„Ворнер брос дискавери“ (Warner Bros. Discovery Inc.) е блиску до договор за нова онлајн ТВ-серија базирана на „Хари Потер“, најпродаваната книга за млади, според две лица упатени во развојот на настаните.
Секоја сезона од серијата ќе се базира на една од седумте книги на Џ.К. Роулинг, посочуваат извори што побарале да останат анонимни бидејќи договорот не е официјално објавен.
Компанијата се надева дека серијата би можела да биде еден од темелите на новата стратегија за стриминг што следната недела ќе ја објави „Ворнер брос“, сопственик на „Ејч-би-о“ (HBO). Главниот извршен директор на компанијата, Дејвид Заслав, и шефот на „Ејч-би-о“ , Кејси Блојс, работеле на тоа да ја убедат Роулинг за продукција на нова серија, но договорот не е завршен.
Прочитај повеќе
Новото Ејч-би-о макс ќе понуди илјадници нови серии по иста цена
„Ворнер брос дискавери“ ќе додаде илјадници наслови од својата документарна програма со емисии од различни сфери на животот.
10.03.2023
Нетфликс и Ејч-би-о одлучуваат каде ќе биде вашиот следен одмор
Обожавателите се собираат на локациите на своите омилени серии и филмови во сè поголем број.
27.03.2023
Серијата ќе им овозможи на писателите да навлезат подлабоко во светот на книгите на Роулинг, од кои повеќето се со над 500 страници. „Ворнер брос“ претходно секоја од седумте книги ја претвори во филмски хит, што кулминира со филм во два дела базиран на последниот дел.
„Ворнер брос“ сака да направи повеќе со една од најпродаваните серии на книги на сите времиња. Иако Роулинг го даде својот благослов за адаптација на театарска претстава и тематски забавен парк, таа допрва треба да потпише согласност за нови филмови или ТВ-серии.
Портпаролот на „Ворнер брос“ одби да коментира.
Авторката ќе биде вклучена во серијата за да се осигури дека таа ќе остане доследна на изворниот материјал, но нема да ја надгледува продукцијата секој ден, а нема да биде ниту главен креатор, велат изворите. Роулинг одвреме-навреме предизвикува контроверзии со забелешки за транс-заедницата.
„Ворнер брос“ се подготвува да објави нова стратегија за стриминг, вклучувајќи го и името „Макс“ (Max) за својот водечки онлајн сервис, кој дебитира како „Ејч-би-о макс“. Клучни за таа стратегија ќе бидат новите содржини, особено филмовите и ТВ-емисиите базирани на приказни и ликови што гледачите веќе ги знаат.
Филмови од повисок калибар
„Ворнер брос“ има богата колекција на програми што одговараат на барањата, вклучувајќи го и „Роулинг визардинг ворлд“ (Rowling's Wizarding World), материјал како „Господарот на прстените“ и лига на суперхерои како Бетмен, Супермен и Вондер Воман.
Заслав одлучи дека сака да инвестира во помалку филмови и ТВ-емисии, а оние што ги произведува компанијата да бидат од повисок калибар. Во февруари тој најави дека компанијата ќе сними нова серија филмови базирани на „Господарот на прстените“, иако деталите допрва треба да се разработат.
Џ.К. Роулинг
Bloomberg
Брендот „Хари Потер“ создаде голем број успешни производи и спиноф-продукции. Во соработка со „Аваланч софтвер“ (Avalanche Software) од Солт Лејк Сити, „Ворнер брос“ во февруари ја објави долгоочекуваната „Хогвортс Легаси“ (Hogwarts Legacy), видеоигра базирана на светот на Потер.
Серијалот исто така резултираше и со сценска продукција.
Но самите книги и седумте филма имаа најголемо влијание. Според американскиот издавач „Сколстик“ (Scholastic Corp.), серијата на книги е продадена во 600 милиони примероци на 85 јазици во текот на 25 години, станувајќи бестселер на сите времиња.
Осумте филма базирани на серијата заработија повеќе од 7,7 милијарди долари низ светот, според „Бокс офис Моџо“ (Box Office Mojo).
.webp){kind=icon}