Рекордна продажба на „Лего“ и зголемување на пазарниот удел во Азија

Откако денеска објави рекордни бројки за продажба во првата половина од годинава, „Лего“ (Lego A/S) извести дека ќе го одржи својот замав  со удвојување на пазарот во Азија.

Данскиот производител на играчки објави приход од 34,6 милијарди круни (5,4 милијарди долари) за првата половина од 2025 година, што е повеќе од остварените приходи на конкурентите „Мател“ (Mattel Inc.) и „Хасбро“ (Hasbro Inc.). Бројките покажуваат дека „Лего“ реализираше солидно зголемување во однос на 4,8 милијарди долари приходи остварени во првата половина од минатата година. Продажбата кај потрошувачите исто така се зголеми за 13 проценти.

Производителот на играчки го прошири својот пазарен удел во секоја голема географска зона, а главниот извршен директор Нилс Б. Кристијансен посочи дека Азија игра важна улога во стратегијата за раст на „Лего“.

„Има многу деца во Азија, а животниот стандард таму се зголемува“, рече Кристијансен во едно интервју. „Тоа го прави ’Лего‘ порелевантен.“

Со цел да профитира од процутот на средната класа во регионот, „Лего“ годинава ги отвори своите први продавници во Делхи и Бангалор, како и нова фабрика во Виетнам. Компанијата исто така објави позитивна продажба во Кина по тешкотиите во земјата во 2024 година.

Bloomberg Mercury

 

„Кина, Индија и многу азиски земји дури сега ја гледаат првата генерација што расте со ’лего‘, па затоа градењето свест трае подолго“, рече тој. „Но, тоа е јасен долгорочен облог.“

Новата фабрика на „Лего“ во Виетнам, нејзина прва во Југоисточна Азија, ќе служи како база за раст во поширокиот азиско-пацифички регион. Тоа се вклопува и во стратегијата за градење регионални синџири на снабдување за да се создаде тампон против тековните глобални трговски тензии, рече Кристијансен, додавајќи дека тоа функционира досега. И покрај неизвесноста околу царините, тој рече дека продажбата се зголемила за двоцифрен процент во САД за првите шест месеци од годината.

„Врз основа на начинот на кој имаме фабрики низ целиот свет, имаме одредена флексибилност да се справиме со некои од работите што се случуваат во моментов“, рече тој. „И играчките веројатно не се најполитички наелектризираната работа во светот.“

Во моментов повеќето коцки „лего“ што се продаваат во САД се произведуваат во фабриката на компанијата во Монтереј, Мексико. Тоа ќе се промени кога компанијата ќе отвори нова фабрика во Вирџинија во 2027 година.

Во моментов нема коментари за веста. Биди прв да коментира...

Остави коментар