Како економијата „кидалт“ го поттикнува пазарот на играчки

Изгледа децата нема да бидат единствените што додаваат играчки на списоците со желби за време на празниците - 89 проценти од родителите анкетирани од Здружението за играчки планираат да купат играчки за возрасни сезонава, а 43 проценти ќе купат за својот сопружник или партнер. Повеќе од половина од анкетираните мажи (53 проценти) исто така ќе купат играчки за себе, како и 48 проценти од милениумските родители под 40 години.

Возрасните што се заинтересирани за играчки и ситнурии, наречени „кидалти“, сега сочинуваат околу 25 отсто од пазарот на играчки вреден девет милијарди долари, според „Циркана“ (Circana). И додека продажбата на детски играчки е намалена за цели 200 милиони евра од 2019 година, пазарот порасна за една милијарда евра кога станува збор за „кидалти“.

Терминот „кидалт“ првпат бил измислен во 1950-тите, кога ТВ-индустријата го користела за да ги опише возрасните што уживале во програми наменети за млади луѓе. Денешните „кидалти“ ја поттикнуваат побарувачката за носталгија и игра додека се препуштаат на популарната култура од своето детство.

Според анализата на трендовите на играчките од 2024 година, Здружението за играчки посочува дека благодарение на добропознатите придобивки од играта за сите возрасти, 20 проценти од родителите изјавиле дека ќе купат играчки и за постарите роднини во оваа празнична сезона. Дури 70 отсто од нив изјавиле дека менталната стимулација е една од најпозитивните придобивки од игрите за постарите во нивниот живот.

Играчките имаат трајно влијание врз поп-културата (и обратно), поврзувајќи генерации и предизвикувајќи чувства на носталгија. Во годините обележани со успешни филмови поврзани со играчки, како „Малата сирена“, „Барби“ и „Нинџа желки“, 38 проценти од родителите изразиле интерес за купување играчки инспирирани од филмовите и популарните забавни франшизи.

Како и во светот на модата, сведоци сме на оживување и реинтерпретација на играчките од 1990-тите и 2000-тите. Дури двајца од пет родители во споменатата анкета наведуваат дека имаат тенденција да купуваат играчки со кои си играле во детството. Со оглед на гореспоменатите трендови, најновите маркетиншки потези се јасно насочени кон милениумците. Еден од најпопуларните производи што го „запалија светот“ е куклата „Сони ејнџелс“ (Sonny Angels).

За првпат измислена во 2004 година од јапонскиот дизајнер Тору Сој, „Сони ејнџелс“, именувана по прекарот на Соj, Сони, беше наменета да им биде придружник на младите жени што работат и се справуваат со стрес.

„Сони ејнџелс“ обично се продаваат за 10-20 долари и доаѓаат во запечатени кутии, чувајќи го дизајнот во тајност додека не се отвори. Со повеќе од 1.000 варијации, носејќи различни наметки инспирирани од храна, животни или растенија, обожавателите бараат надалеку и нашироко во обид да ги соберат сите. Побарувачката е огромна, а ограничениот капацитет на фабриката е предизвик за компанијата „Дримс“, која произведува популарни фигури, наведува „Блумберг“.

Продажбата на фигурите на компанијата во САД минатата година беше три-четири пати поголема отколку во 2022 година, според гореспоменатиот текст. Во првата половина од годинава е речиси двојно зголемена во однос на истиот период лани, а слични трендови се забележани и во другите земји, велат од компанијата.

Во регионот Адрија, „Сони ејнџелс“ моментално се достапени само преку „Убај“ (Ubuy), но за многу повеќе - цените достигнуваат 47 евра бидејќи производот всушност се испраќа од САД, преку ДХЛ.

Фигурите во кои повеќе уживаат возрасните отколку децата ги обединуваат обожавателите низ светот

Покрај тоа што им помага на обожавателите да се поврзат со нивното внатрешно дете, „Сони ејнџелс“ исто така им помага на колекционерите да се поврзат со заедница на истомисленици. Обожавателите организираат состаноци преку Тикток и живеат за размена, а ако го истражите хаштагот, исто така ќе видите дека облеката на популарните „мали ангели“ што носат насмевки служи како инспирација за облека не само за фигури туку и за вистински луѓе, т.е. сопствениците. Тие ја изразуваат својата љубов кон овие ликови преку тетоважи и уметност на ноктите.

Зголемената потреба за заедница е еден од важните фактори за растот на овој тренд. Потрошувачите бараат начини да се поврзат со луѓе со слични вредности и интереси што можат да ги поддржат на нивното патување до заздравување и ослободување од стрес.

На официјалната веб-страница на „Сони ејнџелс“, тие укажуваат на порастот на проблемите со менталното здравје, кои влијаат на повеќе од 450 милиони луѓе на глобално ниво. Производот се рекламира како производ што носи исцелување со свежи идеи и возбудливи дизајни. „Сони ејнџелс“ се поставуваат на влезот во куќата, до креветот или бирото. Исто како што беше со кристалите. Кристалната терапија, позната и како кристално исцелување, е алтернативна терапија што користи кристали и скапоцени камења за да промовира физичко, емоционално и духовно исцелување. 

Според извештајот на „Бизнис рисрч“ (Business Research), глобалниот пазар на кристалната терапија беше проценет на 77,61 милиони американски долари во 2021 година и се предвидува да достигне 223,35 милиони американски долари до 2031 година, растејќи за 11,15 проценти во текот на прогнозираниот период. Пазарот на алтернативна медицина, кој вклучува различни производи и услуги насочени кон подобрување на физичката, менталната, емоционалната и духовната благосостојба, се очекува да достигне вредност од 4,2 милијарди долари до 2025 година, според извештајот на „Гранд рисрч“ (Grand Research).

Бидејќи светот се соочува со предизвици, како што се климатските промени, пандемиите и социјалните немири, побарувачката за алтернативни решенија за лекување и здравје рапидно расте. Подобрата свесност добива пошироко прифаќање кај потрошувачите, како што е потврдено со порастот на зголемениот број апликации фокусирани на медитација, како што се „Хедспејс“ (Headspace) и „Калм“ (Calm). „Гаја“ (Gaiaу), стриминг-платформата што нуди илјадници видеа на теми како што се јога, медитација, духовност, алтернативно здравје и личен развој, има над 500.000 претплатници во повеќе од 185 земји.

Услугата е основана од Јирка Рисави, чешки претприемач што се преселил во САД и станал успешен бизнисмен во индустријата за природни производи. Рисави бил инспириран од сопственото духовно патување и визија за да создаде платформа што ќе ги поттикне луѓето да ги истражат сопствената свест и потенцијал.