Дали е прифатливо да се понесе ладно кафе на интервју за работа?

Дали е прифатливо да се донесе ладно кафе на интервју за работа?

Ова навидум безначајно прашање некако го привлече вниманието на различни делови од интернетот и ги преплави објавите на социјалните мрежи и групните разговори. Ни ние не сме исклучок. Уште од големата полемика околу носењето шорцеви во канцеларија, ниту една расправа за работното место не го привлекла толку нашето внимание како оваа.

Она што ја поттикна таканаречената расправа за ладното кафе беше вирално видео на Тикток од Кејтлин Вехниаинен, регрутерка во корпоративниот сектор, која на социјалните мрежи објавува и совети за лицата што бараат работа. Во своето видео Вехниаинен вели дека помладите кандидати доаѓаат на интервјуа за работа со ладно кафе, што нејзе ѝ изгледа како интервјуто да го третираат како „една од точките на списокот со обврски за тој ден“. Нејзиниот совет гласи: „Не влегувајте опуштено на интервју за работа со ладно кафе“. Додава: „Само изгледа како да не сте имале време претходно да го испиете кафето“.

Нема да бидам првата што ќе го каже тоа, но жестоката расправа што следуваше всушност не е за ладното кафе. Самата природа на работата во моментов се менува, а вештачката интелигенција ги забрзува длабоките структурни промени. Работодавците и нивните помлади вработени водат борба околу тоа кој има право да ги одредува правилата и нормите на новото работно опкружување. Ладното кафе е само најновиот симбол на таа напнатост - на начинот на кој двете страни се чувствуваат неразбрано, но и на длабоката вознемиреност за своето место во опкружувањето што се менува.

За шефовите од постарите генерации, носењето ладно кафе на интервју за работа може да укажува или на целосно неразбирање на непишаните правила на работното место или, можеби уште полошо, на неподготвеност на кандидатот да се придржува до нив. Двете толкувања дополнително ги потхрануваат постојните стереотипи што шефовите ги имаат за вработените од генерацијата зет: дека се непрофесионални, неподготвени, немотивирани и дека е тешко да се раководи со нив.

Пред извесно време, кандидатите добиваа совети да ги сокријат тетоважите при интервју за работа/Sergio Flores/Bloomberg

Како се проценува расположението во ерата на вештачката интелигенција? 

Ладното кафе добива несразмерно големо значење во момент кога многу традиционални сигнали во процесот на вработување станале застарени. Пријавувањето за работа се претворило во своевидна јамка на ВИ без излез: кандидатите користат вештачка интелигенција за пишување биографии и мотивациски писма, кои потоа ги оценува друга вештачка интелигенција за да провери дали одговараат на огласот за работа, кој исто така е напишан со помош на ВИ. Поради тоа, влогот на интервјуто во живо станал поголем - тоа е конечната процена на впечатокот во ерата на вештачката интелигенција. Логиката е дека, ако потенцијалниот вработен не може да се вклопи и да се приспособи кога тоа е најважно, кои други правила ќе одбие да ги почитува и на кои ќе одбие да се приспособи?

Depositphotos

Сето тоа се случува во момент кога корпоративната култура е многу чувствителна на знаци на пркос, а раководството вложува дополнителни напори да го задуши секој навестен бунт на работното место. Шефовите се во својата ера на „команда и контрола“. Повторно го воспоставуваат авторитетот со задушување на несогласувањето, засилен надзор и намалување на бенефициите. Го контролираат начинот на кој вработените ги изразуваат своите лични ставови дури и кога не се на работа и бараат да бидат во канцеларија пет дена неделно.

Генерацијата зет не ведува ниту во институции, ниту во норми

Во меѓувреме, голем дел од генерацијата зет не прифаќа такви правила. Тоа е генерација што растела со редовни пукотници во училиштата, созревала за време на климатската криза и поминала низ глобална пандемија - искуства што ја нарушиле нејзината доверба во големите институции и во она што го смета за произволни правила.

Нивната желба да постават граници и одбивањето слепо да прифаќаат наредби на постарите менаџери може да им изгледаат како чувство на привилегираност или непослушност. Припадниците на генерацијата зет ги започнуваат кариерите во момент кога постојано им се кажува дека вештачката интелигенција би можела да ги укине работните места кон кои се стремат. Во таков контекст, како ладното кафе воопшто би можело да биде важно? Наместо тоа, тоа само остава впечаток на елитизам и мрзеливо поставување пречки за другите.

Вреди да се потсетиме дека, не толку одамна, лицата што бараат работа добивале совет на интервјуто да ги сокријат тетоважите и од биографиите да ги отстранат назнаките за својата сексуална ориентација или родов идентитет. Секако, ладното кафе ни оддалеку не е исто што и тоа. Но тоа потсетува дека нормите на професионалност се менуваат и се развиваат.

Во случајот со тетоважите и идентитетот, припадниците на генерацијата икс и милениумците помогнаа работното место да се ослободи од она што го сметаа за застарени правила. Сега, кога многумина од нив се тие што вработуваат, можеби би требало да се сетат на тоа и да покажат малку повеќе разбирање следниот пат кога кандидат од генерацијата зет опуштено ќе влезе на интервју за работа со ладно кафе.

.