„Анора“ изненадувачки издоминира на „Оскарите“

„Анора“, драма за сексуална работничка што се мажи за синот на руски олигарх, ја освои наградата за најдобар филм на доделувањето на „оскарите“ синоќа во Лос Анџелес.

Филмот, кој го дистрибуира независната куќа „Неон“, имаше шест номинации, а освои пет награди. Режисерот Шон Бејкер доби признанија за режија, монтажа и најдобро оригинално сценарио, додека младата ѕвезда Мики Медисон, првпат номинирана за „оскар“, ја освои наградата за најдобра актерка во главна улога.

Творештвото на Бејкер често се фокусира на животите на луѓето на маргините. Меѓу неговите претходни филмови е „Проектот Флорида“ (The Florida Project), приказна за самохрана мајка и нејзината ќерка што преживуваат во сенката на Дизниевиот свет.

„Анора“ од својата премиера во октомври оствари заработка од 40,9 милиони долари на благајните. За споредба, минатогодишниот добитник на „оскар“ за најдобар филм, „Опенхајмер“ од студиото „Јуниверзал“, заработи речиси милијарда долари и освои седум награди.

Церемонијата започна со музички настап на Аријана Гранде и Синтија Ериво, ѕвездите на филмот „Злобница“ (The Wicked), кои изведоа неколку песни, вклучувајќи ја и „Over the Rainbow“ од филмот „Волшебникот од Оз“.

Еден од настапите за кои најмногу се зборува се излегувањето на сцената и говорот на Адријан Броди, кој го освои „оскарот“ за најдобар актер за улогата во филмот „Бруталист“. Имено, актерот, кој го доби својот втор „оскар“ (првиот го доби на само 29 години за улогата во филмот „Пијанист“), при излегувањето на сцената, сфаќајќи дека џвака мастика, ѝ ја фрли на својата партнерка Џорџина Чапман. Покрај тоа, неговиот говор беше предолг, па режијата со музика се обиде да нагласи дека е време за крај. Сепак, Броди не даде да биде прекинат, велејќи: „Знам што значи ова, ќе завршам наскоро, не ми е ова прво родео...“. Во филмот тој ја толкува улогата на Ласло Тот, измислен лик, инспириран од неколку вистински архитекти и дизајнери, вклучувајќи ги Марсел Бројер, Пол Рудолф и Лудвиг Мис ван дер Рое. Тот е унгарски архитект со еврејско потекло, кој по холокаустот се бори да го најде своето место како емигрант во САД. Но работите не одат баш по планот... Филмот на независното студио A24 исто така беше награден за најдобра музика.

Зои Салдана не ги криеше емоциите во говорот за благодарност Фото: Bloomberg Mercury

 

Зои Салдана го освои „оскарот“ за најдобра споредна актерка за улогата во филмот „Емилија Перез“, продукција на „Нетфликс“. Салдана, најпозната по улогите во научнофантастични филмови како „Аватар“ и „Чувари на галаксијата“, беше наградена за улогата на адвокатка што му помага на главниот лик да го промени родовиот идентитет. Во емотивниот говор на благодарност, за време на кој неколкупати заплака, рече дека е „гордо дете на имигрантски родители“ и првата актерка од доминиканско потекло што освоила „оскар“.

Киран Калкин го освои „оскарот“ за најдобар спореден актер. Поранешното дете актер, чија кариера процвета благодарение на драмата „Следоред“ (Succession) на Ејч-би-о, беше награден за улогата на проблематичен братучед на патување за холокаустот во Полска во филмот „Вистинска болка“ (A Real Pain). Филмот го напиша и режираше Џеси Ајзенберг, кој исто така глуми во филмот.

Киран Калкин Фото: Bloomberg Mercury

 

Пол Тазвел ја освои наградата за дизајн на костими за „Злобница“, станувајќи првиот црнец што го добил ова признание.

„Флоу“ (Flow) беше прогласен за најдобар анимиран филм, победувајќи ги номинираните „Дивиот робот“ и „Превртено 2“. Питер Стројан ја освои наградата за најдобро адаптирано сценарио за трилерот за избор на нов папа – филмот „Конклава“.

Наградата за најдобар долгометражен документарен филм му припадна на остварувањето „Нема друга земја“ (No Other Land), кое се занимава со конфликтот на Блискиот Исток. Авторите на филмот, палестинско-израелски тим, го искористија говорот на благодарност за критика на американската политика во регионот.

Бразилскиот филм „Уште сум тука“ (I’m Still Here) го освои „оскарот“ за најдобар меѓународен филм. Филмот екранизира вистинска приказна за жена што се борела против бразилската диктатура во 1970-тите.

Единственото остварување што беше номинирано од нашите простори, филмот „Човекот што не можеше да молчи“, на хрватскиот режисер Небојша Слијепчевиќ, во категоријата најдобар краток игран филм, изгуби од филмот „Јас не сум робот“ (I am not a Robot).

Филмот на хрватскиот режисер се занимава со воено злосторство извршено врз патници на возот на линијата Белград-Бар и херојскиот чин на пензионираниот офицер на ЈНА, Тома Бузова, кој во филмот го игра актерот Драган Миќановиќ. Минатата година ги освои „златната палма“ на меѓународниот филмски фестивал во Кан, во категоријата краток филм, и наградата на Европската филмска академија.

На најгламурозната филмска манифестација му беше оддадена почит на неодамна починатиот Џин Хекман, кој почина пред неколку дена заедно со својата сопруга Бетси Аракава.

Деталите за смртта на познатиот оскаровец и неговата сопруга сѐ уште се предмет на полициска истрага Фото: Bloomberg Mercury

 

Говорот го одржа Морган Фриман. „Светот изгуби филмска легенда, а јас пријател...“, рече Фриман. Почит беше оддадена и за музичката легенда Квинси Џонс, а за него зборуваа Вупи Голдберг и Опра Винфри.

Комплетната листа на добитниците на 97-то доделување на „оскарите“:

 

Најдобра споредна машка улога

Киран Калкин, „Вистинска болка“

Најдобра анимација

„Флоу“

Најдобар анимиран краток филм

„Во сенката на чемпресот“ (In the Shadow of the Cypress)

Најдобра костимографија

Пол Тазвел, „Злобница“

Најдобро оригинално сценарио

Шон Бејкер, „Анора“

Најдобро адаптирано сценарио

Питер Стројан, „Конклава“

Најдобра шминка и стајлинг

„Супстанција“ (Substance)

Најдобра монтажа

Шон Бејкер, „Анора“

Најдобра споредна женска улога

Зои Салдана, „Емилија Перез“

Најдобра сценографија

„Злобница“

Најдобра песна

Ел Мал, „Емилија Перез“

Најдобар документарен краткометражен филм

„Единствената девојка во оркестарот“ (The Only Girl in the Orchestra)

Најдобар документарен долгометражен филм

„Нема друга земја“

Најдобар звук

„Дина: Втор дел“ (Dune)

Најдобри визуелни ефекти

„Дина: Втор дел“

Најдобар краток игран филм

„Јас не сум робот“

Најдобра фотографија

„Бруталист“

Најдобар меѓународен филм

„Уште сум тука“ (Бразил)

Најдобра оригинална музика

Даниел Блумберг, „Бруталист“

Најдобар актер

Адријан Броди, „Бруталист“

Најдобар режисер

Шон Бејкер, „Анора“

Најдобра актерка

Мики Медисон, „Анора“

Најдобар филм

„Анора“

 

 

Во моментов нема коментари за веста. Биди прв да коментира...

Остави коментар