Летните спомени на многу Шпанци се состојат од многу пот, долги сиести и играње на улица, додека нивните баби пред вратите поставуваат столчиња на расклопување и седат пред куќите во поладните и вечерните часови, минувајќи го времето во разговор со соседите и пријателите.
Оваа навика, која Шпанците ја нарекуваат „муабети во ладовина“ (charla al fresco), била толку популарна што едно село во Андалузија минатата година се избори за статус на светско нематеријално наследство под покровителство на УНЕСКО.
Но, градоначалникот на местото посочува дека овој обичај е сè позагрозен поради широката употреба на социјалните мрежи, што ги тера луѓето да зјапаат во своите телефони или компјутери наместо да се вклучат во директни разговори во реалниот живот.
Годинешните рекордни високи температури покажуваат дека не се само социјалните мрежи закана за поранешните традиции. Топлото време, дури и ноќе, задржа многу шпански баби во затворен простор. И не само во Шпанија. Многу села во Франција и Британија ги откажаа локалните настани и улични фестивали за да ги заштитат граѓаните од високите температури.
Ништо од ова не е некоја посебна новост во Севилја, каде што луѓето не ги напуштаат своите домови пред осум часот навечер во текот на летото и каде што локалните фестивали започнуваат дури околу 22 часот. Во Севилја, температурите над 40 степени се вообичаени во јули и август, а научниците веруваат дека како што се загрева Земјата, температурите во областа во следните пет до десет години би можеле да достигнат 50 степени во некои денови.
„Наша должност е да направиме сè за да го спречиме ова сценарио. Треба да развиеме мерки кои ќе ги ублажат ефектите од климатските промени“, вели градоначалникот на Севилја, Антонио Муњоз.
Bloomberg Mercury
Во архивите на градот постојат фотографии од далечната 1940 година на кои се прикажани улици покриени со платно за да се заштитат жителите од директните ефекти на сонцето.
„Тоа е само една од многуте работи што мора да ги направиме ако сакаме да ги задржиме улиците употребливи за деца кои сакаат да играат или луѓе кои сакаат да одат на шопинг или да се дружат со пријателите“, вели градоначалникот.
Градот користи и други школски начини за борба против топлината, како што се поставување јавни фонтани, садење пет илјади дрвја годишно или користење градежни материјали што не апсорбираат топлина.
Замислата е секој топлотен бран, во зависност од категоризацијата, да покрене одредени мерки, како отворање на градски базени и водни паркови или распоредување здравствени работници за проверка на состојбата на најзагрозената популација.
„Топлината убива повеќе луѓе од која било друга временски непогода, а не мора да биде така. Тивката, невидлива природа го прави ширењето на пораката за сериозноста на овие катастрофи особено предизвикувачко“, вели Кети Багман Меклеод од фондацијата Adrienne Arsht-Rockefelle, која промовира решенија за борба против климатските промени.
Но, се чини дека денес веќе не е доволно изнаоѓањето на начини за прилагодување на топлотните бранови. Со сегашната состојба со климатските промени, глобалните температури се очекува да се зголемат меѓу 2,4 и 2,7 степени над прединдустрискиот просек до крајот на векот. Ова може да го направи животот невозможен во некои делови од светот.
Одговорот на Севилја на ваквите прогнози е пилот-проект вреден пет милиони евра, чија цел е да се намали просечната температура околу една улица за 10 степени. Проектот е 80 отсто финансиран од Европската Унија и треба да биде готов до октомври.
Симулација на зграда со модерна технологија за ладење, базирана на искуството од древна Персија
Со цел да се намалат просечните температури, инженерите дошле до идеја да реплицираат древна персиска технологија развиена пред повеќе од илјада години, која се состои од подземни канали кои спроведуваат вода над површината што треба да се излади. Вертикалните вдлабнатини кон подземните канали овозможуваат пенетрација на топлиот воздух под земјата, кој потоа се враќа на површината изладен.
Нешто слично на овој експериментален проект веќе беше направено во 1992 година кога Севилја беше домаќин на Светската изложба. Во тоа време, технологијата помогна да се излади воздухот на улицата за околу три степени, но машините што се користеле за проток на вода работеле на фосилни горива. Сега тоа ќе се прави со помош на обновливи извори на енергија.
Во друга експериментална промена, изладената вода под земја ќе се испумпува на површината и ќе се насочи кон врвовите на зградите, а потоа ќе капе низ ѕидовите со прозорци за да помогне во намалувањето на температурата во зградата, како и на околниот воздух. Овој систем ќе се користи и за поставување специјални клупи каде луѓето ќе можат да седат и да се разладат.
„Звучи како научна фантастика, но е применливо на голем број простори во градот. Потребна ви е само малку имагинација и ангажман на локалните чинители“, посочува Лукас Переа од локалното претпријатие за водоснабдување EMASESA.
„Старите навики како муабети во ладовина не мора да исчезнат, но мора да најдеме начини да управуваме со јавните простори додека светот се загрева“, вели Переа, додавајќи дека EMASESA исто така се обидува да развие таканаречени „пријатни простори“ по должината на главните улици на Севилја каде луѓето ќе можат да се одморат за време на неподносливата топлина.
.webp){kind=icon}
Во моментов нема коментари за веста. Биди прв да коментира...