Најпозната е како пејачка со експлозивен глас, која продаде повеќе од 50 милиони плочи и освои две награди „греми“, и како актерка со десетици улоги на телевизија, вклучувајќи ја и нејзината комедија од 1990-тите „Надвор цела ноќ“ (Out All Night). Но, во последно време, Пети Лабел - позната и како „кума на душата“ (и вистинска кума на Мараја Кери) - е еднакво посветена на нејзиниот бизнис со храна.
Во 2007 година, Лабел ја основа „Петис гуд лајф“ (Patti's Good Life), нудејќи оброци од макарони и сирење до колачи со слатки компири. Таа вели дека продажбата пораснала за околу 12 отсто минатата година, на повеќе од 200 милиони долари. „Знаев дека ќе пеам цел живот“, вели Лабел. „Но никогаш не знаев дека ќе имам бренд за храна. Прекрасно е“.
Нејзината љубов кон готвењето започнала уште како дете, кога во семејната гаража правела пикантен кечап. Дури и кога стана ѕвезда, продолжи да приготвува многу оброци, и дома и на турнеја. Во изминатите шест децении таа приготвуваше храна за легендарни личности, како што се членовите на „Ролинг стоунс“, Елтон Џон, Принс, Синди Лопер и Ричард Прајор. И кога ќе дојдеше време за вечера, гордо го пишуваше своето име на послужавникот. „Сакав да знаат дека храната ја приготвувам со љубов и дека тоа не е нешто што доаѓа од угостителските компании“, вели таа.
Охрабрена од пријателите од светот на забавата, семејството и менаџерите, пред 15 години таа решила да ѝ ги понуди своите креации на пошироката јавност. Нејзината компанија започна како линија на зачини, како сосови за скара (инспирирани од детските експерименти со кечап), а се прошири во „храна за удобност“, како кељ и пилешко, бисквити, како и десерти - пити и колачи според нејзините рецепти.
Во 2015 година брендот доби поттик кога пејачот Џејмс Рајт ја пофали на Јутјуб нејзината торта со слатки компири, видео што собра повеќе од шест милиони прегледи. „Ќе бидеш Пети откако ќе го изедеш ова“, рече тој, уживајќи во залак и испраќајќи песна во нејзиниот ритам.
Bloomberg
Брендот е достапен во стотици малопродажни продавници низ САД, вклучувајќи ги „Таргет“ и „ „Волмарт“, како и онлајн. „Волмарт“ тврди дека нејзината пита со слатки компири и макарони и сирење ќе генерираат повеќе од 80 милиони долари во продажба во 2022 година. Минатата есен таа се поврза со Карди Би за да го направи омилениот десерт на раперката „whipshots“ (крем со алкохол). Годинава таа планира да додаде нови замрзнати оброци, десерти и готови оброци за појадок, вклучувајќи палачинки и сируп без шеќер приспособени на луѓето со дијабетес, состојба што ѝ била дијагностицирана во 1994 година.
Џаред Вотсон, доцент по маркетинг на школата за бизнис во Њујорк, вели дека „Петис гуд лајф“ покажува како познатите личности можат подобро да се поврзат со своите обожаватели. „Убавината на брендот во сопственост на славни личности е тоа што тие имаат клиентела што сака да слуша од нив“, вели Вотсон. Но тој предупредува дека познатите личности треба да се погрижат екстензиите на брендовите да рефлектираат кои се тие навистина и да избегнуваат да додаваат производи што премногу отстапуваат од она што го очекуваат обожавателите. „Како што растат брендовите, лесно е да се понудат генерички алтернативи што ја намалуваат вредноста“, вели Вотсон, која признава дека ја сака својата торта со сладок компир. „Петис гуд лајф“, како и секој славен бренд, може да ја изгуби душата што ја привлекува неговата целна публика.
Лабел и нејзиниот син Зури Едвардс поседуваат 100 отсто од брендот, кој Едвардс го води заедно со соосновачот Чарлс Суит и деловниот партнер Алекс Томпсон. Компанијата не поседува производствени капацитети; тие купуваат готови производи од доставувачи што ги приготвуваат рецептите на Лабел.
Во 2018 година Лабел ја лансира консултантската фирма ЗПАЦ (ZPAC), за да им помогне на бизнисите во сопственост на жени и на луѓе од црната раса да ги пренесат нивните производи кај големите трговци на мало. Фирмата неодамна му помогна на „Бруклин шоп“ (Brooklyn Chop House & Grocer), познат по своите стекови и азиска кујна, да ги пласира своите производи во 1.000 продавници на „Волмарт“ низ САД. „Беше неверојатно да се работи со легендарната Пети Лабел“, вели Роберт Дон Пу Камингс, сосопственик на компанијата. „Нејзините кулинарски вештини се над сè што можев да замислам“.
На 79 години, дури и со успешна компанија за храна, Лабел вели дека не планира да се повлече од музиката. „Колку повеќе работам, толку се чувствувам помладо“, вели таа. „Староста никогаш не смее да ги блокира вашите благослови“. И додека се фокусира на храната и има намера да изгради наследство што може да им го пренесе на своите внуци, таа сè уште ги изведува своите хитови на распродадени места и работи на албум што ќе биде објавен годинава. „Им се восхитувам на луѓето што доаѓаат на моите концерти“, вели таа. „Не станува збор за парите, бидејќи не ми требаат, туку треба да пеам. Треба да бидам на таа сцена“.
.webp){kind=icon}
