.webp){kind=icon}
„Мајкрософт“ (Microsoft Corp.) и „Алфабет“ (Alphabet Inc.), сопственик на „Гугл“, во четвртокот испратија јасна порака до инвеститорите: „Нашето трошење за вештачка интелигенција (ВИ) и облак-технологии се исплати“.
Компаниите ги надминаа процените на Волстрит со своите најнови квартални резултати, поттикнати од растот на приходите од облак и делумно поттикнати од зголемената употреба на услугите за вештачка интелигенција. Тоа ги зголеми акциите на двете компании во доцното тргување, при што „Алфабет“ скокна за 17 отсто, а „Мајкрософт“ за 6,3 отсто.
Технолошките гиганти, инаку, беа „заглавени“ во жестока битка за доминација на полето на вештачката интелигенција, а „Мајкрософт“ ги здружи силите со стартапот „Опен еј-ај“ (OpenAI), со цел да го надмине „Гугл“, кој беше лидер во интернет-пребарувањето за две децении. Сепак, резултатите од четвртокот покажуваат дека има голем простор за раст и за двете компании.
Силициумската Долина ја поздрави 2024 година како година кога компаниите ќе започнат со примена на генеративна вештачка интелигенција - технологија што може да создава текст, слики и видеа врз основа на едноставни команди. Во повиците за заработка, директорите од „Алфабети“ и од „Мајкрософт“ рекоа дека ВИ-програмите го водат бизнисот на нивните облак-оддели.
„Корпоративните клиенти се поотворени за долгорочни инвестиции во нивната облак-инфраструктура“, рече Тејас Десаи, истражувачки аналитичар во „Глобал екс“ (Global X ETFs). Тоа помогна да се направи понекогаш нестабилната индустрија посигурна.
„Сосема е јасно врз основа на овие приходи од 'Мајкрософт' и 'Гугл' дека побарувачката за облак-инфраструктура почнува да се нормализира“, рече Десаи, додавајќи: „Основната облак-инфраструктура покажува здрав раст“.
Зголемувањето на побарувачката за облак-технологии доаѓа како кец на десетка за „Гугл“, кој е долго зад „Амазон“ и „Мајкрософт“. Откако минатата година за првпат го достигна најниското ниво, облак-бизнисот на „Гугл“ објави профит во првиот квартал од годинава од 900 милиони долари; тоа беше многу над проекциите на аналитичарите од 672,4 милиони долари. Облак-сегментот се смета за еден од најдобрите „облози“ на „Гугл“ за раст, бидејќи неговата основна дејност - онлајн рекламирањето - полека старее.
„Гугл клауд (Google Cloud) во голема мера беше слаба точка за време на повиците за заработка на 'Алфабет' со години“, рече Ли Сустар, главен аналитичар во „Форестер“ (Forrester Research Inc). „Најновите резултати покажуваат дека понудите на Гугл клауд не само што ги поттикнаа деловните клиенти да се преиспитаат туку и да потрошат посериозни пари“, вели тој.
