Насочувањето на трговската инфраструктура на Волстрит кон системи базирани на блокчејн може да ги забрза финансиските кризи пред можноста на регулаторите да реагираат, иако оваа технологија ветува намалување на трошоците и елиминирање на доцнењата при порамнување на трансакциите, предупредува Меѓународниот монетарен фонд (ММФ).
Токенизацијата – процес на претставување на средства како акции, обврзници и готовина како дигитални токени на заеднички дигитални книги – претставува структурна трансформација на финансиската архитектура, а не само маргинално подобрување на ефикасноста, наведува Тобијас Адријан од ММФ.
Банки, клириншки куќи и управувачи со средства, меѓу кои и BlackRock и JPMorgan, веќе спроведуваат пилот-проекти за тестирање на технологијата, со надеж дека ќе ги зголемат приходите преку олеснување на тргувањето со традиционални финансиски инструменти.
Во септември, Nasdaq побара одобрение од американската Комисија за хартии од вредност за да овозможи токенизација и тргување со акции на регулирани пазари, додека Њујоршката берза објави дека развива платформа базирана на блокчејн за 24-часовно тргување со токенизирани акции и ETF фондови.
Технологијата овозможува побрзо извршување на трансакциите, но тоа што се смета за предност може да претставува и ризик. Според Адријан, кризите би можеле да се развиваат многу побрзо, оставајќи помалку време за интервенција на регулаторите. Досегашните доцнења во порамнувањето служеле како „тампон-зона“ што им дава време на централните банки да реагираат во кризни ситуации.
Во систем со моментално порамнување и континуирано функционирање, регулаторите имаат многу помал простор за реакција пред да се активираат финансиските притисоци. Дополнително, ваквиот систем работи 24 часа, додека инструментите за итна ликвидност на централните банки се дизајнирани за кризи во работно време.
Извештајот исто така предупредува дека приватно издадените стабилни криптовалути, кои сè почесто се користат за порамнување, имаат сличности со фондовите на паричниот пазар – стабилни во мирни услови, но подложни на масовни повлекувања во време на криза.
ММФ разгледува три можни сценарија за развој на токенизираните финансии: координиран систем поддржан од дигитални валути на централните банки, фрагментиран систем со неусогласени национални платформи, или доминација на приватни стабилни валути со ослабена улога на јавните институции.
Според Адријан, креаторите на политики мора проактивно да одговорат на промените што ги носи дигиталната трансформација, со јасни правила и безбедни механизми за порамнување. „Прозорецот за обликување на идната архитектура на токенизираниот финансиски систем е отворен, но нема да остане таков засекогаш“, се наведува во извештајот.
.webp){kind=icon}
