Пред три години, Данкан Кит и Мајк Гамел со последниот лет одлетаа од Лондон до Единбург пред да стапи во сила целосното заклучување на земјата поради пандемијата.
Непосредно пред тоа тие ги напуштија своите редовни работни места, со голема амбиција да почнат да произведуваат 100 отсто безалкохолни пива, и штотуку го најдоа идеалниот партнер - пиварница во близината на Единбург. Шест месеци подоцна, тие го лансираа „Дејс“ (Days). По една година, тие ја освоија својата првата светска награда за пиво.
По 36 месеци (и напорна работа од нивниот ентузијастички тим од девет члена), „Дејс“ продава по едно безалкохолно пиво на секои 30 секунди преку интернет, а неговите производи се наоѓаат во продавници како што се „Теско“, „Окадо ритејл“, „Вагамама“ и 1.500 премиум-локации низ Велика Британија, а два отсто од продажбата на пивото „дејс“ им се донираат на иницијативи и организации за зачувување на менталното здравје на нацијата.
Неодамна нивниот „пејл ејл“ (Pale Ale) ја освои златната награда на ВАФА 2023 (World Alcohol Free Awards - Светска награда за безалкохолни пијалаци). Оваа приказна е еден од најуспешните стартапи што се посветени на развивање нова генерација поцелосни и повкусни варијанти на безалкохолно пиво што би ги задоволиле и најискусните познавачи на пивото.
Bloomberg Adria
Иако безалкохолното пиво во моментов учествува со помалку од три отсто од вкупната продажба на пиво во светот, се предвидува дека во следните 5-10 години тој удел ќе се зголеми на 10 отсто. Сè повеќе припадници на генерациите икс и зед му вртат грб на алкохолот или го намалуваат неговото консумирање од здравствени причини по пандемијата, што резултира со експоненцијален раст во овој сектор. Сопствениците на „Дејс“ велат дека 70 отсто од нивните клиенти се на возраст од 18 до 35 години, а 40 отсто се жени. „Тоа значи дека привлекуваме различни потрошувачи во споредба со традиционалните брендови на пиво и наместо да им го земеме уделот на пазарот, ние сме повозбудени да донесеме квалитетно пиво до нови потрошувачи и нови можности. Секое трето одење во паб или бар сега вклучува консумирање ’безалкохолно’ пиво. Кога ќе размислите за големината на категоријата пиво, тоа е многу охрабрувачки за нас - веруваме дека постои огромна можност да се трансформира пивската индустрија преку создавање бренд и бизнис што се порелевантни за современиот потрошувач. Тоа е начинот да се постигне вистински раст во оваа категорија“, заклучуваат Данкан Кит и Мајк Гамел од „Дејс“.
Bloomberg Adria
„Теско“, британски синџир на супермаркети, изјави дека продажбата на безалкохолни и нискокалорични пива била за 25 отсто поголема во јуни во споредба со јануари оваа година, кој во Велика Британија традиционално е „месец на воздржување од алкохол“ и кога потрошувачката на безалкохолни пијалаци логично е на врвот, што докажува дека популарноста на оваа категорија расте брзо.
Додека оваа тивка револуција на безалкохолни пива ги освојува срцата на хедонистите низ светот, производителите продолжуваат да експериментираат и да ги подобруваат своите креации, создавајќи нови вкусови и искуства и во регионот Адрија.
Bloomberg Adria
Во Србија, Владимир Стојковиќ, косопственик и директор на „Догма бревери“ од Белград, планира да лансира безалкохолно пиво до крајот на август. „Идејата постоеше одамна, но целиот процес беше забрзан со моето патување во САД, каде што на предавањата во рамките на конференцијата ’Крафт бир’ во Нешвил го видов потенцијалот на овој вид производи и собрав дополнителни знаења од сферата на производството. Немам податоци за продажбата во нашиот регион, бидејќи штотуку почнуваме со оваа приказна. Практично сме први меѓу колегите пивари во Србија, но она што ни го кажуваат искуствата на колегите од големите конгломератски пиварници е дека ова е растечки тренд“, вели Стојковиќ за „Блумберг Адрија“ и додава дека насекаде во светот овој производ се поврзува со луѓе што сакаат да консумираат пиво, но би сакале да го комбинираат со други активности каде што алкохолот нема да влијае на нивните перформанси, како што се спортски и рекреативни активности или уживање во природа.
Освен што ги задоволува хедонистичките желби, безалкохолното пиво стана и симбол на одржливиот и здрав начин на живот. Следејќи ги барањата на пазарот, пиварниците во Србија го подобруваат својот асортиман за да одговорат на потребите на потрошувачите што бараат здрава, но вкусна алтернатива на пивото. Сè поголем број луѓе имаат тенденција да се грижат за своето здравје и се свесни за штетните ефекти од прекумерното консумирање алкохол. Следејќи ги барањата на пазарот, членовите на Здружението на пивари на Србија, „Хајнекен“, „Молсон Корс“ (Апатинска пиварница), „Карлсберг“ и „Малтинекс“, се трудат со иновации во своето портфолио да одговорат на потребите на сите потрошувачи, а зголемениот интерес за безалкохолни пива, како и за радлер и јаболковина што содржат помал процент на алкохол, е резултат на промената во навиките на љубителите на пиво и сѐ поголемата свест за одговорност и умерено консумирање. „За континуирано да ги едуцираме нашите потрошувачи за оваа растечка категорија, Здружението на пивари на Србија ја започна кампањата ’Одговорно и внимателно - да се грижиме за себе и за другите’, во партнерство со јавниот здравствен систем на Србија и Стопанската комора на Србија“, вели Нада Павловиќ, директорка на Здружението, и додава дека сите компании-членки делумно увезуваат пиво без алкохол, а некои од брендовите се произведуваат во Србија.
Самиот процес на производство на безалкохолни пивски брендови е поинаков и покомплексен во однос на стандардното пиво. Пивото мора да помине низ процес на филтрирање и испарување на алкохолот, што го продолжува процесот на производство и влијае на неговиот вкус, но и на цената. Разликата меѓу безалкохолните пива и нивните алкохолни пандани може да биде и до 30 отсто поголема.
Пиварниците што произведуваат безалкохолно пиво ги почитуваат принципите на кружната економија. Алкохолот што се извлекува од пивото за да се добие безалкохолно пиво се користи како нуспроизвод и понатаму им се продава на компании што го користат за производство на дестилациски средства.
Со оглед на тоа што повеќето пиварници што влегоа во производството на безалкохолно пиво претпочитаат единечно пакување, било да се тоа шишиња или лименки, заклучокот е дека во однос на пласманот дефинитивно акцентот е на малопродажбата.
.webp){kind=icon}
