Балонот на вештачката интелигенција доаѓа до точка на пукање

Милијардерот Реј Далио предупреди дека вештачката интелигенција е „класичен балон“ што се приближува до точката на пукање поради растот на каматните стапки и потребата богатството да се претвори во готовина.

Говорејќи на глобалната конференција на извршни директори на „Форбс“ во Сингапур во средата, Далио рече дека се презема огромен долг за финансирање на ВИ. Како што каматните стапки продолжуваат да растат, се стигнува до точката во која балонот почнува да пука.

„Се наоѓаме во делот од циклусот што ѝ претходи на таа точка, но се приближуваме кон неа“, рече основачот на „Бриџвотер“ (Bridgewater). „Мислам дека сме блиску до неа.“

Неговите коментари доаѓаат во време кога технолошките гиганти трошат стотици милијарди долари на ВИ, сè повеќе финансирани со долг, а растот на пазарите се концентрира во мал број акции. Приносите на обврзниците низ светот се искачија на највисоките нивоа во последните децении, зголемувајќи ги трошоците за финансирање на огромните инвестиции потребни за изградба на инфраструктурата за ВИ.

Сепак, вреднувањата на акциите продолжуваат да растат, а оптимизмот околу заработката на технолошките компании ги поттикна индексите S&P 500 и Nasdaq 100 да достигнат рекордни нивоа оваа недела.

Далио, кој долго време предупредува на балон на ВИ, рече дека има и други фактори што би можеле да предизвикаат негово пукање. Меѓу нив се даноците на богатство и другите обиди нереализираните добивки да се претворат во готовина.

„Сите велат: ‘Моето богатство вреди милијарда долари’, но добро, обидете се да ги потрошите“, додаде тој. „За да ги потрошите, мора да продадете дел од богатството за да добиете пари - и токму тогаш балонот обично пука.“