.webp){kind=icon}
Главниот извршен директор на „Тесла“, Илон Маск, ги стави персоналот, инвеститорите и набљудувачите на електрични автомобили на тридневен ролеркостер со противречните пораки за потенцијални кратења на работни места, нагласувајќи ја некогаш непредвидливата природа на неговото лидерство, заматувајќи го имиџот на производителот на автомобили.
Маск во саботата на „Твитер“ објави дека вкупната работна сила на „Тесла“ ќе расте, иако бројот на платени работници во голема мера останува ист. Тоа уследи по неговата петочна порака до вработените дека 10 отсто од платените работници ќе останат без работа. Според луѓето кои ја добиле неговата белешка, Маск посочил дека „Тесла“ има превработеност во некои области, иако кратењето нема да важи за луѓето кои работат на составување на автомобилите или батериите.
Неговиот очигледен обид да го ублажи ударот за работната сила на „Тесла“ од околу 100.000 лица, ја зголеми конфузијата кај акционерите и набљудувачите кои бараат знаци на забавување на електричните автомобили. Акциите на автомобилскиот производител паднаа за 9,2 отсто во петокот, бидејќи се појавија вести за кратење на работните места. „Ројтерс“ претходно објави дека Маск им рекол на некои директори на „Тесла“ дека го намалува персоналот затоа што има супер лошо претчувство за економијата.
„Измешаната порака на Маск создаде многу конфузија“, вели Даниел Ајвс, аналитичар во „Ведбуш секјуритис“ (Wedbush Securities) во Њујорк. „Веруваме дека Маск се обиде да испрати сигнал до базата на вработени, тоа имаше контраефект и сега тој ги повлекува зборовите“. Според него, целата ситуација е уште една бизарна сапуница.
Засега не е јасно до кој степен Маск се обидува да го спречи самозадоволството кај работната сила или да ги намали трошоците во услови на економски пад, побрза инфлација и повисоки трошоци за задолжување.
Како дополнително заматување на проблемот, кинеска веб-страница денеска објави дека „Тесла“ сè уште вработува голем број работници во Кина, главно инженери. Маск неодамна ги пофали вработените на „Тесла“ во Кина, од кои многумина живееја во фабриката во Шангај за да го одржат производството за време на ограничувањата поради Ковид-19, со тоа поттикнувајќи го американскиот персонал да се врати во канцеларија.
„Тесла е бранител за акциите на електричните возила, па ако преземаат чекори за зачувување на готовина, тоа укажува на слаба перспектива“, вели аналитичарот на „Блумберг интелиџенс“ (Bloomberg Intelligence), Стив Ман.
„Тесла“, која излезе на берзата во јуни 2010 година, претходно мина низ циклуси на брз раст и пресврт. Отпушти околу 700 работници во 2017 година поради она што Маск го нарече производствен пекол во однос на дебито на седанот Модел 3. Една година подоцна, компанијата отпушти 9 отсто од своите вработени додека се бореше да го зголеми производството.
