Oпции за пробив на Фејсбук и на Инстаграм кога правилата се менуваат

Компанијата „Мета“ на Марк Закерберг планира во Европа да наплаќа по 14 долари месечно за корисниците што сакаат Фејсбук и Инстаграм без реклами.

Доколку корисниците во ЕУ не прифатат месечна претплата, тие мора да се согласат платформата да ја следи нивната дигитална активност за целно рекламирање, објави неодамна „Волстрит журнал“ (Wall Street Journal) .

Компанијата ги предложи претплатите за налози без реклами како одговор на Законот за дигитални услуги на Европската Унија, кој стапува во сила на 1 јануари 2024 година. Новите правила ќе ја ограничат можноста на платформите да прикажуваат персонализирани реклами без претходно да се побара согласност, што би можело да биде многу важно за бизнисите како „Мета“.

Размислете колкупати сте се одлучиле да набавите некој производ откако ви се појавил на Инстаграм или на Фејсбук? Тоа е токму поради нивните прецизни алгоритми, кои инстантно ви пласираат објави и производи што ги селектираат како најсоодветни за вас, честопати водејќи се од она за што покажувате афинитет при вашите онлајн пребарувања.

Ова само покажува дека иако за многумина од нас социјалните мрежи се можност за запознавање нови и поврзување со стари пријатели, извор на информации и забавни содржини, во заднина тие се моќна машинерија за рекламирање и промоција на производи. 

Но како се креираат цените за огласување, какви тактики и механизми користат огласувачите во моментов за успешна промоција на своите производи и услуги и колку значи овој бизнис за компаниите за социјално вмрежување?

„Мета“ на Марк Закерберг, логично, најмногу заработува од рекламирање бидејќи во свој посед има две од најголемите платформи. „Говориме за суми во милијарди долари“, вели Жељка Мештровиќ, експертка за социјални мрежи од Хрватска.

„Годинава во кварталот што заврши во јуни објавија раст од 11 отсто, што иако е вкупна заработка, не само од огласувачи, во конкретни бројки значи 32 милијарди долари“.

Принципот е „колку пари, толку музика“, но не секогаш

Во рекламирањето на социјалните мрежи обично важи принципот „колку пари, толку музика“ и иако порано бизнисите можеа и со вложени 10 долари да забележат некаква разлика на своите страници, денес таа сума практично не значи ништо.

Рекламите на Фејсбук и на Инстаграм се продаваат во конкурентско опкружување, па нивната цена во голема мера е зависна од понудата и побарувачката.

Поконкретно, постојат три фактори што ги сочинуваат трошоците за рекламирање: понудата и побарувачката, кои веќе ги споменавме, ползата што ја добиваат корисниците од вашата реклама и проценетите стапки на акција, посочуваат од специјализираната софтверска компанија „Ривилбот“ (Revealbot).

Кога поставувате рекламна кампања на Фејсбук и на Инстаграм, имате пристап до многу алатки и поставки што ќе ви помогнат да ги контролирате трошоците за рекламирање. На трошоците може да се гледна на два начина: колку сакате да потрошите за кампања или колку сакате да потрошите по резултат.

Можете директно да го контролирате износот што сакате да го потрошите на рекламна кампања, на пример 5 долари или 5.000 долари неделно, но не можете директно да ги контролирате износот за секој поединечен резултат што ќе го добиете (на пример купување, преземање или еден клик).

Но услов за вашата популарност на социјалните мрежи не се само високите суми, барем не кога станува збор за „Мета“. Дури и гигантите имаат свои стравови и проблеми. За империјата на Закерберг тоа е Тикток на кинескиот „Бајтденс“.

Со кратките видеосодржини, особено популарни меѓу генерацијата зед (Z), оваа платформа во еден здив воспостави доминација над виртуелниот простор. Во борбата за превласт, платформите на „Мета“ беа принудени да се адаптираат, па, така, сега и тие сè  повеќе се вртат кон овие видеосодржини и се борат да ги привлечат креаторите на истите тие. Оттука и ги популаризираа т.н. рилови (reels).

За да се рекламираш на Инстаграм размислувај како инфлуенсер

Но што значи тоа за огласувачите? Тоа најдобро може да се согледа преку налозите на новинските агенции на Фејсбук, чии објави сега досегаат до многу помал број корисници. Дури и кога ги спонзорираат своите објави со информации, тоа ќе има многу помал ефект отколку кога своја објава би спонзорирале влогери, сопственици на мали претпријатија (на пример занаетчии) и слични страници.

Од ова произлегува дека „Мета“ сега многу повеќе внимава кој и каков вид на содржина спонзорира отколку колку пари вложува за тоа. Притоа, поголема предност имаат кратките видеосодржини, малите бизниси и независните креатори, бидејќи компанијата на своите мрежи сака да им изгради имиџ на поддржувачи на истите тие.

„Колку за илустрација, 50 долари се сосема доволни за мала страница да ја види разликата, но за новинска агенција со неколку илјади или милиони следбеници тоа не значи ништо и потребно е да се инвестираат најмалку 100 долари по објава. Значи, двојно“, појаснува Мештровиќ и додава дека за месечно одржување страница со поголема фреквенција се потребни неколку илјади долари.

Во суштина, целта на „Мета“ е да го зголеми времето што корисниците го минуваат на Фејсбук и на Инстаграм, а премногу лоши реклами во фидовите ќе придонесат тие да си заминат. Затоа, ако имате реклама чии перформанси не се добри и на луѓето не им се допаѓа, ќе мора да платите повеќе за платформата да ја дистрибуира до повеќе корисници. Од друга страна, ако креирате реклама со содржина што им се допаѓа на луѓето, нема да мора да плаќате толку многу затоа што на тој начин помагате Инстаграм и Фејсбук да бидат посакувана средина за корисниците.

Формулата е јасна, но само на хартија

Третиот фактор во однос на трошоците за рекламирање посочен од „Ривилбот“ е т.н. проценета стапка на акција, која е мерење на очекуваната вредност на огласувачот. Фејсбук најчесто го мери тоа врз основа на тоа колку добро вашата реклама ја постигнува целта што сте ја поставиле за неа.

Од сето ова може да се заклучи дека сумата за рекламирање на Фејсбук и на Инстаграм се формира врз основа на неколку фактори, кои прикажани како формула би изгледале на овој начин:  

Сепак, сите овие математички процеси се случуваат во заднина. Како огласувач, сè што треба да направите е да го одредите буџетот за вашата кампања, да го насочите фокусот кон целење на вистинската публика за вашиот производ и, секако, да ја направите најдобрата реклама што можете. Ако го сторите тоа, ќе ги намалите трошоците за вашите реклами на социјалните мрежи, уверуваат од „Ривилбот“.

Каква е ситуацијата на Линкдин?

Линкдин во сопственост на „Мајкрософт“ е платформа за деловно вмрежување и, оттука, има поинаков имиџ и пристап кон рекламирањето. Дозволува огласување само на англиски јазик, кое е многу скапо.

„На пример, потребни се минимум 100 евра за да се видат некакви ефекти од бустирано видео, малку е поевтино за обична објава или статија. Тие имаат многу построги правила, така што потешко е да добиете право за нешто да се спонзорира, а кога ќе добиете право, цените се доста високи“, вели Мештровиќ.  

Таа посочува дека, секако, досегот на објавите е подобар за страниците што плаќаат, но смета дека Линкдин е платформа на која може да се постигне успех и без претерано трошење пари.

„Јас лично не гледам никакви придобивки од спонзорирањето, особено што Линкдин ги фаворизира креаторите што редовно објавуваат и имаат квалитетна содржина. Значи, плаќањето не може да ви помогне ако содржината што ја рекламирате е лоша“, заклучува таа.

Што носи иднината за огласувањето на социјалните мрежи?

Се враќаме на идејата на „Мета“ да наплаќа по 14 долари месечно за корисниците што сакаат Фејсбук и Инстаграм без реклами.

Од една страна, доколку ваквите претплати станат популарни меѓу корисниците, тоа може значително да го намали бројот на луѓе што гледаат реклами на Инстаграм и Фејсбук, што за некои огласувачи ќе значи дека ќе треба да ги преиспитаат своите стратегии и да инвестираат во алтернативни платформи. 

Од друга страна, се разбира, голем фактор што може да има пресудно влијание е и цената на услугата, 14 долари месечно може да изгледаат навистина многу за корисниците што историски се навикнати бесплатно да ги користат овие апликации.

Исто така, не е јасно дали регулаторите веруваат дека предлогот на „Мета“ е ефектно решение за нивната загриженост околу приватноста и тие може да побараат од компанијата да предложи поевтина понуда.

„’Мета’ верува во вредноста на бесплатните услуги што се поддржани од персонализираните реклами. Сепак, продолжуваме да истражуваме опции за да се осигуриме дека сме усогласени со регулаторните барања, кои постојно се менуваат. Немаме ништо повеќе да споделиме во овој момент“, изјави месецов портпаролот на „Мета“.

Во моментов нема коментари за веста. Биди прв да коментира...

Остави коментар