Го тестиравме новиот „ајфон 16е“: Вреди ли да се купи?

По неколку дена користење „ајфон 16е“ (iPhone 16e), јасно ми е зошто овој модел предизвикува поделени реакции. „Епл“ (Apple) конечно го напушти застарениот дизајн на „ајфон ес-и“ (iPhone SE) и донесе уред со помодерен изглед, но со некои неизбежни компромиси. Иако нуди солидни перформанси и долготрајна батерија, останува прашањето дали вреди да се дадат 759,99 евра за телефон со оглед на цената и она што (не) го нуди.

Брз, но не за гејмери

Во денешно време паметните телефони станаа неизоставен дел од нашиот живот, со просечно време на користење од околу 4,1 часа дневно. Со оглед на тоа, при купување нов уред, траењето на батеријата и вкупните перформанси често се меѓу најважните критериуми за корисниците.

И покрај тоа што „ајфон 16е“ е најповолниот модел во серијата, во работата нема компромиси - чипот A18 работи одлично. Апликации како Тикток (TikTok) и Јутјуб (YouTube) се отвораат брзо, а уредот е флуиден без никакви проблеми. Скролав со часови, одев од апликација на апликација и гледав видеа без никаков застој. Во тој дел искуството беше навистина пријатно. Кога би ми бил главен телефон, верувам дека батеријата би издржала цел ден.

Меѓутоа, ситуацијата е малку поинаква кога станува збор за видеоигри. Го испробав на популарните игри „Вадеринг вејвс“ (Wuthering Waves) и „Инфинити Ники“ (Infinity Nikki). „Епл“ тврди дека „ајфон 16е“ има најдобра батерија од сите 6,1-инчни „ајфони“, овозможувајќи до 26 часа репродукција на видео, до 21 час стриминг на видеа и до 90 часа репродукција на аудиосодржини. Во нејзината долготрајност се уверив при користењето на „основните апликации“, но графички понапредните видеоигри покажаа дека ова не е уред за оние што сакаат целосно гејминг-искуство. Имено, „ајфон 16е“ го користи чипот А18 на „Епл“ со четиријадрен GPU, што е едно јадро помалку во споредба со стандардниот „ајфон 16“. Таа разлика може да влијае на перформансите во игрите, особено кај графички понапредните.

Во половина час играње видеоигра забележав дека уредот значително се загреа и во тој период потроши 12 проценти од батеријата. Првично ги поставив поставките на максимум, а кога ги намалив, играта функционираше многу подобро.

Bloomberg Adria

Помодерен изглед, но со некои компромиси

Првата работа што ми падна во очи по отворањето на кутијата е новиот дизајн. „Ајфон 16е“ конечно има целосен OLED-екран од 6,1 инчи, со што е напуштен застарениот изглед на „ајфон 8“ и серијата „ес-и“. Но тоа значи дека повеќе нема „тач ај-ди“ (Touch ID). Сега сè оди преку „фејс ај-ди“ (Face ID), што за некои ќе биде предност, а за други мана. „Фејс ај-ди“ сè уште е меѓу најдоверливите системи за препознавање лице на пазарот, но нема можност за отклучување со отпечаток од прст, што некому може да му недостига.

Но она што е малку разочарувачко е враќањето на стариот „засек“ (notch) наместо поновото решение наречено „дајнемик ајленд“ (Dynamic Island). Ако досега сте користеле модел што го немал, тоа веројатно нема да ви пречи, но ако веќе сте се навикнале на „дајнемик ајленд“, недостигот ќе биде забележлив. Исто така, рабовите околу екранот се малку подебели отколку на „ајфон 16“, па уредот не изгледа толку премиум како поскапите модели.

Bloomberg Adria

Добра камера, но не за секој кадар

Само една задна камера на телефон што чини речиси 760 евра? Да, „ајфон 16е“ има само една камера од 48 МП, но тоа не е нужно лошо. Квалитетот на фотографиите е одличен, сликите се остри, боите реалистични, а ноќните фотографии се солидни. „Епл“ користи фјужн-систем, кој овозможува „оптика со квалитет“ на 2x зум, што е солидно за фотографии на средна далечина, но недостигот на ултраширок-агол се чувствува. Понекогаш морав да се оддалечам неколку чекори назад за да фатам сѐ што сакам во кадар, што не е секогаш практично.

Што се однесува до видеото, „ајфон 16е“ поддржува снимање во 4K резолуција при 60 фпс, што е импресивно за уред во овој ценовен ранг. Видеозаписите се мазни, со природни бои и добар динамички опсег, но уредот нема „синематик мод“ (Cinematic Mode) ни „екшн мод“ (Action Mode), кои се карактеристики што ја подобруваат стабилизацијата на видеото и ефектите на длабочина. Стабилизацијата е солидна, но не е на ниво на поскапите модели како „ајфон 16 про“ (iPhone 16 Pro).

Ако камерата ви е еден од клучните фактори при купување, имајте предвид дека ова не е најнапредниот систем во понудата на „Епл“, но сепак е подобар од она што го нудат постарите модели како „ајфон ес-и“ (2022) или „ајфон 11“.

Bloomberg Adria

Погледнете ја галеријата

Bloomberg Adria

Погледнете ја галеријата

Bloomberg Adria

Погледнете ја галеријата

Bloomberg Adria

Погледнете ја галеријата

 

Додатоци што недостигаат

Една од најинтересните карактеристики на новиот модел е „Епл интелиџенс“ (Apple Intelligence) - сет на алатки со вештачка интелигенција што вклучуваат подобрена Сири, генеративни емотикони, алатка за отстранување објекти од фотографии, паметни нотификации, асистенција при пишување текст и напредна анализа на слики и документи. „Епл интелиџенс“ им овозможува на корисниците брзо да сумираат долги е-пораки, да креираат визуелни содржини преку „имиџ плејграунд“ (Image Playground) и да ја користат Сири на многу поинтуитивен начин во интеграција со ЧетГПТ (ChatGPT).

Меѓутоа, за жал, оваа карактеристика сè уште не е достапна во Хрватска и другите земји од Европската Унија. Тоа значи дека корисниците тука не можат да го искористат целиот потенцијал на овој уред. Кога „Епл интелиџенс“ ќе стане достапен кај нас, иако не е познато кога точно ќе биде тоа, ќе можеме да ги користиме напредните алатки за обработка на текст и слики, но моментално - ништо од тоа.

Една од поголемите забелешки на корисниците за „ајфон 16е“ е изостанокот на поддршка за „магсјеф“ (MagSafe). Безжичното полнење сè уште е тука, но без магнетните додатоци што едноставно се прикачуваат и секогаш стојат на место. Нема потреба од приспособување на полначот или барање на идеалната позиција, а освен што е попрактично, „магсјеф“ овозможува и побрзо полнење во споредба со класичното безжично полнење „чи“ (Qi). За оние што никогаш не користеле „магсјеф“, ова можеби нема да биде голема работа, но ако веќе сте се навикнале на практичноста на магнетните додатоци, нивното отсуство може да биде разочарувачко. Со оглед на тоа што „магсјеф“  е стандард од „ајфон 12“, неговото отсуство е доста изненадувачко. Веројатно е уште еден начин на кој „Епл“ ги намалил трошоците за овој модел.

„Епл“ со „ајфон 16е“ за првпат воведе свој модем Ц1, што значи дека уредот повеќе не се потпира исклучиво на чиповите од „Квалком“ за поврзување со мобилните мрежи. Овој модем треба да ги подобри стабилноста на сигналот и енергетската ефикасност.

Меѓутоа, и покрај оваа новина, „ајфон 16е“ не поддржува mmWave 5G, кој овозможува поголеми брзини на пренос на податоци. Тоа можеби не е пресудно во Хрватска, каде што mmWave не е широкодостапен, но би можело да биде ограничување за оние што често патуваат во земји со поразвиена мрежна инфраструктура.

За кого е „ајфон 16e“?

Во Хрватска, „ајфон 16e“ се продава по цена од 759,99 евра, што го става во необична позиција - не е доволно евтин за да биде вистински буџет-модел, но е значително поевтин од „ајфон 16“.

Ако имате, на пример, „ајфон ес-и“ или „ајфон 11“, ова би можело да биде солидна надградба со помодерен дизајн и подобра батерија. Но, ако веќе имате „ајфон 13“ или понов, тешко е да се оправда купувањето со оглед на недостатоците како што се отсуството на „магсејф“ и камера со ултраширок-агол.

Bloomberg Adria

Ако ви треба сигурен „ајфон“ со долга автономија на батеријата и модерен дизајн, „16e“ е добар избор, но со одредени компромиси.

Овој модел носи многу предности во однос на постарите верзии „ес-и“, но исто така остава впечаток дека „Епл“ намерно изоставил некои клучни карактеристики за да ги оправда поскапите модели. Како што реков, недостигот на „магсејф“ и камера со ултраширок-агол може да биде пресуден за некои корисници.

Според некои најави, „епл интелиџенс“ би требало да стане достапна во Европската Унија од април. Штета што не беше можно да се тестира, но бидејќи сè уште нема јасен датум на достапност кај нас, тоа сигурно не може да биде пресуден фактор за купување на овој модел. Со оглед на тоа што телефоните од други брендови веќе нудат функции со вештачка интелигенција, ако тоа ви е важно, можеби е подобро да побарате уред што веќе ја има.

Ако ви е најважна цената и моментално имате постар модел на „ајфон“, „16e“ може да биде разумен избор. Но ако сакате поголема вредност за вашите пари и долгорочна исплатливост, можеби е подобро да размислите за „ајфон 16“ или дури „ајфон 15“.

Во продавниците на „ајстајл“ (iStyle), од каде што е и „ајфон 16е“ од овој тест, разликата во цената помеѓу него и „ајфон 15“ со 128 GB изнесува само 80 евра, додека „ајфон 16“ со 128 GB е поскап за 220 евра. Иако „ајфон 16е“ е замислен како одговор на „Епл“ за падот на продажбата, тешко е да не се запрашаме дали станува збор за уште еден маркетиншки трик – за корисниците да ги споредат цените и на крајот за релативно мала разлика сепак да посегнат по поскап модел.