Луѓето отсекогаш ги привлекувало чоколадото. Сепак, неговото производство денес е поврзано со уништување на шумите и детскиот труд, што предизвикува етички дилеми. Британски стартап тврди дека го има одговорот: нискокалорична алтернатива на чоколадото што не се разликува од оригиналот.
Неодоливиот вкус на чоколадото зависи од ферментацијата на какаото што се случува набргу по берењето, кога зрната се собираат под листовите банана и се оставаат да отстојат неколку дена.
WNWN Food Labs има за цел да го реплицира процесот во објект во источен Лондон користејќи британски јачмен и јужноевропски рогач.
Bloomberg
Компанијата, чиј акроним доаѓа од фразата „waste not, want not“ што значи дека преку паметна употреба се избегнува недостиг - и се изговара „win- win“, користи техники кои се употребувани од производителите на веганска храна, со цел да анализираат одредените чоколадни вкусови и ароми на молекуларно ниво и на тој начин да ги идентификуваат карактеристиките што сакаат да ги имитираат.
„Вистинскиот двигател на вкусот е ферментацијата“, вели Џони Дрејн, ко-основач на WNWN.
Слични амбиции има и кај неколку други компании како што се Минхен Планет А Фудс или Калифорнија Култирд во САД.
Пред две децении, големите производители на чоколади како Нестле, Марс и Херши го потпишаа таканаречениот протокол Харкин-Енгел за да се запре експлоатацијата на детскиот труд во нивните синџири на снабдување. Но, американското Министерство за труд проценува дека 1,56 милиони деца сè уште работат во оваа индустрија.
По сточарството, палминото масло и сојата, какаото е производот заради која се губат најголеми шумски површини на глобално ниво. Брегот на Слоновата Коска, голем производител на какао, изгуби 85 отсто од своите шуми од 1960-тите.
Производителите на бонбони поставија цели за купување какао потврдено како етичко од организации како што се Fairtrade International или Rainforest Alliance.
Се прават напори да се следат зрната какао подалеку од директните добавувачи, а се започнуваат и едукативни иницијативи за да им се помогне на семејствата да ги вратат своите деца на училиште.
Но, активистите сметаат дека има поедноставно решение. Производителите би требало да платат повеќе за какаото.
Гана и Брегот на Слоновата Коска навистина воведоа дополнителни давачки за извозот на какао, но некои купувачи успеаја да преговараат за поповолни цени, особено во моменти на послаба побарувачка.
Растечката загриженост на потрошувачите за темната страна на производството на чоколадо го отвори патот за производи кои се промовираат како одржливи и етички. Најпознат пример е амстердамската компанија Tony's Chocolonely Bars, основана во 2005 година од тројца новинари, која наведува дека може да го следи потеклото на 100 отсто од зрната какао што ги користи. Но, дури и овде, детскиот труд се прикрадува во синџирот на снабдување.
WNWN вели дека најдобро е целосно да се избегне какаото. Дрејн ја основа компанијата минатата година со поранешниот инвестициски банкар, Ахрум Пак. Тие обезбедија инвестиција од милион долари од берлински фонд за ризичен капитал и сега работат на обезбедување дополнителен капитал.
Дуото планира следната година да основа фабрика во Португалија, каде што имаат намера да произведуваат 150.000 килограми месечно. Годинава произведоа две плочки во ограничено издание, а следната година имаат намера да овозможат продажба на еден производ во британските супермаркети.
На крајот на краиштата, тие сакаат да им дадат на главните прехранбени компании алтернативи за чоколадото и другите етички сомнителни производи како ванила или кафе.
Bloomberg Mercury
„Ние се нарекуваме компанија за алтернативни состојки“, вели Пак, кој е главен извршен директор.
Според Дрејн, со користење на алтернативни состојки, „Нестле“ може да ја намали употребата на вода во производството на „Кит Кет“ за 60 проценти и да го намали ослободувањето на стакленички гасови при производството за 80 проценти.
„Нестле“ не сака да коментира за опциите за чоколадо без какао. Тие само велат дека имаат програма за спречување на детскиот труд и уништувањето на шумите и нудат стимулации за производителите на какао да ги испраќаат децата на училиште и да применуваат методи на обновливи извори на производство.
Арлин Васерман од консултантската фирма Changing Tastes верува дека предизвикот за имитираните производители на чоколади е да ги натераат потрошувачите да го направат тој премин од вистинско чоколадо. Исто така, на клиентите им е тешко да знаат кои компании успеваат да го искоренат детскиот труд.
„Повеќето од чоколадните производи што ги гледам тврдат дека се резултат на напор да се реши тој проблем“, вели Васерман.
Можеби оние кои сакаат да произведуваат чоколадо без какао можат да научат нешто од производителите на замени за месо.
Дрејн тврди дека вкусот и текстурата се местото каде што WNWN се истакнува.
„Тоа не е само чоколадо од рогач. Тоа е само вистинска копија на чоколадо“, вели тој.
.webp){kind=icon}
