Производството на „Епл“ се зголемува, новиот ајпад про пристигнува во мај

Прекуокеанските доставувачи на „Епл“ (Apple Inc.) го зголемија производството на долгоочекуваните нови ајпади (iPad) на компанијата и планирано е лансирање на почетокот на мај, според упатени извори.

Промоцијата ќе се фокусира на обновени верзии на ајпад про (iPad Pro) и ајпад ер (iPad Air), велат лица што побарале да не бидат идентификувани бидејќи плановите не се јавни. Како што претходно објави „Блумберг њуз“, моделите про ќе добијат нови поквалитетни ОЛЕД-дисплеи, додека ајпад ер за првпат ќе добие опција за екран од 12,9 инчи.

Овој потег означува крај на најдолгиот период без нови модели во историјата на ајпад, кој првпат беше претставен од соосновачот на „Епл“ (Apple), Стив Џобс, во 2010 година. Поминаа околу 18 месеци од последните ажурирања  - суша што ја зголеми и така слабата побарувачка за таблети. „Епл“ се обложува дека новите модели, со побрзи чипови и обновени додатоци, можат да помогнат да се поттикне ренесанса во оваа категорија на уредот.

По налетот за време на пандемијата, продажбата на ајпад опадна во секоја од последните две фискални години на компанијата, кои траат до септември. Тие претрпуваа дополнителен пад од 25 отсто од година на година за време на последниот празничен период, кога уредите вообичаено беа популарни подароци.

Портпаролката на „Епл“ со седиште во Купертино, Калифорнија, одби да коментира.

Моделите на ајпад про - со кодно име J717, J718, J720 и J721 - ќе работат со новиот чип M3 и ќе функционираат со редизајнирани верзии на меџик киборд (Magic Keyboard) и епл пенсил (Apple Pencil). Ажурирањето го претставува првиот ремонт на тие детали од 2018 година.

Во меѓувреме, ајпад ер последен пат беше ажуриран во 2022 година, со чипот M1. Тој ќе добие нов процесор, а големината на екранот од 12,9 значи дека потрошувачите можат да добијат голем ајпад за помалку пари од поопремениот про. Сегашниот ајпад ер има почетна цена од 599 долари, додека линијата про чини 200 долари повеќе.

„Епл“ планираше да ги објави новите ајпади до крајот на март или почетокот на април, но компанијата работи на завршување на софтверот за уредите. Екраните во најновите модели бараат и нови сложени производствени техники, кои придонесоа за доцнењето.

Објавувањето на производот во почетокот на мај ќе дојде околу еден месец пред следниот голем настан на „Епл“. На 10 јуни компанијата планира да ја започне својата светска неделна конференција за програмери. Таму се очекува „Епл“ да ја претстави обновената стратегија за примена на вештачка интелигенција - заедно со ажурирањата на софтверот за ајфон (iPhone), ајпад (iPad), епл воч (Apple Watch), мек (Mac) и вижн про (Vision Pro).