.webp){kind=icon}
Нето-богатството на Бернард Арно за првпат надмина 200 милијарди долари, со што стана само третата личност што досега го достигнала тоа ниво на богатство.
Богатството на францускиот тајкун што стои зад моќната куќа за луксузни стоки ЛВМХ (LVMH - Moët Hennessy Louis Vuitton) се зголеми за 2,4 милијарди долари, на рекордни 201,1 милијарда во вторникот, според индексот на милијардери на „Блумберг“. Тој им се придружи на Илон Маск и Џеф Безос како единствени поединци чие богатство надминало 200 милијарди долари и стана првиот човек надвор од САД што го направил тоа.
Во декември 74-годишниот Арно за првпат го надмина Маск како најбогат човек на светот. Неговата империја ЛВМХ се држи подобро од богатството во технолошкиот сектор, кој доминира на листата на „Блумберг“ за 500 најбогати луѓе во светот. Неговото богатство порасна за 39 милијарди долари годинава бидејќи побарувачката за луксузни стоки останува отпорна.
Bloomberg Mercury
Цената на акциите на ЛВМХ е на рекордно високо ниво благодарение на минатомесечната најава дека компанијата ќе откупи дури 1,5 милијарда евра сопствени акции. Минатата година ЛВМХ оствари рекордни 79,2 милијарди евра во продажба, а приходите на нејзиното „златно јајце“ - „Луј Витон“ (Louis Vuitton), кој во февруари го назначи музичарот Фарел Вилијамс за нов дизајнер на машка облека, надминаа 20 милијарди евра.
Инвеститорите ќе можат да видат колку е силна побарувачката за брендовите „Диор“ (Dior) и „Тифани“ (Tiffany) на ЛВМХ кога групата ќе ги објави резултатите од продажбата за првиот квартал од оваа година подоцна во текот на месецов.
Една неодамнешна неофицијална анкета на „Блумберг“ во која учествува претставници од оддели за спојување и преземање, менаџери на фондови и аналитичари покажа дека очекуваат групата на Арно да ги преземе ривалите во конкурентна средина, што е тешко за помалите компании.
