Експертите предвидуваат силен раст на производите од козјо млеко во индустријата за нега и убавина. Глобалниот пазар на козметички производи од козјо млеко, кој лани беше проценет на 4,4 милијарди долари, се очекува да достигне 8,2 милијарди долари во 2033 година, со годишна стапка на раст од 8,3 отсто.
Различни студии наведуваат три клучни компоненти поради кои расте интересот за овие производи - зголемена свест кај потрошувачите за здравствените придобивки, зголемено алтернативно производство и иновации во преработката што промовираат одржливост и етичка потрошувачка.
Дури една четвртина од произведените козметички производи од козјо млеко на светско ниво се сапуни. Оваа индустрија годинава е проценета на 1,6 милијарда долари и се очекува да достигне 3,4 милијарди долари во 2033-та, со годишна стапка на раст од 9,5 отсто.
Сапун од козјо млеко сѐ повеќе се бара и на домашниот пазар, но на една рака може да се избројат производителите што низ годините препознале потенцијал во овој бизнис. Меѓу нив е и Марјан Стојнев. Сапунот што тој и неговото семејство го произведуваат речиси една деценија е традиционален рецепт добиен како наследство, со сертификат за природна козметика од Институтот за јавно здравје.
Bloomberg Adria
Нивната работилница во Миладиновци активно работи само од средината на мај до септември, кога има квалитетно козјо млеко. Годишно се прават околу 5.500 парчиња, а дел од резервата се подарува.
„Производството на сапун од козјо млеко има предизвици што може да бидат значајни.
Козјото млеко е природен производ што има различен состав и квалитет во зависност од различни фактори, како што се сезоната, исхраната на козите и самиот процес на молзење. Тоа може да влијае на квалитетот и стабилноста на сапунот. Козјото млеко е помалку достапно, дури и кога е достапно, количествата може да варираат. Затоа, предвидувањето на точното количество на млеко за производството на сапун е критично. Производителот често мора да се потпре на локални фарми или да има своја фарма за стабилно снабдување. Сето ова ги прави предизвиците во производство на сапун од козјо млеко комплексни“, вели Стојнев во разговор за „Блумберг Адрија“.
Тој објаснува дека сапунот од козјо млеко се изработува целосно рачно, со ладен процес преку кој се овозможува сите лековити и корисни состојки од млекото да останат во производот. Стојнев вели дека во неговиот сапун нема дестилирана вода.
„Во основниот сапун има додатоци на кокосово и маслиново масло, а во козметичкиот има и шеа-путер“, открива тој.
Во калапите на Стојнев се леат 300 сапуни одеднаш. Наместо со ножеви, смесата се сече со жици од клавир и од гитара - негов изум на кој е особено горд. Потоа сапуните се редат во кругови како цилиндри и така се оставаат два месеца да се сапунифицираат пред да се појават на пазарот како готов производ.
Bloomberg Adria
„Сапунот се пакува во кутија, која е оригами, со втиснат сув жиг од заштитеното бренд-лого. Хартијата е каучук со целулоза, а дизајнот е мој. Сапуните не можат да се отворат без да се скине кутијата, а тоа на потрошувачите им гарантира сигурен производ“, појаснува Стојнев.
До крајот на годината тој најавува проширување на асортиманот. Стојнев вели дека квалитетот, формата и изгледот ќе останат исти и дека промената ќе биде во додатоците.
„Новите производи ќе бидат наменети за пилинг и за масажа против целулит“, открива тој.
Стојнев е уверен дека кај нас допрва ќе се развива бизнисот со козметика на природна база. Според него, потрошувачите сѐ повеќе се заинтересирани за здравјето и за животната средина, а токму производите базирани на козјо млеко често се одбираат бидејќи не содржат синтетички хемикалии и се поеколошки.
„Во Македонија, иако пазарот е помал, интересот за овие производи расте, особено меѓу помладата генерација и свесните потрошувачи. Производството на органска козметика може да биде исплатливо, но бара внимание на деталите - од квалитетот на производите, регулативите, маркетингот, до правилното поставување на бизнис-стратегијата. Ако се вложи во квалитетот и во создавањето силен бренд, можностите за успех се големи“, смета тој.
Сапунот на Стојнев засега е достапен само на домашниот пазар. Со семејството имале обид за извоз во Холандија, но почнала пандемијата на ковид-19. Во наредниот период најавува посета на неколку саеми во регионот, но и во Европа, каде што ќе бара нова можност за пласирање на производот надвор од границите.
ШТО ВЕЛАТ ДЕРМАТОЛОЗИТЕ?
Сапунот од козјо млеко е познат по својата нежна и блага природа, што го прави погоден за различни типови кожа, вклучувајќи ја и онаа што е склона на акни, велат дерматолозите. Во последно време тие сѐ погласно зборуваат за многубројните придобивки на овој производ и често ги нагласуваат неговите антивоспалителни својства. Нашиот соговорник, пак, истакнува пет причини поради кои овој сапун е различен од другите.
1. Натурални масти и витамини
Козјото млеко е богато со витамини (A, Б1, Б2, Б6, Б12, Ц и Д), минерали и масни киселини што ја хидрираат и негуваат кожата. Овие компоненти помагаат во заздравувањето на сувата и оштетена кожа.
2. Нежно чистење
Козјото млеко има помек ефект на кожата во споредба со другите сапуни. Не ја суши кожата, туку ја прави мека и хидрирана.
Bloomberg Adria
3. Антибактериски својства
Козјото млеко има природни антибактериски својства што можат да помогнат во лекувањето акни и други кожни проблеми.
4. Нега на чувствителна кожа
Поради својата нежност, сапунот од козјо млеко е погоден и за луѓето со чувствителна кожа или со кожни заболувања како егзем или псоријаза.
5. Без хемикалии
Многу комерцијални сапуни имаат хемиски состојки што може да ја иритираат кожата, додека квалитетниот сапун од козјо млеко е направен од природни состојки.
.webp){kind=icon}
Во моментов нема коментари за веста. Биди прв да коментира...