За време на пандемијата и по нејзиното завршување, буџетите за корпоративни подароци почнаа вртоглаво да растат, а тој тренд сѐ повеќе го следат и компаниите од регионот Адрија. Пазарот на корпоративни подароци е проценет на 892,4 милијарди долари во 2024 година, а се предвидува да достигне вредност од 1.686,14 милијарди долари до 2032 година. И покрај неверојатниот раст на оваа индустрија, дури 80 отсто од подароците завршуваат на депонија, па изборот е многу важен.
Подароците се огледало на деловниот имиџ и постојат посебни правила што мора да се знаат и да се почитуваат. Експертите велат дека со подарокот компанијата суптилно испраќа порака што мисли таа за својот деловен партнер и колку навистина ѝ значи соработката. Подарокот може да се протолкува на различни начини, па затоа тој треба добро да се осмисли. Особено е важно да се направи разлика меѓу подарок и рекламен материјал.
„Ако на предметот стои логото на вашата фирма и тоа доминира, бидете сигурни дека другата страна нема да го користи. Тоа не е подарок, туку промоција на вашата компанија. Роковници, календари, чадори или пенкала на кои е втиснато вашето лого не се подароци и не очекувајте дека луѓето ќе ги доживуваат така. Ако добиете десет чадори на кои со огромни букви пишува име на друга фирма, голема е веројатноста тој предмет никогаш да не биде употребен“, вели д-р Лукреција А. Маљковиќ, меѓународна консултантка за корпоративен и дипломатски протокол.
Д-р Лукреција А. Маљковиќ, меѓународна консултантка за корпоративен и дипломатски протокол
Studio Meteor
Ако произведувате одредени производи, на пример храна, Маљковиќ појаснува дека секогаш можете да подготвите убава кошница со вашите производи. Доколку, пак, сакате да подарите пијалак, никогаш нема да погрешите со вина произведени од локални сорти темјаника или вранец. Според неа, секогаш добар подарок е и оној што ја претставува државата, на пример артефакт, слика или монографија, а секој ќе се израдува и на некакво техничко помагало или предмет што може да го изложи во канцеларија. Ако лицето има хоби, подарок поврзан со тоа би бил прекрасно изненадување.
Маљковиќ за „Блумберг Адрија“ советува и кои подароци би биле протолкувани како несреќен избор, особено за новогодишните празници.
„Никогаш не се подарува подарок што навлегува во интимата и приватната зона на лицето, затоа заборавете на парфеми и накит. Мора многу да сте претпазливи и со подароците што сакате да бидат хумористични“, нагласува таа.
Парфемот, сепак, оставете го како приватен подарок
Depositphotos
Треба да се внимава и на новата деловна етикеција, па во пораката треба да стои „среќни празници“, наместо да се честита Божиќ или Нова година.
Поскапо или поскромно? Што е најважно?
Особено треба да се води грижа за судирот на интереси и законските прописи, кои се различни од земја до земја. Доколку се подарува на лице од друга култура, треба да се има предвид дека нешто што за нас е типично, за другите можеби не е.
„Ние сме многу великодушни како народ и честопати подаруваме подароци што се со повисока вредност, што другата страна може да го протолкува како поткуп, па дури и да се случи да ни го врати“, предупредува Маљковиќ.
Овде логично се наметнува и прашањето колку подарокот може навистина да ги зајакне деловните врски. Нашата соговорничка советува да им подарувате на оние со кои веќе имате изградено цврста деловна конекција и да имате евиденција на примени подароци за да можете соодветно да возвратите. Тоа не значи дека подарокот треба да се смета како залог дека другата страна треба да направи нешто за нас како одговор на дарувањето. Сепак, доколку вие упорно подарувате, а не добивате подарок од другата страна, време е да размислите зошто е тоа така.
Скапите подароци можат да бидат контрапродуктивни. Слаткиот вкус, ако е одмерен, отвора многу врати
Depositphotos
„Подарокот секогаш треба да е завиткан и задолжителна е картичка, но не бизнис-картичка. Напишете рачно од кого е, напишете ја вашата лична желба. Бизнис-картички на кои нема напишано ништо или стои само нечитлив потпис се неприфатливи“, вели таа.
За крај, Маљковиќ објаснува дека е легитимно секоја компанија да има различни подароци за различно ниво на соработка - поскапи подароци за менаџментите, поскромни за луѓето што се во административните служби, но најважно е да ги испочитувате сите со кои работите.
„Службеничката што секогаш ви ги завршува документите навреме заслужува исто внимание како и нејзиниот директор, затоа не заборавајте дека една обична шолја за кафе или чај, која убаво ќе ја завиткате, може многу да ѝ значи“, завршува таа.
.webp){kind=icon}
Во моментов нема коментари за веста. Биди прв да коментира...