Кулинарските експерти ги претставија листите што се очекува да го променат начинот на кој купуваме, готвиме и разговараме за нашето мени во годината што доаѓа. Очекувано, во извештаите доминираат производи што нудат функционални придобивки, транспарентно потекло и автентичен вкус, но по малку неочекувани се прогнозите дека потрошувачите сè повеќе ќе бараат носталгија во тоа што го јадат, а со тоа и значително ќе расте пазарот на производи што ги спојуваат традиционалните рецепти со современите нутритивни вредности.
Набавете си навреме говедска маст, затоа што тоа е една од поважните пораки во извештајот на познатиот американски синџир на супермаркети „Хол фудс маркет“ (Whole Foods Market). Овој деликатес се враќа во кујната на голема врата, но во нов контекст, како внимателно избрана состојка за готвење дома или во ресторани што се навраќаат кон подлабоки автентични вкусови. На истиот список со гастротрендови што ќе ја обележат 2026-та високо котира и замрзнатата храна, но значително посодржајна и без отстапки кога станува збор за квалитетот.
Говедската маст се враќа во кујната | Depositphotos
„Бранот на нови замрзнати оброци, предјадења и прилози носи одлични вести за сите што сакаат да создадат вкусно (па, дури и ресторанско) искуство дома. Потрошувачите бараат да ги комбинираат врвните состојки со глобално инспирирани вкусови и практични трикови за штедење време, а овие замрзнати опции се совршени за оние што планираат оброци, но сакаат слободна вечер, или за гурмани што сакаат пауза од јадењето надвор. Замислете замрзнати аранчини, пупуси и други јадења инспирирани од готвачи, кои ќе имаат вкус како да излегуваат од врвна ресторанска кујна, а всушност се приготвуваат само во вашиот ер фреер“, пишува во извештајот.
Листата е креирана од тим експерти од различни области (од набавка и истражување на пазарот до кулинарство) што континуирано ги следат навиките на потрошувачите, а истата таа предвидува уште неколку значајни промени. Брендовите сè почесто ќе ја истакнуваат содржината на растителни влакна на нивната амбалажа, а на полиците ќе расте бројот на производи збогатени со оваа состојка, особено тестенини, крекери и протеински плочки.
Јаворовиот сируп како алтернатива на шеќерот ќе биде во пораст | Depositphotos
Во иднина потрошувачите ќе бидат сè покреативни и со оцетот, кој, како што е наведено, им дава дополнителна длабочина и сложеност на јадењата, а истовремено носи и пробиотски придобивки.
Следната година уште повнимателно ќе се одбираат и изворите на шеќери, па наместо вештачки засладувачи или замени, ќе се бараат производи благо засладени со вистински шеќер од трска или природни состојки како цело овошје, мед или јаворов сируп. Значително ќе се промени и перцепцијата кон инстант храната, најмногу благодарение на креаторите на содржини на Тикток, кои ќе продолжат да промовираат иновативни и нутритивно побогати инстант опции, идеални за канцелариски оброк или за долги патувања со авион.
Индонезиска салата „Гадо гадо“. Извештаите ја наведуваат Индонезија како следната клучна дестинација за фино јадење. | Depositphotos
Водечките тенденции во индустријата за храна и пијалаци за 2026-та ги објави и глобалната компанија за истражување на пазарот „Иннова маркет инсајтс“ (Innova Market Insights). И во нивниот извештај со топ 10 глобални трендови доминираат производи што сè појасно го одразуваат спојот меѓу здравјето, одржливоста и современиот начин на живот. Потрошувачите ќе бараат повеќе протеини и пробиотици, но во производи што нудат интересни искуства со мистериозни вкусови, различни текстури и скриени компоненти. Тестенините од грашок, леќа и карфиол се наведени како пример за нови автентични растителни иновации.
Зеленчукови тестенини - рај за веганите | Depositphotos
Следната година значително ќе порасне и интересот за органско кафе, но и за нови производи што можат да го намалат стресот, а како особено привлечни се издвојуваат чаевите со адаптогени (зелен чај, ашваганда, лавовска грива, реиши печурка и ацерола).
Јапонскиот чај хоџича се пече на повисока температура | Depositphotos
По големата популарност на мачата, љубителите на чаеви и кафе-алтернативи имаат ново откритие, кое се вика хоџича (Hojicha tea). Станува збор за јапонски зелен чај, кој се пече на повисока температура, што му дава црвено-кафена боја, ги намалува киселите танини и ја намалува содржината на кофеин, а кој „Нешнал џиографик“ го прогласи за еден од 11-те големи трендови за храна во 2026 година. На оваа листа се најде и подзаборавениот антички римски зачин гарум (Garum), направен од солена и ферментирана рибја внатрешност и остатоци, што им дава на јадењата длабоко изразен умами вкус.
Зачинот гарум се прави од солени и ферментирани рибји утроби и остатоци. | Depositphotos
НОВА МАПА НА ВКУСОВИ
Реномираниот кулинарски водич „Ла лист“ (La Liste) ја објави јубилејната десетта листа со топ 1.000 ресторани, специјални награди и клучни трендови што ќе ја обликуваат современата гастрономија. Во истражувањето биле вклучени повеќе од 1.100 меѓународни извори, од национални и регионални печатени медиуми до специјализирани дигитални платформи, а како еден од најважните трендови за 2026 година се наведува растот на ресторани во рамките на премиум хотелите, кои, како што пишува во образложението, повеќе не се само дел од понудата туку стануваат и култни дестинации сами по себе, дизајнирани да создадат целосно искуство за гостите.
Филипинска улична храна - доминираат ракчиња | Depositphotos
Во извештајот се наведува и дека Азија станува еден од најважните глобални гастрономски центри и дека кинеската, јапонската и корејската кујна повеќе не се „егзотични опции“, туку стандард за техничка перфекција и луксузно угостителство. Како следни клучни дестинации за гастрономија од висок ранг се наведени Индонезија, Малезија и Филипини.
„САД продолжуваат да ги комбинираат гастрономијата и претприемаштвото, додека дестинации како Дубаи, Ријад и Доха го редефинираат концептот на луксузен ресторан преку архитектонски спектакл, интернационални тимови и големи инвестиции“, пишува „Ла лист“.
.webp){kind=icon}
