Компанијата „Мета“ (Meta Platforms Inc.) воведува функции за вештачка интелигенција (ВИ) во своите апликации што ќе им овозможи на трите милијарди корисници искуство слично како она што го овозможува ЧетГПТ (ChatGPT) на „Опен еј-ај“ (OpenAI).
Уникатно креирање стикери, уредување слики и мноштво четбот-ликови на славни личности - сите со генеративна вештачка интелигенција - доаѓаат на Инстаграм, Месинџер и Ватсап, соопшти компанијата во средата на својата годишна конференција за програмери „Конект“ (Connect). „Мета“ исто така воведува програмерско студио за брендовите да создадат свои специфични алатки за вештачка интелигенција во услугите за пораки на компанијата што може да се користат за разговор со клиентите.
„Напредокот во вештачката интелигенција ни овозможува да создадеме различни персонификации од вештачка интелигенција што ќе ни помогнат да извршиме различни работи“, изјави главниот извршен директор на „Мета“, Марк Закерберг, за време на својот главен говор. „Нашиот став е дека луѓето ќе сакаат да комуницираат со еден куп различни ВИ за различни работи што сакаат да ги направат“.
Ова е важна објава за „Мета“, што покажува дека и таа може да изгради технологија базирана на вештачка интелигенција што генерира текст и слики врз основа на едноставни инструкции од корисниците. „Гугл“ (Google), „Снеп“ (Snap Inc.) и „Мајкрософт“ (Microsoft Corp.) веќе воведоа различни алатки за да го искористат интересот на јавноста и на инвеститорите за новата технологија. „Мета“ зад сцената направи рекордни инвестиции за да создаде инфраструктура за вештачка интелигенција, додека Закерберг навестуваше многу од овие идеи кон потрошувачите во обид да потврди дека компанијата е исто така конкурент во трката за вештачка интелигенција.
Алатките за вештачка интелигенција претставени во средата ќе им изгледаат попознато на оние што брзо ги испробуваа функциите за ВИ преку разните четботови, четот или создавачот на самослик „Мај еј-ај“ (My AI) на „Снеп“ и услугата за уредување слики „Фајрфлај“ (Firefly) на „Адоби“ (Adobe Inc).
Вештачката интелигенција на „Мета“ е нов четбот базиран на текст, кој работи на база на големиот јазичен модел Лама 2 (Llama 2) и ќе користи информации за пребарување во партнерство со Бинг (Bing) на „Мајкрософт“. Компанијата го категоризира како дигитален асистент, кој може да одговара на прашања за информации во реално време или да се користи за генерирање слики.
.webp){kind=icon}
Во моментов нема коментари за веста. Биди прв да коментира...