„Поп Март“ продаде рекорден број кукли Лабубу

Акциите на кинескиот производител на играчки „Поп Март интернешнл“ (Pop Mart International Group Ltd.) денеска пораснаа најмногу во последниве речиси четири месеци, откако извршниот директор Ванг Нинг изјави дека компанијата лесно може да ја надмине годишната проекција за продажба и најави лансирање на новата минијатурна кукла Лабубу.

Цената на акциите скокна за 11 отсто, на 310,6 хонгконшки долари, што е највисоко ниво откако компанијата излезе на берза во декември 2020 година. Со тоа беа поништени претходните загуби од 4,7 отсто, откако поединечни аналитичари изразија загриженост за долгорочната побарувачка на популарните ликови на „Поп Март“.

На конференцијата по повод објавата на резултатите, Ванг рече дека ни самиот не може прецизно да го предвиди растот на заработката поради големата глобална побарувачка за куклите Лабубу. Тој додаде дека „Поп Март“ на почетокот на годината планирал да достигне приход од 20 милијарди јуани (2,8 милијарди долари), но сега смета дека „30 милијарди би било доста  лесно (да се достигне)“. Новата мини-верзија на куклата Лабубу ќе биде лансирана уште неделава, најави Ванг, без да открие повеќе детали.

Компанијата во вторникот соопшти дека приходите на „Поп Март“ пораснале за 204 отсто, на 13,88 милијарди јуани во првите шест месеци од 2025 година, надминувајќи ја просечната процена на аналитичарите од 13,76 милијарди јуани. За споредба, во истиот период минатата година растот изнесувал 62 отсто. Нето-добивката скокнала за 397 отсто, на 4,57 милијарди јуани.

Глобална експанзија и зголемен интерес за Лабубу

„Поп Март“, со седиште во Пекинг, забрзано го спроведува планот за глобална експанзија, потпирајќи се на силниот светски интерес за меките играчки Лабубу, кои станаа поп-културен феномен на Запад, особено во САД. Приходите од странство пораснале за 440 отсто, на 5,6 милијарди јуани во првата половина од годинава.

Компанијата очекува до крајот на 2025 година бројот на продавници во странство да надмине 200, од сегашните 140, изјави Мун Дук II, еден од коизвршните директори. Неговиот колега Си Де додаде дека проширувањето во САД ќе остане приоритет во наредната една-две години.

„Сметаме дека силната способност на „Поп Март“ да развива и комерцијализира сопствени брендови и ликови, како и глобалната експанзија, ќе продолжи да го поддржува силниот раст во втората половина од годината“, напишаа аналитичарите на „Ситигруп“ (Citigroup Inc.), предводени од Лидија Линг. Сепак, други аналитичари предупредуваат на претпазливост.

„Највредната интелектуална сопственост на „Поп Март“, вклучувајќи ги и куклите Лабубу, и натаму носи високи неизвесности кога станува збор за нивната долгорочна популарност“, вели аналитичарот Џеф Жанг од „Морнингстар“ (Morningstar Inc.).

На домашниот пазар, растот на бројот на продавници во Кина нема да надмине 10 во текот на годинава, бидејќи компанијата сака да го унапреди работењето на постојните објекти наместо да се фокусира на агресивно ширење.

Тајната на успехот? Концептот „кутија-изненадување“

Популарноста на куклите Лабубу делумно произлегува од концептот „кутија-изненадување“ (blind-box) на пакувањето, каде што купувачите однапред не знаат која играчка ќе ја добијат, што буди дополнителна љубопитност. Приходот од серијата на играчки „Монстерс“ (The Monsters), која ја вклучува и Лабубу, достигна 4,81 милијарди јуани, во споредба со 626,8 милиони во истиот период минатата година.

„Поп Март“ планира понатамошна глобална експанзија преку отворање продавници на клучни локации, дополнителни вложувања во веб-страницата и сопствените апликации, како и преку соработка со меѓународни брендови и уметници, се наведува во извештајот за работењето.

 

Во моментов нема коментари за веста. Биди прв да коментира...

Остави коментар