Тајкун доби милиони продавајќи дел од колекцијата на чанти од „Хермес“

Милијардерот од Хонгконг, Џозеф Лау, продаде десетици претежно „Хермес“ (Hermes) чанти за 3,2 милиони долари на аукција на „Сотебис“ (Sotheby’s).

Наречен прв дел од „визионерската колекција на Џозеф Лау“, настанот беше најголемата продажба на чанти од еден сопственик на аукцискиот пазар во Азија. Дел од приходите ќе бидат донирани во добротворни цели, соопшти аукциската куќа, без да го открие процентот.

Во продажбата беа вклучени 76 чанти од „Хермес“ и една од „Шанел“. Меѓу продадените предмети се и шест дијамантски „биркин“ чанти и една исклучително ретка бронзена металик „кели“. Најскапaта меѓу нив била Bleu Jean Shiny Porosus Crocodile Birkin 25 од 2006 година со 18-каратно бело злато и дијамантски декорации, која собрала 1,52 милиони хонгоншки долари, според резултатите објавени на веб-страницата на „Сотебис“.

Лау купил повеќе од 1.500 чанти од „Хермес“ како подароци, а неговото семејство сè уште поседува над 1.000, рече претставник на тајкунот во изјава преку „Ватсап“ (WhatsApp), цитирајќи извори блиски до семејството.

Џозеф Лау Bloomberg

Поранешниот претседател на инвеститорот од Хонгконг, China Estates Holdings Ltd. е добро познат колекционер и продавач во светот на аукциите. 71-годишниот бегалец тајкун  ѝ купи на својата ќерка 12-каратен син дијамант за 48,6 милиони швајцарски франци (52,9 милиони долари) во 2015 година, што беше рекорд во тоа време. Лау поседува и добро познати слики, вклучувајќи ги „Мао“ (Мао) од Енди Ворхол и „Сè мора да помине“ (Everything Must Go) од Жан-Мишел Баскијат, кои планира да ги прикаже во неговата претстојна уметничка галерија во Лондон.

Лау има разместено најмалку 177 милиони долари во различни колекции од почетокот на 2020 година, вклучително и слика на Дејвид Хокни, кинески антиквитети и вино, според податоците собрани од „Блумберг“.

Тој има нето вредност од околу 6 милијарди долари, што е помалку за 2 милијарди долари од втората половина на 2021 година, според индексот на милијардери на „Блумберг“. Богатството на Лау главно произлегува од неговата и сопственоста на неговото семејство на комерцијални имоти и удел во China Estates. Намалувањето на нето-вредноста е поттикнато од продолжената криза на недвижностите на копното и пониските вреднувања на имотот во Хонгконг.

Лау беше осуден за поткуп и перење пари во Макао во 2014 година, но никогаш не отслужи затворска казна, без договор за екстрадиција меѓу територијата и Хонгконг.