Најголемите премиери на филмови и серии во 2026 година - по жанрови

Ова сигурно е година на продолженија на познати филмови, адаптации и големи франшизи, но не би било фер да се задржиме само на тоа.

Од модерната адаптација на класиката „Оркански височини“, чија премиера ќе биде за неколку дена, до новите сезони на популарни серии и потенцијални добитници на Оскар - љубовта често зазема централно место во многу дела. Сепак, тука има и авантура, фантастика, па дури и хорор  - за секого по нешто.

Можеби нема сите овие филмови да добијат Оскар, но ќе понудат забава, возбудливи вечери со пријателите и со партнерите, а веројатно ќе поттикнат и дебати за тоа дали можат да се споредат со оригиналот.

Дел од публиката веќе има одговор на тоа, иако можеби не ги ни гледала, но факт е дека овие филмови и серии имаат армии обожаватели што нетрпеливо ги чекаат. Без разлика дали сакате драми „од пријатели до љубовници“, психолошки трилери, научна фантастика или суперхерои  - оваа година ќе имате повеќе причини да одите в кино.

Адаптации на љубовни класични дела

„Оркански височини“ / Wuthering Heights

Маргот Роби како Кетрин и Џејкоб Елорди како Хитклиф носат модерна енергија на класичниот роман на Емили Бронте, објавен во 1847 година.

Филмот ја води публиката низ страсна и комплицирана љубовна приказна, полна со напнатост, со голем број модерни детали, саундтрак од Чарли XCX и, се разбира, спектакуларна визуелна естетика. Премиерата е закажана за 14 февруари - Денот на вљубените - и ја покрива првата половина на романот.

Џејкоб Елорди како Хитклиф Depositphotos

Секако, адаптацијата на „Оркански височини“ не помина без контроверзии. Режисерката Емерелд Фенел, веќе позната по филмот „Салтбрн“ (Saltburn), отворено говореше за својата визија за романот, која дел од публиката ја гледа како премногу еротска и модерна. Критики беа упатени и за изборот на Роби и Елорди за главните улоги, а дел од публиката побара Хитклиф да го толкува црномурен актер, според оригиналниот опис на ликот во романот. Меѓутоа, Фенел вели дека стои зад кастингот и додава дека „не може да направи нешто за секого“.

„Разум и чувства“ / Sense and Sensibility

Септември носи уште една филмска адаптација, но овој пат класиката на Џејн Остин, во која Дајзи Едгар-Џоунс од „Нормални луѓе“ (Normal People) ја предводи актерската екипа.

Поставката веќе е позната: сестрите мораат да го напуштат својот имот во Сасекс по смртта на нивниот татко и да се преселат кај далечен роднина, соочувајќи се со романтични и финансиски проблеми.

Филмот ги истражува сложените сестрински односи, љубовните избори и внатрешниот раст на јунаците. Премиерата во киносалите е планирана за 11 септември 2026.

Собата во која пишувала Емили Бронте, во Хавот, западен Јоркшир, Велика Британија Depositphotos

„Гордост и предрасуди“ / Pride and Prejudice

Тоа не е сѐ од Џејн Остин: доаѓа и нова серија на Нетфликс, „Гордост и предрасуди“, во која играат колешки од серијата „Круната“ (The Crown) - Ема Корин и Оливија Колман, а Џек Лоуден го игра Дарси. Премиерата е планирана за 2026 година во форма на мини-серија од шест епизоди.

Дали серијата ќе може да му се приближи по квалитетот на познатиот филм од 2005 година, номиниран за четири Оскари, или на серијата од 1995 година? Ќе мора да почекаме уште малку за да дознаеме.

Романтика и романтични комедии

„Бриџертон“ / Bridgerton  - сезона 4

По „Оркански височини“, крајот на февруари го носи вториот дел од четвртата сезона на нашата омилена историска драма. Оваа сезона им е посветена на вториот најстар брат во семејството, Бенедикт Бриџертон, и на Софи Бек.

Балови, интриги и тајни и натаму доминираат во серијата, но не грижете се - ова не е последната сезона.

„Драма“ / The Drama

Зендаја и Роберт Патинсон се во романтична драма што комбинира напнатост, хумор и емотивни моменти. Свршениците се соочуваат со тајни и предизвици што го тестираат нивниот однос додека ја подготвуваат својата венчавка. Трејлерот, кој покажува дека парот изгледа чува големи тајни, веќе е објавен, а премиерата се очекува на 3 април 2026.

Роберт Патисон Depositphotos

 

„Ти, јас и Тоскана“ / You, Me & Tuscany

Само една недела по тоа, излегува уште еден потенцијален хит, во кој главна улога има токму војводата од Хејстингс од првата сезона на „Бриџертон“. Со него е Хали Бејли, која можеби ја знаете како „Малата сирена“ од 2023 година.

Содржината на филмот се врти околу жена што завршува во празна вила во Тоскана, претставувајќи се како свршеница на сопственикот, а потоа неочекувана романса го менува нејзиниот живот засекогаш. Премиерата е закажана за 10 април 2026, па очекувајте тогаш да видите прекрасни предели на Тоскана.

„Остатоци“ / Remain

По излегувањето од психијатриска установа, архитект што сѐ уште се справува со тешка загуба оди на Кејп Код за нова работа и се сместува во стар хотел. Таму запознава мистериозна жена, која го тера да ја преиспита својата рационалност. Во главните улоги се Џејк Џиленхол и Фиби Диневор, а филмот е снимен по романот на Николас Спаркс, еден од најчитаните автори на современи љубовни приказни.

Никогаш доволно драма

„Ѓаволот носи Прада 2“ / The Devil Wears Prada 2

Долгоочекуванотo продолжение на култната комедија „Ѓаволот носи Прада“ (2006), со оригиналната актерска екипа: Мерил Стрип како Миранда Присли, Ен Хатавеј како Енди Сакс, Емили Блант и Стенли Тучи. Содржината ги следи враќањето на Енди во светот на модата и борбата со промените во дигиталните медиуми, со нови ликови, кои ги оживуваат Лејди Гага и Кенет Брана. Премиерата е планирана за 1 мај 2026.

Обожавателите на модата со нетрпение го очекуваат продолжението на „Ѓаволот носи Прада“  Depositphotos

„Еуфорија“ / Euphoria  - сезона 3

Продолжение на една од најгледаните драми за млади. Се очекува уште подлабоко истражување на психолошки и општествени теми преку приказните на Ру, Џулс, Нејт и другите, пет години по крајот на втората сезона.

„Верити“ / Verity

Лоун Ашлеј (Дакота Џонсон) е писателка што бара работа кога со неа контактира Џереми Крофорд (Џош Хартнет). Неговата сопруга, Верити Крофорд (Ен Хатавеј), позната авторка на бестселери, по мистериозна несреќа не може да ги заврши своите популарни книги. Затоа, Џереми ја ангажира Лоун да ги заврши книгите, а таа на патот открива тајни и мистерии на семејството во чиј дом престојува.

Внимавајте - ова е далеку од класична романса - филмот е психолошки трилер полн со неизвесности, напнатост и неочекувани пресврти, кои ќе ги држат гледачите на работ од седиштето, а премиерата е преместена од мај за октомври.

Дакота Џонсон Depositphotos

Научна фантастика

„Практична магија 2“ / Practical Magic 2

Еве малку фантазија. Ова можеби не сте го очекувале - продолжението на филмот „Практична магија“ нѐ враќа во светот на магијата и семејните врски, а Сандра Булок и Никол Кидман повторно ги играат сестрите Сали и Џилијан Овенс, речиси три децении по оригиналот од 1998 година. Премиерата во киносалите е закажана за 18 септември 2026.

„Блејдранер 2099“ / Blade Runner 2099

Продолжение на култната научнофантастична класика поставено 50 години по настаните од претходниот филм, а сега излегува и мини-серија.

„Нарнија“ / Narnia

Новата „Нарнија“ ја режира Грета Гервиг (Барби, Мали жени), адаптирано според книгата „Внукот на волшебникот“.

„Дина: трет дел“ / Dune: Part Three

Третиот дел од сагата за Аракис продолжува со епската борба на куќите Атреидес и Харконен за контрола над планетата. Актерите Тимоти Шаламе и Зендаја повторно ја предводат актерската екипа во последниот дел од трилогијата.

„Игри на гладните: Изгрејсонце на жетвата“ / The Hunger Games: Sunrise on the Reaping

Приказната се случува пред популарната франшиза „Игри на гладните“ и го следи младиот Хејмитч Абернати во време на специјалните 50. Игри на гладните. Премиерата е закажана за 20 ноември 2026.

„Невестата“ / The Bride!

Откако Франкенштајн (2025) освои девет номинации за Оскар, оваа година доаѓа уште една адаптација, но овој пат се фокусира на женското чудовиште.

Филмот „Невестата“ е сместен во Чикаго во 30-тите години од 20 век и го следи осаменото чудовиште (Кристијан Бејл), кое бара помош од докторка да му создаде партнерка. Заедно одлучуваат да оживеат убиено младо девојче, кое станува негова невеста (Џеси Бакли), што предизвикува низа неочекувани настани, вклучувајќи романса и истрага од полицијата.

Филмот го режира Меги Џиленхол, постара сестра на познатиот актер Џејк Џиленхол, кој ќе се појави во филмот, а тука е и Пенелопе Круз. Официјалниот трејлер веќе привлече внимание кај публиката и обожавателите на готската и романтична фантастика. Премиерата се очекува на 6 март.

Џејк Џиленхол Depositphotos

Авантура и акција

„Одисеја“ / Odyssey

Новата адаптација на епската приказна за Одисеј го следи неговото десетгодишно патување дома по Тројанската војна, низ опасни пречки, митски суштества и борби со противници. Филмот ги комбинира спектакуларните визуелни ефекти со интимното прикажување на ликовите, додека актерската екипа ја предводи Мет Дејмон како Одисеј, а режијата носи модерна визија на класикот на Хомер. Премиерата се очекува на 17 јули.

„Приказна за играчките 5“ / Toy Story 5

Во петтиот дел од популарниот анимиран серијал, играчките се соочуваат со нови предизвици додека нивните сопственици растат, а осумгодишната Бони се вљубува во својата нова омилена играчка - таблетот по име Лилипад.

Тука се и продолженијата на нашите омилени суперхеројски саги: „Одмаздници: Судниот ден“ (Avengers: Doomsday), „Спајдермен: Сосема нов ден“ (Spider-Man: Brand New Day), како и втората сезона на „Дардевил: Роден повторно“ (Daredevil: Born Again) и „Џентлмен“ (The Gentleman).