.webp){kind=icon}
Бидејќи се заканува можна рецесија, Бил Гејтс се подготвува да собере нови средства за Breakthrough Energy Ventures (BEV) за поддршка на иновативни климатски стартапи, по стапките на фондовите од 2 милијарди долари кои колективно помогнаа во финансирањето на околу 100 компании.
„Иако расположението за инвестирање во технолошки и климатски компании малку се намали, сепак мислам дека ќе можеме да собереме пари“, рече Гејтс во последната епизода од подкастот Bloomberg Green. „Не е толку лесно како што беше, да речеме, пред шест месеци, но гледаме кон нова рунда на стартапи и се потпираме на Breakthrough Energy Management што влегува во подоцнежна фаза“.
Додека компаниите како „Тесла“ (Tesla) помогнаа да се оствари сонот за електрични автомобили, а соларната и ветерната енергија сега обезбедуваат поевтина енергија од фосилните горива, многу од технологиите потребни за намалување на емисиите во другите сектори сè уште се во почетна фаза. Се очекува дека 374 милијарди долари обезбедени со американскиот Закон за намалување на инфлацијата (IRA) за поддршка на технологиите поврзани со климата и енергијата ќе поттикнат иновации насочени кон справување со тие предизвици.
„Без иновации, никогаш нема да се решат климатските промени“, смета Гејтс / Bloomberg
Гејтс се надева дека неговата работа со Breakthrough, исто така, ќе поттикне трансформација на глобалната економија што ќе нè донесе поблиску до свет со нула емисии. Многу од компаниите во кои BEV моментално инвестира се обидуваат да ги прошират иновациите во индустриите со висок удел на јаглерод, но не се премногу гламурозни, како што се цемент и челик со низок процент на јаглерод.
„Без иновации, никогаш нема да се решат климатските промени“, вели Гејтс.
Еден од основачите на „Мајкрософт“ се приклучи на шоуто за да зборува за тоа како BEV помага во поттикнувањето на иновации, како и за неговата вклученост во IRA, за што Bloomberg подетално објави во август.
Тој, исто така, зборуваше за тоа како Европа може да се справи со емисиите бидејќи се соочува со енергетска криза во време на руско-украинската војна и високите цени на енергијата.
„За жал, повеќето од климатските прашања во најдобар случај се со решенија од пет до десет години. Затоа, кога луѓето ми велат: 'Еј, ни се допаѓаат твоите климатски работи затоа што можеме да му кажеме на Путин дека не ни треба', велам 'Да, за 10 години јавете му се и кажете му дека не ви треба'. Значи, тоа е многу тежок сет на компромиси. Многу неочекуван. Мислам дека е добро за климата на долг рок. На краток рок мора да пронајдете какво било решение, дури и ако тоа значи дека емисиите ќе се зголемат. И колку побрзо заврши војната, толку подобро, но има многу размислувања за тоа како да се приведе кон крај“, рече Гејтс.
