Нова опсесија на македонските туристи: Зошто масовно патуваат во Исланд?

До неодамна далечна и недостижна авантура за македонските туристи, денес Исланд сѐ повеќе се позиционира како достапна опција. Според најновите податоци, интересот за патување во земјата на огнот и мразот достигнува рекордни нивоа и сериозно го менува туристичкиот пазар во државата.

Од агенциите со кои контактиравме велат дека ваквиот тренд укажува на значителна промена во потрошувачките навики на патниците, кои сè повеќе инвестираат во уникатни и автентични доживувања наместо во класичен одмор. За нив, оваа дестинација претставува и нова бизнис-можност.

Depositphotos

Аранжманите што им ги нудат на клиентите најчесто вклучуваат организирани групни тури со водичи, кои не само што го олеснуваат патувањето туку оваа скапа европска земја ја прават значително поисплатлива во споредба со индивидуално организираните излети.

„Годинава бележиме рекорден број на патници во Исланд во споредба со претходните години, кога бројките беа значително помали. Редовно додаваме нови датуми за поаѓање, бидејќи местата многу брзо се пополнуваат“, велат од туристичката агенција „Роум араунд“ (Roam Around).

Во разговор за „Блумберг Адрија“, оттаму посочуваат дека интересот не доаѓа само од млади авантуристи туку и од постари патници, кои бараат поинакво искуство.

„Нудиме различни пакети со цени што започнуваат од 889 евра по лице, додека за оние што сакаат да го истражат целиот остров се достапни и подолги тури од 1.299 евра. Сите аранжмани вклучуваат авионски летови, сместување со појадок, локален претставник, македонски водич и повеќе од 35 излети, сè со цел да обезбедиме комплетно и незаборавно патничко искуство“, велат од „Роум арaунд“.

Depositphotos

Во споредба со минатата година, речиси за 100 отсто е зголемен бројот на резервации за Исланд и во „Џангл трајб“ (Jungle Tribe), а аранжманите чинат речиси исто. Просечната цена на организирано патување преку оваа туристичка агенција се движи од 999 до 1.199 евра, исто во зависност од типот на аранжманот, но и од сезоната. Во оваа сума се вклучени авионски билет, сместување, сите трансфери, како и претставник од агенцијата.

„Нашите патувања се значително поекономични од самостојна организација, а Исланд веќе станува подостапна дестинација дури и од многу европски метрополи како Амстердам или Париз“, истакнуваат од „Џангл трајб“.

И кај нив нема доминантна возраст кога станува збор за профилот на патници. Оттаму велат дека на нивните екскурзии може да сретнете луѓе од 18 до 80 години, без разлика дали се друштва, двојки или соло-патници.

Комбинацијата од активна природа и спектакуларни пејзажи и желбата за автентично и многу помирно искуство далеку од вообичаените европски рути, тие ги наведуваат како клучни причини за зголемената побарувачка.

Depositphotos

И од „Роум араунд“ велат дека патниците најчесто го избираат Исланд поради уникатната природа.

„Спектакуларните водопади, црните плажи, глечерите, гејзерите, гледањето китови, уживањето во природните термални бањи и, секако, поларната светлина го прават ова патување незаборавно“, велат тие.

Доживувањето на еден од најфасцинантните природни феномени аурора бореалис е наведено како врвно искуство што мора да се доживее и во програмата на агенцијата „Џангл трајб“, каде што високо на листата котираат и спектакуларните водопади Гулфос и Скоугафос, фасцинантната црна плажа Рејнисфјара и најпознатата термална бања Сина лагуна.

Од „Џангл трајб“ дополнуваат дека во изборот на атракции и активности голем удел имаат и социјалните медиуми. Според нив, луѓето гледаат неверојатни видеа и фотографии и сѐ повеќе сакаат да го доживеат тоа лично.

Depositphotos

„Телевизиските серии и документарци што ја прикажуваат природата на Исланд, како и влијанието на инфлуенсерите на Тикток и Инстаграм, многу ги зголемуваат свеста и интересот“, истакнуваат од оваа агенција.

Нашите соговорници се едногласни дека иако Исланд годинава неочекувано се најде меѓу најбараните дестинации кај нас, оваа островска држава во северниот дел на Атлантски Океан сѐ уште е една од најскапите во Европа и бара внимателно планирање на буџетот. Ограничените локални ресурси, високиот стандард на живеење, географската изолираност и строгите еколошки регулативи се главните причини за тоа.

„Локалното население вели дека Исланд е толку скап затоа што целата неверојатна природа и туристичките атракции се бесплатни за посетителите, па затоа другите трошоци, како храна, ресторани и кафе-барови, се повисоки“, коментираат тие.

 

Во моментов нема коментари за веста. Биди прв да коментира...

Остави коментар