.webp){kind=icon}
Подемот на вештачката интелигенција го прави технолошкиот сектор најатрактивен за инвеститорите и во 2024 година. Првиот човек на „Вега фондови“, Сашо Дракуловски, во интервју за „Блумберг Адрија“ вели дека технолошките акции изминатава година имале големи приноси, а се очекува да останат тренд и годинава.
„Секторските фондови што беа изложени најмногу во технолошкиот сектор дефинитивно беа убедливи победници. Значи, 2023 година за сите технолошки фондови во целиот свет, а исто така и за нашиот ’Вега технологија’, имаше исклучителен принос, кој беше приближно 63 отсто за изминатата година. Додека на почетокот од годинава имаме раст од околу 12 отсто во тој фонд, а тоа се должи на растот на овие технолошки гиганти и самата вештачка интелигенција, која е сега во тренд. Голем дел компании се бркаат меѓу себе кој ќе направи подобра или, да речеме, поприродна вештачки интелигенција, а на тој начин нивните цени растат нагоре, како и нивните приходи, па почетокот од годинава исто така најавува дека и оваа година ќе биде технолошка година. Технолошките акции дефинитивно се убедливи победници во последнава година“, вели Дракуловски.
Блумберг Адрија ТВ
Покрај технолошкиот сектор, како атрактивен сектор за инвестирање Дракуловски ја посочува и фармацијата, осврнувајќи се на лековите за слабеење.
„Тука би ги навел и оние вложувања или да ги кажеме фармацевтски гиганти што во последниве неколку месеци имаат борба помеѓу себе кој ќе направи подобри лекарства против дебелина и на тој начин ќе генерираат огромни приходи. Јас очекувам оваа година исто така да биде нивна, да има борба меѓу фармацевтските гиганти кој ќе направи подобар продукт против дебелина, таа модерна болест од која особено во овој модерен свет, Америка и Европа, се очекуваат големи приходи, а врз база на тоа и раст на самите цени на нивните акции“, вели Дракуловски.
Блумберг Адрија ТВ
Во однос на растот на пазарот на инвестициските фондови во Македонија, чија вредност на нето-средствата во последниот квартал лани бележеа годишен раст од 21,7 процент, Дракуловски вели дека причина се новите уплати на средства од нови клиенти и порастот на приносите.
„Нашите фондови имаа одличен раст во 2023 година, сличен раст најавува и почетокот на 2024 година. Растот на самата нето-вредност на сите фондови, генерално, е поради нови клиенти и растот на самите портфолија во нашите фондови. Кога се спојуваат овие два фактора, ние сме најсреќни, бидејќи имаме и нови уплати и раст на портфолијата. Дефинитивно, секоја криза е шанса. Нашите инвеститори го искористија периодот на кризниот период во изминативе години, кој беше шанса за вложување во инвестициски фондови“, вели Дракуловски.
Блумберг Адрија ТВ
На прашањето, пак, како да се структурира едно инвестициско портфолио и добро да се управува со ризици во неизвесни времиња, Дракуловски ја истакнува диверзификацијата во пласманот на средствата.
„Секој фонд си има своја различна инвестициска стратегија, така што за да се направи избалансирано помалку ризично портфолио мора да се направи дисперзија, диверзификација на сите средства, а на тој начин се прави дисперзија – регионална, валутна, акциска и компаниска. Бидејќи секогаш не се вложува само во еден сектор или во еден регион или во една валута, кога се избира конкретна акција се избираат повеќе хартии од вредност. Самиот наш закон вели дека ние можеме максимум десет отсто да бидеме изложени во една хартија и на тој начин ние правиме дисперзија на едно портфолио од 30-40 хартии што се дел од самиот фонд“, вели главниот извршен директор на „Вега фондови“.
