Клиники за долг животен век - колку чини долговечноста?

Европа старее. До 2100 година секој трет Европеец ќе биде постар од 65 години. Иако предвидувањата се дека генерално ќе се живее подолго, прашање е дали ќе се живее и поздраво. Барем така покажува Индексот за здраво стареење и превенција, кој рангира 153 земји според шест показатели: животен век, здравствен век и работен век, приход, еколошка свест и среќа. Затоа не изненадува фактот што и на Стариот Континент брзо расте интересот за долговечност, концепт за продолжување на животниот век, но и подобрување на квалитетот на животот.

Она што дополнително го поттикнува интересот за долговечност е што концептот движи разни индустрии што се потпираат на него, со моќен финансиски потенцијал. Се проценува дека моменталната вредност на тој пазар е околу 600 милијарди долари. Се очекува дека до 2030 година ќе достигне вредност од 2,7 трилиони долари, со годишен раст меѓу 7 и 12 отсто, во зависност од секторот. Во тоа се вклучени, меѓу другото, медицински и биотехнолошки иновации, пазарот на суплементи, фармацевтската индустрија и истражувања за лекови против стареење, генетски третмани, но и медицински центри и клиники што нудат програми за долговечност.

Некогаш клиниките за долговечност беа резервирани за милијардери од Силициумската Долина и врвни спортисти, првенствено во САД. Екстремен пример е Брајан Џонсон, американски милијардер што вложува милиони во забавување на стареењето и кој поттикна цела армија луѓе чија цел е да живеат вечно! Успехот е секако неизвесен, но фактот прикажан во документарецот на „Нетфликс“ е дека овој средовечен маж изгледа, а и има состојба на организмот како осумнаесетгодишник.

Брајан Џонсон, милијардерот што сака да живее вечно Фото: Kyle Grillot/Bloomberg

Клиника „Ла Прери“ (Clinique La Prairie), Швајцарија 

Веројатно најпрестижната клиника за долговечност, која комбинира луксузни велнес-програми и напредни медицински третмани. Сместена во местото Монтре, на брегот на Женевско Езеро, таа обезбедува мирна околина идеална за закрепнување и посветување на себе. Како лидер во третманите за долговечност од своето основање во 1931 година, постојано привлекува клиенти од висок профил, вклучувајќи светски лидери и познати личности. Исто така, таа е и еден од најголемите синџири на клиники со објекти во Доха, Мадрид, Бангкок, Кина. 

Пионери се во интеграцијата на традиционалната медицина со современите биотехнологии, како што се терапиите со матични клетки и напредните протоколи за детоксикација. Од протоколите се истакнува користењето екстрат ЦЛП (CLP Extract), терапија базирана на матични клетки за поттикнување на клеточната обнова. Програмите може да чинат меѓу 25.000 и 50.000 евра неделно, во зависност од понудата, дополнителните третмани и изборот на сместување.

Пролетта веќе пристигна на Женевско Езеро Фото: Depositphotos

Палата „Шено Вегис“ (Chenot Palace Weggis), Швајцарија 

Палатата „Шено Вегис“ (Chenot Palace Weggis) е луксузна клиника за долговечност, која ги комбинира принципите на традиционалната кинеска медицина, акупунктурата и билните третмани со напредните западни дијагностички методи и медицински практики. Иновативниот метод „Шено“ е научно потврден пристап за оптимизација на виталноста и долговечноста. Комбинацијата на луксузно сместување, персонализирана нега и третмани ѝ овозможи на клиниката да стекне репутација на лидер. Мирната околина на малото место Вегис, на брегот на езерото Луцерн, обезбедува идеална околина за исцелување и подмладување. 

Цената на програмите варира од 5.000 до 25.000 долари неделно, во зависност од избраните услуги и сместување. Во други центри низ светот нудат претежно спа и велнес-пакети и програми за детоксикација: во Азербејџан, Маракеш, на северот на Италија и во рамките на ресортот „Уан енд онли Портонови“ (One & Only Portonovi) во Црна Гора. На локацијата во Црна Гора, „Шено еспејс“ (Chenot Espace) нуди медицинско спа во опуштена околина. Посетителите можат да избираат меѓу „Шено дајет“ (Chenot Diet) или пофлексибилен биолајт-план на исхрана, приспособен на нивните потреби.

Медицински ресорт „Ориџинал Мајр“ (Original Mayr Medical Resort), Австрија 

Сместен на брегот на езерото Вертезе, во прекрасно шумско опкружување, медицинскиот ресорт „Ориџинал Мајр“ (Original Mayr Medical Resort) е пионер во областа на здравјето на цревата и модерната медицина Мајр. Гостите што се враќаат од година на година ја добиваат познатата „Мајр кјура“, програма што ја следи оригиналната теорија на д-р Франц Ксавер Мајр (1875-1965), која и денес е релевантна и научно признаена. Според таа теорија, клучот за здравјето лежи во стомакот. Неговиот медицински следбеник, д-р Раух, ја усовршил и модернизирал „Мајр кјура“ пред да го отвори овој здравствен центар на средината на 1970-тите. Оттогаш, низ Австрија и Германија никнале многу слични центри што ги применуваат овие методи, но медицинскиот ресорт „Ориџинал Мајр“ остана неприкосновен пионер на овој метод. Основниот пакет, кој вклучува дијагностика, но не и личен план и во кој не е вклучено сместување, чини од 3.300 евра.

Програмите на клиниките се комбинација од традиционална медицина, иновативни методи и дијагностика, но и древени техники Фото: Depositphotos

„Мајрлајф“ (Mayrlife), Австрија 

Една од клиниките што ја следат теоријата на д-р Мајр, здравствениот концепт „Мајрлајф“ (MAYRLIFE), се состои од шест клучни елементи: модерна медицина Мајр, сеопфатен холистички пристап кон здравјето, персонализација на терапевтскиот концепт, целно поттикнување на обновата на клетките, иновативни медицински методи и приспособена исхрана за долгорочно одржување нова животна рамнотежа. Се наоѓа на самиот брег на езерото Алтаусе, едно од најубавите езера во Австрија. Опкружено со прекрасни пејзажи и спектакуларна планинска заднина, местото нуди совршени услови за закрепнување. За популаризацијата на клиниката е заслужен и Иван Пол, кој повеќе од 15 години ги обликува и „подигнува“ лицата на светските ѕвезди, вклучувајќи ги Селма Хајек, Ким Кардашијан и Викторија Бекам. Основачот на брендот „Бјути сендвич“ (Beauty Sandwich) лично ги увидел бенефициите од програмата на оваа клиника. А ако ве интересира како светските убавици се ослободуваат од губење на волуменот, Пол користи техника што ја спојува напредната радиофреквентна технологија со арсенал на високоефективни прехранбени додатоци. Цената на пакетот за долговечност во „Мајрлајф“ започнува од 5.100 евра за седум дена. Има и дневна клиника во Виена.

Ким Кардашијан Фото: Bloomberg

„Лансерхоф Ланс“ (Lanserhof Lans), Австрија 

Уште еден пример на методологија заснована на теоријата на д-р Мајр дека клучот лежи во стомакот и цревата е „Лансерхоф Ланс“ (Lanserhof Lans). Сместен во идиличните Тиролски Алпи, центарот ја развил својата програма имајќи го постот како централен метод за долговечност. Целта е детоксикација, деацидификација и чистење на телото. Физичката регенерација се поддржува со терапии за движење, специјално развиена исхрана (Lanserhof Energy Cuisine) и физичка терапија. Клиниката е присутна и во Данска, Германија и Велика Британија. Третманите чинат од 5.000 до 20.000 долари неделно, во зависност од избраната програма и нивото на услуга.

Алпите обезбедуваат идеален амбиент за активности на отворено Фото: Depositphotos

„Лонџевити центар“ (Longevity Center), Швајцарија, Полска 

Повеќе од 150 експерти, вклучувајќи лекари, истражувачи, биотехнолози и велнес-тренери, обезбедуваат иновативни третмани засновани на регенеративна медицина и генетско тестирање. Клиниката е присутна во Варшава и во Цирих. Услугите вклучуваат детална дијагностика на стареењето, генетско тестирање, анализа на предиспозиции за болести поврзани со годините, третмани со матични клетки и терапии ПРП/PRP (терапија што користи концентрирани тромбоцити од крвта на пациентот, кои се инјектираат во оштетеното подрачје за да поттикнат заздравување и регенерација. Овој метод често се применува во лекување мускулно-скелетни проблеми, како превенција од губење коса и во естетски третмани за подмладување на кожата). Третманите чинат од 2.000 до 10.000 долари неделно, што центарот го позиционира како премиум, но сепак подостапна опција во однос на другите на листата.

Многу клиники се опкружени со бујна природа и води што дополнително влијаат на закрепнувањето Фото: Depositphotos

„Ревита биолоџикал лонџевити“ (Revita Biological Longevity), Словенија 

Клиниката во Рогашка Слатина во 2024 година беше номинирана за најдобар луксузен медицински ресорт. Сместувањето во хотел со пет ѕвезди и изборот од осум различни програми, против стареење, детоксикација, програми за спортисти, кардио-рамнотежа, општо подобрување на здравјето, ја прават атрактивен избор за спортисти и деловни лидери од регионот.

„Веруваме дека секој човек е способен за самолечење и обнова, а нашата задача е да му помогнеме да го активира тој потенцијал“, наведуваат на својот сајт, каде што се наоѓаат и цените на третманите. На пример, тридневна програма за детоксикација на клеточно ниво чини 1.968 евра, додека за продолжена програма од 21 ден плаќате 18.000 евра. Цената на програмата против стареење е слична, односно нешто помалку од 2.000 евра за три дена и 18.900 евра за три недели. Слични се и трошоците на програмите за општо подобрување на здравјето.

Целта на концептот за долговечност не е само продолжување туку и подобрување на квалитетот на животот Фото: Depositphotos

Клиника „Хелти лонџевити“ (Healthy Longevity Clinic), Чешка 

Петр Шрамек, претприемач и директор на фондот „Лонџевити тек“ (LongevityTech.fund), ја кооснова клиниката во 2021 година за да овозможи побрз пристап до напредни терапии и дијагностички методи. Оваа клиника функционира малку поинаку и не е насочена кон луксузно сместување, туку кон лични планови. Еве како изгледа тоа. По процената дали клиниката за долговечност е вистинското решение при бесплатна консултација, се закажува првата посета. Се поминува низ низа персонализирани тестови и дијагностика, по што тимот на експерти за долговечност детално ги анализира резултатите за да ги одреди најдобрите стратегии за подобрување на вашето здравје. Се тестираат генетиката, здравјето на мозокот, телесната композиција... Потоа се креира препорака за лична програма, а клиентот се одлучува меѓу три различни вида на членство. Типичниот годишен буџет се движи меѓу 23.000 и 92.000 евра, во зависност од типот на членство.

Во моментов нема коментари за веста. Биди прв да коментира...

Остави коментар