Компанијата „Мета“ (Meta Platforms Inc.) јасно стави до знаење дека сака да се инфилтрира во светот на технологијата за виртуелна реалност.
Најновиот уред за виртуелна реалност беше претставен во вторникот, а „хедсетот“ наречен „Квест про“ (Quest Pro) е најновата понуда на Meta во производната линија претходно именувана „Окулус“ (Oculus). Quest Pro вклучува бројни технолошки подобрувања на хедсетот Quest 2 претставен кон крајот на 2020 година, а ќе се продава по цена од 1.500 долари (тројно повеќе од неговиот претходник).
Bloomberg Mercury
Тековните можности на виртуелната реалност ги тестирав токму во вторникот наутро, придружувајќи се на компаниската конференција, користејќи го постариот хедсет Oculus Quest 2.
Конференцијата се одржуваше во апликацијата на Meta наречена „Хорајзон Ворлдс“ (Horizon Worlds), за која компанијата најави дека наскоро ќе биде ажурирана со основните алатки за деловна продуктивност од Microsoft, Adobe, Accenture и Zoom. Дигиталните аватари кои изгледаат како цртани верзии од учесниците, но немаат нозе (повеќе за тоа подоцна), ќе имаат пристап до PDF-датотеки, word документи и соби за состаноци.
Искрено, за тоа ќе треба подолг процес за прилагодување и ќе им бидат потребни повеќе од неколку познати алатки и апликации за да ме придобијат.
Приклучувањето на настанот не беше толку едноставно како кликнување на линк кој води до видео врска. Морав да влезам во апликацијата Horizon Worlds на компанијата, виртуелниот универзум каде луѓето можат да градат свои лични мини искуства и да ја активирам конференцијата од мојот распоред за настани. Се активира светло син екран кој со трепкачки знак „предупредување“ го исфрли мојот аватар во премин што води до простран виртуелен двор со неколку згради, зеленило и фонтана на која бавно ротира логото на Meta.
За оние кои имаат барем некакво познавање во сферата на видеоигрите, би можела да кажам дека атмосферата доста наликува на онаа од Roblox или Sims. Опкружувањето е доста чисто и едноставно, што барем ја олеснува навигацијата. Можев да претпоставам дека мојот аватар се качува нагоре бидејќи како да лебдеше по скалите. Звуците на природата, клокотот на водата и слабите разговори на неколку други корисници околу мене ми даваа чувство дека сум таму. Но, темното небо во виртуелниот простор не даваше никакви индикации за тоа во кој дел од денот се наоѓам; мирисот на моето кафе од реалниот свет беше единствен потсетник дека е почеткок на работниот ден.
Еден знак ме насочуваше низ дворот кон воведниот говор на главниот извршен директор, Марк Цукерберг, па ги искористив двата џојстика - благодарна за моето искуство како гејмерка - за маневрирање околу фонтаната, по неколку скали, па во виртуелниот амфитеатар. Бидејќи не очекував дека мојот аватар навистина ќе треба да пешачи до настанот, задоцнив околу една минута, но забележав знак дека 1.200 луѓе веќе се таму.
Bloomberg
Не очекував дека ќе треба да шетам наоколу за да се запознаам со различни аспекти од презентацијата. Не можев а да не помислам како би се чувствувал просечен бизнис учесник, без познавања за вируелната реалност, кој би требало да фаќа прибелешки од настанот.
Потоа од истата помисла почна и мене да ме фаќа паника - не можам да го носам хедсетот и да пишувам истовремено. Всушност, постои начин да го поставите хедсетот за да го „гледа“ светот околу вас преку малите камери на уредот. Сепак, јас не знаев како да ја активирам оваа опција, па така морав да се снаоѓам и да ѕиркам низ малиот отвор помеѓу мојот нос и хедсетот, онолку колку да можам да ги погодам буквите на тастатурата, па паралелно да го земам и спуштам џојстикот и да ги активирам Slack или Twitter на мојот лаптоп во реалниот свет.
На почетокот, следењето на презентацијата на овој начин изгледаше некако непотребно. Директорите на Meta се појавија преку претходно снимени видеа, најавувајќи различни производи. Имаше некои мали детали кои беа исклучиво достапни и намерно смислени за во виртуелната реалност, па така некои од ликовите од видеоигрите лебдеа надвор од екранот на презентацијата.
Се чини дека етиката и протоколот за организација на настани во виртуелната реалност се сè уште во развој. Морав да се преместам за да не слушнам десетина луѓе од мојата соба како зборуваат за време на презентациите, а еден маченик со затнат нос немилосрдно шмркаше и дуваше.
Потоа, на сцената се појави сосема новиот аватар на Цукерберг, облечен во сив џемпер, тесни сини фармерки и патики какви што има и во реалниот живот. Тој пред својата виртуелна публика го кажа она што веројатно најмногу сакаа да го слушнат - дека наскоро ќе добијат нозе. Објавата беше хит. Сите аватари почнаа да лебдат кон сцената за да прослават, но набрзо беа спречени од виртуелна ограда - како на концерт на Sims (дури и во метаверзумот Цукерберг има обезбедување). Некои од аватарите се „расфрлаа“ со конфети или со палци нагоре, кои лебдеа над нив во знак на одобрување на најавата.
Bloomberg
Потоа настанот заврши. За еден новинар крајот на настанот не значи и крај на работата, па имав замисла да интервјуирам некои од присутните. Но, не бев доволно брза колку прекинувачите за излез од виртуелниот свет, па така повеќето од присутните или веќе беа вратени во нивните реални животи или пак заминаа во други виртуелни светови. Дворот беше празен. А лицето ме болеше.
PC Mag проценува дека хедсетот Quest 2 тежи ококлу половина килограм. Дури и по местењето и прилагодувањето на ремените, таа тежина се влечеше по моето лице и ми ја расипа шминката. Откако го напишав ова, го извадив мојот несесер со козметика за да направам корекција, прашувајќи се колку луѓе кои работат на виртуелна реалност во Мeta носат шминка секој ден. Во вторникот, компанијата најави дека доаѓаат фотореалистични аватари, но сепак сакам да прикажам неразмачкана верзија од себе и во реалниот свет, откако ќе го извадам хедсетот.
Дури и Meta имаше потешкотии да ги натера своите вработени да користат Horizon барем еднаш неделно, според две интерни белешки што ги објави Verge. Алатките кои доаѓаат во метаверзумот се некои од најпопуларните во деловниот свет и очигледно се обид да им се даде на луѓето причина да бидат таму. Но, што се однесува до мојот избор, сепак не би го користела хедсетот од 9 до 5.
.webp){kind=icon}
Во моментов нема коментари за веста. Биди прв да коментира...