Хамбургерот одамна веќе не е само синоним за брза храна туку е и кулинарски производ достоен за внимание и меѓународно признание. Тоа го потврдува и новата листа на 25 најдобри хамбургери на светот (World’s 25 Best Burgers), која секоја година ја објавува лондонската агенција „Аперкат концептс“ (Upper Cut Concepts), позната по изборот на најдобри стекови и глобалните гастрономски рангирања.
Во конкуренција влегоа околу 1.200 ресторани и бургер-барови од повеќе од 60 земји, а оценувањето го спроведоа меѓународни амбасадори за бургери и стекови, како и редакцискиот тим на агенцијата. Критериумите беа јасни и ригорозни и го надминуваa само вкусот: оценувани беа квалитетот и потеклото на месото, техниката на приготвување, конзистентноста, искуството на гостите, односот цена-вредност, па дури и одржливоста и онлајн репутацијата.
„Со оваа листа на 25 најдобри хамбургери на светот сакаме да го привлечеме вниманието кон едно од најомилените јадења во светот и кон неверојатната разновидност на бургер-културата низ планетата“, вели Екехард Кнобелспис, извршен директор и издавач на ова рангирање. „Од Валенсија до Сиднеј, од Њујорк до Токио, оваа листа е славење на креативноста, страста и квалитетот“.
Второпласираниот Bleecker Burger од Лондон
Upper Cut Concepts
На врвот на листата и оваа година се наоѓа шпанскиот ресторан „Хандред бургерс“ (Hundred Burgers) од Валенсија, кој ја потврди својата лидерска позиција со уште поголем авторитет, дефинирајќи нови стандарди на угостителска прецизност. Нивниот победнички бургер се прави од мелено созреано говедско месо и леб бриош што се пече на самото место, со слој на карамелизиран кромид, сирење чедар, крцкава сланина и сос „ББК де мама“, по цена од 12,50 евра. Внатрешноста на ресторанот, изработена како универзитетска библиотека, плени со топлина и ненаметлив шарм, а целата креација доаѓа од Алекс Гонзалес Урбон и Езекиел Малдиан, кои инспирација за совршениот бургер нашле на своите патувања низ САД.
Black Bear Burger од Лондон е на третото место
Upper Cut Concepts
Промените на листата во однос на минатата година се очигледни: американските ресторани повеќе не се доминантни, додека Европа бележи силен раст. Второто и третото место им припаднаа на легендите од Лондон, „Бликер бургер“ (Bleecker Burger) и „Блек бер бургер“ (Black Bear Burger), додека нордиските претставници како „Попл бургер“ (Popl Burger) од Копенхаген и „Фанки чикен“ (Funky Chicken) од Стокхолм покажуваат дека и минималистичкиот скандинавски пристап може да го освои глобалниот пазар.
Италијанскиот „Ребургер“ (Reburger) од Фиренца се наоѓа на 22. место, истакнувајќи го принципот на целосно внимание кон свежината: ништо не се замрзнува, не се набавува и не се приготвува однапред. Меѓу американските претставници, њујоршки „Сип енд газл“ (Sip & Guzzle) на 13. место и „Новон“ (Nowon) на 15. место, како и „Лојалист“ (The Loyalist) од Чикаго на 19. место, покажуваат дека САД и натаму имаат значително влијание на оваа гастрономска сцена.
Новото име на листата доаѓа од Азија - јапонскиот „Гуис бургер“ (Gui’s Burger) се најде на 17. место користејќи локален вагју, додека Австралија оваа година се истакна со дури три претставници во топ 25: „Некст дор дабл беј“ (Next Door Double Bay) од Сиднеј со 10. место е прогласен и за најдобар бургер во Австралија, додека „Гидли“ (The Gidley) на 12. и „Чард“ (Charrd) од Мелбурн на 14. ја потврдуваат силата на австралиската гастрономска сцена.
Њујоркшкиот Sip & Guzzle, на 13-то место, покажува дека САД сè уште имаат значително влијание врз оваа гастрономска сцена
Upper Cut Concepts
Иако оваа година немаше претставници од регионот, интересoт за локалната сцена расте. „Во текот на рангирањето посетивме неколку бургер-барови во Хрватска и во Словенија“, вели Тим Крејмер, лидер на глобалното рангирање, и додава: „Иако ниту еден од нив не се пласира на листата, гледаме јасни придвижувања и големо вложување во правец на квалитетот. Регионот Адрија е сигурно во нашиот фокус и ќе продолжиме да го следиме во наредните години, бидејќи локалната сцена очигледно созрева“.
Heard се наоѓа на 25. место
Upper Cut Concepts
Регионалните ресторани веќе следната година би можеле да добијат шанса да се докажат и да заслужат место меѓу најдобрите, бидејќи форматот ќе биде проширен и ќе опфати дури 101 локал со најдобри бургери на светот (The World’s 101 Best Burger Places). Интересот за квалитетни бургери низ светот ги поттикна организаторите да дадат поширока слика на глобалната сцена и да отворат врата за нови пазари, меѓу кои е и нашиот регион.
.webp){kind=icon}
