.webp){kind=icon}
Откриваме еден малку познат факт: Оние што поседуваат само една акција од одредени туристички компании имаат право на моментални поволности што многу ја надминуваат цената на нивната инвестиција.
Замислете го тоа како алтернативна верзија на програма за лојалност, онаа во која ја следите филозофијата на Ворен Бафет за купување акции во компанија што ја сакате. Со „Ројал Карибијан“ (Royal Caribbean Cruises Ltd) тоа во последно време чини околу 109 долари по акција; со хотелите „Мелија“ (Melia Hotels International) е нешто под 10 долари. Тоа номинално купување може да отклучи спектар погодности, кои се движат од 1.000 долари на одредени крстосувања до моментален сребрен статус.
Инвестициите обично не се прават за награди или поволности, и навистина ова е време кога инвестирањето во поголеми компании во туристичката индустрија може да дојде со значителен ризик. Според анализата на „Блумберг интелиџенс“, акциите на американските авиокомпании имаат полош резултат од S&P 500, при што побарувачката за домашни и деловни патувања „опаѓа“, додека повисоките каматни стапки и геополитичките тензии го задушуваат растот на европските туристички брендови. Во врска со хотелите, аналитичарите велат дека истите геополитички стравови и дополнителни ризици за трошоците ќе ги намалат глобалните патувања во 2024 година. Меѓутоа, компаниите за крстосување покажаа изненадувачка отпорност по пандемијата, а „Блумберг интелиџенс“ наведе дека продажбата во 2023 година била 15 отсто повисока од врвот во 2019 година, „и покрај оддалечувањето на овој сектор од Блискиот Исток и слабата економија“.
За компаниите, поволностите се лесен начин да ги привлечат на инвестирање оние што инаку би биле многу резервирани. „Готовината е секогаш крал, особено кога станува збор за компании што сè уште закрепнуваат од пандемијата“, вели Џоди Лури, аналитичарка на „Блумберг интелиџенс“ што ги покрива сместувањата, додавајќи дека во последните години акумулацијата на готовина и лојалноста на клиентите се клучни прашања, особено за компаниите за крстосување. А за потрошувачите - особено оние што им се веќе лојални на овие брендови - комбинирањето на придобивките за акционерите со погодностите од програмата за лојалност може да создаде атрактивен мултипликативен ефект, каде што е можно.
Како и со сите работи, за акционерите не се еднакво вредни сите програми со погодности - а некои, всушност, воопшто не се добра понуда. Откриваме 10 зделки за кои вреди да се знае кога станува збор за хотелите, крстосувањата и авиокомпаниите - заедно со преглед колкава вредност навистина можат да донесат тие погодности. Во некои случаи можеби ќе најдете побрз пат до своите цели за одмор во 2024 година.
Хотели
„Акор СА“ (Accor SA), најголемата хотелска компанија во Европа, им нуди моментален елитен статус на сите што имаат само 50 сопственици на акции или една регистрирана акција, која во декември се тргуваше по околу 32 евра. Тоа е мала цена за златен статус, кој обично бара престој од 30 ноќевања во текот на календарската година во хотелите на оваа компанија. Статусот може да биде драгоцен: дава надградба за собите, доцно одјавување и подароци за добредојде за гостите во кој било од хотелите на „Акор“ - кој има 53 бренда, вклучувајќи и многу познати, како што се „Фермонт“ (Fairmont), „Софител“ (Sofitel) и „Рафлс“ (Raffles).
За да добиете чувство за повратот што може да го очекувате од таа инвестиција од 32 евра - да не ги спомнуваме неколкуте дополнителни што може да ги заработите од една акција - замислете дека имате резервирано седумдневен одмор во Сингапур, престојувајќи во легендарниот хотел „Рафлс“. Ако златниот статусот значи надградба од државен апартман во соба во блок со градина, тоа може да претставува вредност од 500 долари во текот на тоа патување.
Единствената друга голема хотелска компанија што има ваква програма се хотелите „Интерконтинентал“ (InterContinental Hotels Group PLC), која на квалификуваните акционери им нуди попуст од 20 отсто на „флексибилните“ цени на собите. Таа опција, сепак, доаѓа со многу попребирливи услови - достапна им е само за оние што поседуваат најмалку 100 акции од компанијата, а моменталната цена на акцијата е 6.337 фунти (80 долари) - што ја прави помалку препорачлива.
Хотелот Интерконтинентал Париз Ле Гранд, во областа опера во градот. Фотограф: Анита Пушард Сера/Блумберг
За најдобрите понуди, свртете се кон помалку познатите светски брендови. На пример, хотелот „НХ груп СА“ (NH Hotel Group SA) со седиште во Шпанија, сега дел од брзорастечките хотели „Минор“ (Minor Hotel Group Co Ltd), нуди пат до елитен статус во рамките на програмата за лојалност „НХ дискавери“ (NH Discovery). Нивото на остварениот статус варира во зависност од вложениот износ. Доволно е да купите само една акција за околу 4 евра за да добиете златен статус; потребни се повеќе од 2.000 евра во акции за да се добие платина и околу 3.000 евра за да се добие врвниот титаниумски статус.
Новостекнатиот статус е многу полесен за користење отколку што мислите. Покрај тоа што е валиден на повеќе од 350 локации на НХ во светот, вклучувајќи го и неодамна отворениот „НХ колекшн Њујорк“ (NH Collection New York Madison Avenue) - каде што собите се уредени со многу поголем вкус отколку што би сугерирала нивната цена од 210 долари за ноќ - тој статус исто така важи и за стотици хотели во рамките на Глобалната хотелска алијанса. Тоа може да ви донесе доцно одјавување, надградба за двокреветна соба и подарок за добредојде во брендови како „Анантара“ (Anantara), „Лела“ (Leela), „Кемпински“ (Kempinski) и „Вицерој“ (Viceroy). Иако можноста за остварување бенефиции за овие поволности зависи од достапноста, тие можат да донесат неверојатен поврат на инвестицијата: резервацијата за супериорна вила над вода во ресортот „Анантара“ на Малдиви (670 долари за ноќ) може да биде надградена, можеби на вила со океански базен (931 долар за ноќевање), што носи бенефиција од 1.827 долари за еднонеделно патување.
Хотелот „Мелија“, уште еден шпански бренд, на сличен начин им доделува елитен статус на своите акционери. Со поседувањето барем една акција (приближно 6 евра претходно во декември) добивате сребрен статус. Илјада акции купуваат златен статус, а врвниот платинест статус е резервиран за оние што имаат најмалку 10.000 акции.
Крстосувања
Карневалски брод за крстарење, во пристаништето Њу Орлеанс. Фотограф: Лук Шарет/Блумберг
Три линии за крстосување имаат слични програми: „Карнивал“ (Carnival Corp.), „Норвежијан крузлајн“ (Norwegian Cruise Line Holdings Ltd.) и „Ројал Карибијан“ (Royal Caribbean Cruises Ltd.). За секоја од нив придобивките започнуваат со поседување 100 акции, а она што го добивате варира во зависност од должината на вашето крстосување; во повеќето случаи би било потребно повторно крстосување, идеално на подолги маршрути, за придобивките да бидат поголеми од купувањето на акциите.
„Карнивал“, кој се состои од истоимениот бренд и осум други линии за крстосување, вклучувајќи ги „Кунард“ (Cunard Line Ltd) и „Сибурн“ (Seabourn), нуди дури 250 долари кредит за пловидба од најмалку 14 дена. Кредитот изнесува 50 долари за пократки крстосувања на оваа компанија. Цената на нивните акции претходно во декември беше 15 долари.
„Норвежијан крузлајн“ нуди слични кредити: 250 долари за патување од најмалку 15 дена и 50 долари за шест дена или помалку. Програмата на „Норвежијан“ се однесува и на партнери како што се „Океанија“ (Oceania) и „Реџент севн сис“ (Regent Seven Seas). Нивната акција беше 15 долари.
„Ројал Карибијан“ го следи примерот со истите бенефиции на своите пловидби како и партнерските брендови „Селебрити“ (Celebrity) и „Силверси“ (Silversea). Доколку одите на едно од нивните светски крстосувања, кое може да трае од три до шест месеци и да посетите десетици земји, кредитот на бродот се зголемува на 1.000 долари. Но компанијата има многу повисока цена за акциите, кои во последните недели скокнаа од 89 на 109 долари.
Авиокомпании
Авиони на АНА на аеродромот Ханеда во Токио. Фотограф: Тору Ханаи/Блумберг
Придобивките за акционерите се помали меѓу авиокомпаниите и главно непостојни кај американските превозници. Аналитичарот на авиоиндустријата од „Блумберг интелиџенс“, Тим Бахус, вели дека (минливи) можности може да се најдат при иницијални јавни понуди на акции на авиокомпаниите, наведувајќи ја „Ер Азија Х“ (AirAsia X) како понов пример.
Подолгорочни понуди може да се најдат меѓу меѓународните брендови на авиокомпании. На пример, жителите на Јапонија можат да ги искористат бенефициите за акционери во двете најголеми авиокомпании во земјата, „АНА холдингс“ (ANA Holdings Inc) и „Јапан ерлајнс“ (Japan Airlines Co Ltd). Двете авиокомпании нудат иста понуда: ваучери за домашни летови со 50 отсто попуст со купување најмалку 100 акции. Колку повеќе акции имате, толку повеќе ваучери добивате. (Цената на акциите беше 3.045 јени и 2.802 јени за АНА и за „Јапан ерлајнс“, односно 21 и 19 долари, на почетокот на декември).
САС АБ (SAS AB), националната авиокомпанија на Данска, Шведска и Норвешка, има слична програма за оние што купуваат нивни акции котирани на берзата Насдак Стокхолм, каде што една акција моментално вреди околу 0,29 долари. Ако имате најмалку 4.000 акции, имате право на специјални понуди со попусти, но вистинските придобивки доаѓаат само кога поседувате 100.000 акции - доволно за да стекнете златен статус во нивната програма за лојалност „Евробонус“. Тој статус автоматски го отклучува златниот статус во „Стар алијанс“ и доаѓа со поволности како што се пристап до клубот „Јунајтед“ кога летате во САД со „Јунајтед“, пристап до салоните кога летате на меѓународно ниво (без оглед на класата), приоритетно пријавување на лет и дополнително дозволено количество за багаж.
Едно предупредување: Се очекува авиокомпанијата да ја напушти „Стар алијанс“ и да му се приклучи на „Скајтим“ во 2024 година и моментално е во процес на банкрот. Двата факта предизвикуваат неизвесност дали програмата ќе опстане. (Главните директори досега молчат за ова прашање.) Дури и ако останат поволностите за акционерите, постојат поевтини начини да се стигне до истиот статус со летање со самата компанија. На пример, патувањето со 45 повратни лета во Скандинавија ќе ве доведе до истиот статус (кој обично чини околу 4.000 долари).
На крајот, она што важи за САС важи и за многу други понуди: Придобивките се големи, но вредат само како дополнителна предност за инвестицијата што веќе сте планирале да ја направите.
