Производите за нега на кожата на д-р Барбара Штурм (сега дел од „Пуиг брендс“ - Puig Brands SA) се стандард во бањите на луксузните хотели - и во домашните плакари на тие што престојуваат таму. Нејзини лојални обожаватели се Викторија Бекам, Анџела Басет и Стела Мекартни. Германската „пионерка на антиинфламаторната нега“, чија оригинална област беше ортопедија, ја одбележува првата деценија од нејзината истоимена линија со лансирање нови производи, како што е маслото за лице „церамид дропс“ (Ceramide Drops) за хидратација и сјај, како и со отворањето нов спа-центар и бутик во „Мајами дизајн дистрикт“ (Miami Design District).
Штурм обично лета најмалку 100.000 милји годишно, иако минатата година забави. „Порано летав во Америка на секои две секунди“, вели таа, што речиси ѝ го донесе највисокиот статус на чест патник на „Луфтханза“ (Lufthansa): „Бев речиси ‘почесна членка’, а тоа не беше добро. Решив дека треба малку да забавам.“
Таа сè уште се потпира на летовите од прва класа на „Луфтханза“ за трансатлантските рути, каде што има само осум седишта во целиот авион. „Секогаш сакам да сум малку одвоена и сакам да го користам тоалетот, кој е многу чист“, вели таа. Плус, удобноста ѝ овозможува да оди на работа веднаш по слетувањето. „Ако не стигнам таму одморена, тоа е само губење време и енергија.“
Денес Штурм поминува повеќе време дома во Гштад, Швајцарија (нејзината помлада ќерка, која има 10 години, е страсна скијачка), но сè уште има многу мудрости за тоа како добро да се патува. „Пораснав во Источна Германија и не ни беше дозволено да патуваме. Беше како затвор. А, сега не правам компромиси кога станува збор за квалитетно патување“, вели Штурм.
Гштад, Швајцарија | Depositphotos
Шише со топла вода е тајната за удобност во ладен авион
„Сакам да носам топла вода со себе. ‘Луфтханза’ е секогаш доста ладна. Често климатизацијата е пресилна или греењето не е доволно. Мојот фаворит за одржување на топлината, особено на долги летови, е ‘White Company Super Soft faux fur hot water bottle’“.
„И секогаш носам со себе капки за нос за да не настинам; ми се допаѓа маслото за нос ‘колдистоп’ (Coldistop). Авионите можат да бидат расадник за размножување вируси и бактерии, па затоа е најдобро да го одржувате носот хидриран. Неколкупати одев кај еден доктор во Марина дел Реј, д-р Ричард Шулце. Тој препорачуваше додатоци во исхраната и различни работи, вклучувајќи антисептички спреј направен од лимон или грејпфрут, кој го прскам насекаде околу себе кога ќе се качам во авион.“
Амалфи, Италија | Depositphotos
Како да ги избегнете туристите ако го посетите Амалфи во лето?
„Одиме во Позитано одново и одново. Престојуваме во ‘Вила Тревил’ (Villa Treville), старата вила на Зефирели со само неколку соби; всушност таму го поминав периодот на ковид - мислам дека бев таму четири месеци. Погледот на Позитано е прекрасен, но малку сте изолирани. Потоа, се возиме со брод насекаде по таа рута. На брегот на Амалфи мора да патувате по вода. Одете во ‘Ло Скољо’ (Lo Scoglio), моето омилено место, и во ‘Касаи’ (Kasai) во Прајано.“
Некои од најубавите пејзажи во светот денес се недостапни за повеќето патници
„Сибир беше неверојатен. Природата е зачудувачка. Би се вратила таму веднаш само поради природата. Летавме со хеликоптер над фјордовите, што беше одлично - веројатно се нарекуваат поинаку во Сибир, но јас би ги нарекла фјордови. Но, не знам кога ќе можеме да се вратиме.“
Белука - највисок врв на Сибир | Depositphotos
Постои само едно место во светот каде што можам навистина да се опуштам
„Првпат отидов на Малдивите во 2013 година. Станувате рано, вежбате, шетате по плажа. Се опуштате бидејќи нема многу друго што да се прави. Принудени сте да се опуштите, што е речиси невозможно за мене; се чувствувам како да сум работохолик 24/7. Пијам само вода. Нема шампањ - тоа таму не е нешто што треба да се има. Имаат спа-третмани што нема да ги најдете никаде на друго место. Две недели здрав живот.“
Најдобриот начин да ги совладате пазарите во Париз е фокусирањето
„Ако одите на уличните пазари (Marché aux Puces) во Париз, мора да одлучите што сакате да купите. Јас не одам насекаде бидејќи тогаш ќе бидам уморна и исцрпена, а тоа не е забавно. Дали овој пат барате мебел? Или можеби винтиџ облека? Има една мала продавница на големиот пазар лево, ‘Артемиз ет Кунигонд’ (Artemise et Cunegonde). Имаат неверојатна винтиџ облека. Секогаш наоѓам нешто таму. Купив јакна со кратки ракави од ‘Готје’ од 1990-тите, стари капути од ‘Хермес’ што повеќе личат на наметки и стара бомбер-јакна од ‘Шанел’. Сите секогаш ме прашуваат каде сум ја купила.“
Ако плански ги посетите уличните пазари во Париз, може да најдете брендирани винтиџ парчиња, и тоа многу евтино | Depositphotos
Гштад, како и многу скијачки градови, е најдобар надво од сезона
„Повеќето луѓе доаѓаат во Гштад сезонски или за време на викенди, но надвор сезона е одлично поради заедницата. Тоа е многу енергично, уникатно место. Најдобриот ресторан за мене е ‘Ресли’ (Rössli) во Фојтерсеј, кој е оддалечен на само десет минути. Тие имаат неверојатна свежо приготвена пита од јаболка. Второто најдобро место е веројатно ‘Зоненхоф’ (Sonnenhof), и сите велат дека строганов со рести е најдоброто јадење (строганов послужен со крцкави швајцарски компири - rösti).
Во ‘Гранд Шале’ (Grand Chalet) мора да ги пробате ракчињата кајзер, кралските ракчиња. Најдобрата тура е околу езерото Арнен: гледате мали водопади и можете да пливате во езерото. Понекогаш во ноември одам таму да пливам.“
Околина на Гштад и езерото Арнен | Depositphotos
Без стрес на аеродромот? Најдете аеродром на кој комерцијалните авиони не ги блокираат пистите
„Мојот омилен аеродром е ‘Заанен Гштад’ (Saanen Gstaad). Пристигнувам со автомобил, се качувам на авион, а потоа ме носат каде било во Европа. Кога се враќам, по две минути сум дома. Тоа е едноставно најдоброто нешто досега. Сè е приватно, нема комерцијален сообраќај.“
.webp){kind=icon}
