата плати 7,7 милиони долари за да го врати. Тој беше изложен на „Соушл клаб“, заедно со новиот џебен часовник.

Задната страна на новиот џебен часовник е универзален календар и е дизајнирана на многу помодерен начин.| Audemars Piguet

За жал, оваа верзија од 37 милиметри ќе го чини мојот сопруг 75.700 долари.| Chris Rovzar/Bloomberg

Немам многу што да кажам за овој часовник, освен дека не очекував да бидам импресиониран, бидејќи досега сме виделе многу часовници од жолто злато со бројчаник од малахит. Но кога го ставив на раката, едноставно се воодушевив.

„Ројал оук перпетуал календар опенворкд“ (Royal Oak Perpetual Calendar Openworked)

„Ројал оук перпетуал календар опенворкд“  | Audemars Piguet

„Одемар Пиге“ претстави два отворени вечни календари на истиот настан – еден во колекцијата „код 11.59“, а другиот во колекцијата „ројал оук“. (Терминот „openworked“ значи дека делови од бројчаникот и/или од главната плоча се исечени за да се прикаже механизмот, но часовникот не е целосно отворен.)

Со куќиште и белезица од титаниум, часовникот е исклучително лесен, а безелот е изработен од материјал наречен „булк металик глас“ (bulk metallic glass), кој, според „Одемар Пиге“, е метална легура што при брзо ладење добива стаклест изглед. Составот на овој материјал содржи повеќе од 50 отсто паладиум и е особено отпорен на гребење, а наедно и многу сјаен.

Новина кај овие два часовника е механизмот „калибар 7139“ (Calibre 7139), кој го користи паметниот систем за корекција „сè во едно“ што „Одемар Пиге“ го воведе минатата година. Благодарение на тоа, за приспособување на големиот број функции на вечниот календар – ден, датум, недела, месец, месечева фаза, час, минута и престапна година – потребно е да се користи само страничното копче (круната) за приспособување на сите функции.

На вечерата на крајот од денот, извршната директорка Реста го носеше овој часовник, со пречник од 41 милиметар, но тој не изгледаше преголем на нејзиниот зглоб. Тогаш ми стана јасно дека токму овој модел бил во центарот на вниманието таа недела.