Сè повеќе Македонци патуваат сами: Кои пет дестинации им се омилени?

Пазарот на соло-патувања урива рекорди, покажа пролетниот извештај на „Ербиенби“. Од компанијата објавија дека самостојните пребарувања на нивната платформа пораснале дури за 90 отсто.

Иако интересот за овие патувања никогаш не бил поголем, тие не се нов феномен. Во минатото често се поврзуваа со духовни екскурзии или авантуристички експедиции, но сега стануваат водечки тренд во туристичката индустрија.

Луѓето сѐ почесто сакаат да го истражуваат светот на свој начин благодарение на развојот на технологијата, подобрената инфраструктура и зголемениот фокус на индивидуализмот во општеството, кој е особено забележлив по пандемијата. Мотивите за ваквиот начин на патување се различни. Туристите покажуваат широк спектар од лични и емотивни потреби што овие авантури може да им ги исполнат, а најчесто ги наведуваат следните: опуштање и бегство од секојдневниот живот, самостојност и себеспознание, слобода во одлучувањето, избегнување на рутината и запознавање нови луѓе. Сè повеќе такви туристи има и меѓу македонските патници.

„Многумина од нив патуваат на дестинации како Занзибар, Малдиви, Бали, Јапонија, Исланд, Индија, Куба или Шри Ланка. Тоа што го забележуваме е дека луѓето сè повеќе бараат автентично искуство, личен раст, и пред сè - слобода. А токму тоа го добиваат кога патуваат сами, но во група што ја води искусен водич и е составена од истомисленици“, велат од туристичката агенција „Џангл трајб“ (Jungle Tribe).

Во разговор за „Блумберг Адрија“ оттаму посочуваат дека речиси на секое поаѓање имаат по неколку соло-патници, кои од неодамна почнаа дури и да ги рекламираат, како што е наведено во огласот, за да може да им најдат другар за патување (Travel Buddy), со цел да се избегне доплатата за еднокреветна соба.

Такви аранжмани во моментов се нудат за пет атрактивни дестинации. Најевтина е септемвриската тура за „царска Русија“, која чини 1.399 евра, но во цената не се пресметани факултативните излети и влезниците за културно-историски споменици. Есенската тура за Јапонија, пак, е најскапа и за неа треба да одвоите најмалку 2.099 евра.

Женска доминација

Повеќе светски истражувања покажаа дека соло-патувањата се најпопуларни кај генерацијата зед, а сѐ поголем интерес за нив покажуваат и милениумците. Според податоците на „Виртуозо“ (Virtuoso), агенција специјализирана за следење на туристичките трендови, денес повеќе од 70 отсто од соло-патниците се жени, а на ваква авантура се одлучуваат и сѐ повеќе Македонки.

Depositphotos

„Имаме многу соло-патници во нивните 40-ти и 50-ти, па дури и 70-ти, особено жени, кои првпат се охрабруваат на ваков чекор, а потоа се враќаат со нова енергија и едвај чекаат да се одлучат за следната дестинација“, велат од „Џангл трајб“.

За соло-патниците што тие ги опслужуваат велат дека се луѓе што не чекаат „да се собере друштвото“, туку сакаат да се движат самостојно, да го запознаат светот, но и себеси. Нивното искуство покажува дека овој тип на патници се најчесто отворени, љубопитни и подготвени за нови познанства.

„Нашиот типичен соло-патник е авантурист по дух, отворен за нови култури, не се плаши да проба нешто поинакво и има желба да се поврзе со луѓе истомисленици. Патниците кај нас не се обични ‘туристи’, туку трагачи по искуства што сакаат да ја пробаат уличната храна во Ханој, да спијат под ѕвезди во Јордан, да вежбаат јога на Бали или да пливаат со ајкули на Малдиви“, велат од познатата српска агенција, која веќе петта година е присутна на македонскиот пазар.

Иако предностите за соло-патувања се големи, сепак постојат и одредени предизвици со кои првенствено се соочуваат оние што заминуваат на ваков одмор во сопствена режија. Тие мора добро да се информираат за дестинацијата пред да ја посетат. Целата организација паѓа на нивен грб, па понекогаш може да се почувствуваат навистина осамено. За повеќето соло-патници, пак, што користат агенциски услуги, главен предизвик најчесто се финансиите.

Kаде најдобро ќе се осознаете себеси?

Од „Џангл трајб“ истакнуваат дека сите нивни патувања се погодни за соло-патници, но за пет дестинации во моментов владее најголем интерес. Во продолжение ни открија кои се топ 5 дестинации, но и ни образложија зошто баш тие места се идеални за соло-патувања.

1. Занзибар

Вистински хит кај соло-патниците поради балансот меѓу авантура и релаксација. Безбедна земја со пријателски локалци, одлична храна и тропска атмосфера. Идеална е за први соло-искуства со многу дружење, предобри плажи и културни откритија.

Занзибар Depositphotos

2. Индонезија

Бали е место со посебна енергија - духовно, мирно, но и полно со живот. Соло-патниците го сакаат поради јогата, природата, локалната култура и можноста да се поврзат со себе и со нови луѓе од целиот свет. Сите поаѓања за Бали ги комбинираме со Сингапур и Куала Лумпур, па патниците имаат можност да посетат три азиски држави во еден здив.

Индонезија Depositphotos

3. Јапонија

Совршена за оние што сакаат културен шок во најпозитивна смисла. Ултрабезбедна, организирана, со неверојатна мешавина од традиција и технологија - идеална за љубопитни и самостојни патници што сакаат нешто поинакво.

Јапонија Depositphotos

4. Исланд

За љубителите на природа и помирни авантури оваа земја е рај за соло-истражувачи. Гејзери, водопади, северна светлина, бањи и спектакуларни пејзажи - патување што инспирира и нуди моменти на целосен мир, но и пријатна групна динамика.

Исланд Depositphotos

5. Куба

Можеби е изненадување, но Куба стана хит меѓу соло-патниците. Полна е со боја, музика, енергија и љубезни луѓе. Од живата Хавана до една од најубавите плажи во светот - Варадеро, ова патување дефинитивно се памти доживотно.

Куба Depositphotos