Деби епизодата на серијата чие дејство претходи на она од популарната „Игра на тронови“ (Game of Thrones) привлече огромен број корисници на платформата HBO Max, што предизвика преоптоварување на услугата во САД во неделата навечер.
Повеќе од 3.000 прекини биле пријавени низ глобалниот мониторинг сервис Downdetector во 21 часот во Њујорк, токму кога беше закажана премиерата на „Куќата на змејот“ (House of the Dragon).
Претставник на Warner Bros Discovery Inc., компанија родител на HBO, потоа во соопштение порача дека шоуто успешно го следат милиони претплатници.
„Свесни сме за мал дел од корисниците кои се обидуваат да се поврзат преку уредите Fire TV кои имаат проблеми и сме во процес на решавање за тие засегнати корисници“, посочи претставникот.
Сепак, многу корисници се пожалија за проблеми преку „Твитер“.
„Куќата на змејот“ пристигнува по повеќе од три години по последната епизода на „Игра на тронови“, хит серијата која привлече 19,3 милиони гледачи, што е рекорд за HBO. Дејството на новата серија се одвива приближно 170 години пред она во „Игра на тронови“ и се фокусира на крвавите превирања на семејството Таргариен.
Платформите за стриминг се мачат да останат во чекор со навалицата за нивните најпопуларни серии. Претходно годинава, објавувањето на финалето на сезоната на „Чудни нешта“ (Stranger Things) предизвика пад на Netflix.
.webp){kind=icon}
