.webp){kind=icon}
Партнерството на ЛВМХ со Олимпијадата во Париз е повеќестрано. Неколку иконски бренда играат важна улога за да осигурат француската „експертиза“ (savoir-faire) да блеска во клучните моменти од претстојната свеченост во Париз. Од медалите изработени од метал од Ајфеловата кула до факлите и опремата на разни француски тимови.
Покрај креативното спонзорство, во рамките на партнерството, ЛВМХ обезбедува директна поддршка за спортистите чии извонредни достигнувања ги прават „уметници на сите победи“, се наведува на официјалната веб-страница на компанијата. По пливачот Леон Маршан, петкратен светски шампион и рекордер на 400 метри, како и четирикратната европска шампионка во уметничка гимнастика Мелани де Хесус дос Сантос, на семејството ЛВМХ за брендот „Луј Витон“ му се приклучија мечувалецот Енцо Лефор и Антоан Дипон, член на француската репрезентација во рагби.
Бернард Арно сака да добие вредност за своите инвестиции. Тоа го покажа со многу амбициозни аквизиции, од кои една од најголемите е преземањето на „Тифани“. Компанијата инвестира 150 милиони евра во Олимпијадата. Преговорите за премиум спонзорство траеја четири години. Сепак, дали оваа инвестиција ќе му донесе злато на најголемиот луксузен конгломерат во светот?
„Да се стане не само спонзор туку и она што компанијата го нарекува ’креативен партнер’ на Олимпијадата 2024 и она што се гледа како национална презентација да се претвори во луксузна реклама, носи одредени ризици“, се наведува во текстот на „Њујорк тајмс“.
Пред сѐ се споменува отпорот на парижаните на ова инсистирање на луксуз во време кога се изложени на сообраќаен метеж и зголемен ризик за безбедноста. Потоа, тука е целата приказна околу Сена, која беше премногу валкана поради, како што рекоа официјалните лица, невообичаено обилните дождови што предизвикаа отпадни води да завршат во реката. Сена долго време има лоша репутација во врска со чистотата, а пливањето во реката е забрането - барем официјално - уште од 1923 година.
Дали би пливале во Сена?
Bloomberg Mercury
Во знак на незадоволство, некои локални жители се закануваа дека ќе ја користат реката како јавен тоалет дента кога Ана Идалго, градоначалничката на Париз, планираше да плива во Сена за да докаже дека водата е чиста. На 17 јули градоначалничката сепак пливаше во Сена. Пред неа истото тоа го ветуваше поранешниот претседател Жак Ширак во 1988 година, но сепак не го нарави тоа.
Во надеж дека учесниците ќе го нарават тоа, градските власти и државата одвоија 1,4 милијарда евра, наведува „Блумберг“, за чистење на водниот систем што минува низ најгусто населената европска градска област.
Планот е 55 машки и 55 женски триатлонци да скокнат од пловечки понтон во подножјето на мостот „Александар III“ на 30 и 31 јули. Откако ќе испливаат 1,5 километар, планирано е да возат велосипед по познатите улици како Елисејските полиња, булеварот Сен Жермен, па дури и покрај Националното собрание. Трката ќе заврши на истото место по четири тркачки круга низ срцето на Париз. Околу една недела подоцна маратонските пливачи ќе скокаат од истото место.
„Луксузирање“ на светот преку спортот
Уште пред Олимпијадата, градот имаше своевидна проба за голем број посетители преку серија концерти на Тејлор Свифт. Настанот, кој беше мал дел од она што се подготвува за Олимпијадата, донесе повеќе американски посетители во градот отколку што тогаш се предвидуваше за Олимпијадата, како што пишувавме претходно. Нејзината турнеја донесе поттик за многу бизниси, а за Олимпијадата се очекува многу повеќе.
По серијата од пет олимписки игри одржани надвор од најголемите светски медиумски пазари - Европа и САД, враќањето во Париз изгледа како обновена надеж за гламурозниот свет на луксузните брендови.
Арно рече: „Управувањето со стартап или дури и поголема компанија не се разликува многу од животот на спортист на највисоко ниво“. И навистина, наместо со модни писти и познати филмски и други престижни настани, „луксузирањето“ на светот сега се одвива преку спортот. И тој го користи тоа. Причината е јасна: спортските настани привлекуваат милиони следбеници.
Фарел Вилијамс, уметнички директор на „Луј Витон“, и Хелен Ласичан, модна дизајнерка, пристигнуваат на вечера во Елисејската палата.
Bloomberg/Nathan Laine
Без сомнение, ЛВМХ ќе биде многу видлив за време на свеченото отворање, кое трае четири и пол часа. Се проценува дека само овој настан ќе го следат 1,5 милијарда луѓе. Бројот на посетители за време на самите Игри се проценува на меѓу 1,34 и 1,85 милиони посетители. Математиката на спонзорството, значи, станува појасна.
Сепак, одлуката на Тикток да го спонзорира британскиот олимписки тим потсетува на афинитетот на помладите генерации, кои се посклони да консумираат видеа од 30 секунди за Олимпијадата наместо да седат и да гледаат спорт на традиционалната телевизија.
Сепак, ќе почекаме да видиме колку ќе се исплати вложувањето на ЛВМХ во гламурозни игри.
Bloomberg Mercury
Доколку во последен момент одлучите да одите во Париз...
• Некои луѓе се прашуваат како воопшто да набават билети - а одговорот е едноставен. Официјалната страница за продажба на билети за Париз 2024 сè уште има билети за продажба и продолжува да ги објавува во текот на денот. Цените на билетите започнуваат, неверојатно, од само 15 евра.
• Цените во хотелите и за изнајмување станови започнаа спектакуларно високо, со хотелиери и сопственици на недвижности што сонуваа за можен прилив на гости и пари. Во последните месеци и двете категории ги намалија своите цени, при што цените за изнајмување за луксузниот викенд ги намалија за 60 отсто. Овде можете да видите некои препораки.
• В петок во Париз ќе биде близу 30 Целзиусови степени, на денот на церемонијата на отворање, а потоа на почетокот на следната недела ќе биде уште потопло, според синоптичарите од „Ведр сервисис интернешнал“ (Weather Services International). Овде можете да најдете неколку решенија за освежување во градот.
• Доколку не сте страстен обожавател на Олимписките игри, можете да ги пребарувате уличните дела на францускиот Бенкси или да му се посветите на стариот пријател, кој наскоро ќе биде сосема нов: катедралата „Нотр Дам“. Иако таа нема да биде отворена навреме за Игрите, како што беше планирано, светлата ќе бидат повторно вклучени до крајот на годината, што ќе ви даде уште една причина да планирате патување во Париз.
