.webp){kind=icon}
УБС (UBS Group AG) планира да отпушти повеќе од половина од 45.000 вработени во „Кредит Суис“ (Credit Suisse Group AG), почнувајќи од следниот месец, како дел од итното преземање на банката.
Банкарите, трговците и помошниот персонал во инвестициската банка „Кредит Суис“ во Лондон, Њујорк и делови од Азија се очекува да го претрпат најголемиот дел од кратењата, при што речиси сите активности се загрозени, велат лица запознаени со ова прашање.
На вработените им е кажано да очекуваат три круга на откази во текот на годинава, а првиот е најавен до крајот на јули. Во моментов се планирани уште два круга за септември и октомври, додаваат изворите, барајќи да не бидат именувани бидејќи плановите не се јавни.
Три месеци откако УБС се согласи да го купи „Кредит Суис“ во спасувачкиот пакет посредуван од швајцарските власти, целосниот обем на кратењето на работните места почнува да станува јасен. УБС, чија комбинирана работна сила по склучувањето на договорот скокна на околу 120.000 вработени, рече дека има за цел да заштеди околу 6 милијарди долари од трошоците за персоналот во наредните години.
УБС има намера на крајот да ја намали вкупната комбинирана работна сила за околу 30 отсто, или 35.000 луѓе, посочија двајца од изворите. Тоа е повеќе или помалку во согласност со целокупното намалување од околу 30.000 позиции проценето од аналитичарите на „Редбрн“ (Redburn) во извештајот за УБС од овој месец.
Акциите на банката пораснаа за речиси два отсто при тргувањето во САД.
Портпаролот на УБС одби да коментира за кратењето на работните места.
Прочитајте повеќе на веб-страницата на „Блумберг“.
