„Кредит суис“ веќе не постои, УБС ја заврши аквизицијата

УБС (UBS Group AG) ја заврши историската аквизиција на својот поранешен ривал - банката „Кредит суис“ (Credit Suisse). Ова е ново поглавје за швајцарскиот финансиски сектор бидејќи познатата банка сега формално престана да постои.

„Денеска постигнавме значајна пресвртница во нашето патување кон интеграција“, рече извршниот директор Серџо Ермоти во изјава во петокот.

Спојувањето е важен следен чекор во задачата со која се соочува Ермоти, кој ги води двата огромни система низ најавената интеграција. „Многу е важно да се олесни миграцијата на клиентите на платформите на УБС“ и „ќе донесе многу капитални, финансиски и даночни придобивки“, рече Ермоти.

Крајот на банката „Кредит суис“ како посебен правен субјект ѝ става крај на приказната за банка што одигра централна улога во историјата и развојот на Швајцарија. Порано позната како „Швајцарише кредитаншталт“ (Schweizerische Kreditanstalt), оваа банка е основана во 1856 година за да ја финансира изградбата на железничката мрежа во оваа планинска земја. Подоцна прерасна во моќна институција и симбол за улогата на земјата како глобален финансиски лидер.

Сепак, „Кредит суис“ се бореше да се приспособи на променетиот банкарски пејзаж од финансиската криза и потона подлабоко во криза во последните години бидејќи беше погодена од серија скандали и правни проблеми. На крајот, интервенција беше неизбежна бидејќи кон крајот на 2022 година и почетокот на 2023 година, поради кризата на доверба, клиентите почнаа да повлекуваат огромни суми пари од банката.

За нешто повеќе од една година од итното преземање, УБС испорача многу од работите на кои се обврза кога се согласи да ја купи „Кредит суис“. Оваа банка се ослободи од многу несакани средства, ги реконструира лидерските тимови и почна да ги спојува одделните ИТ-системи на двете компании.

Транзицијата кон единствена американска холдинг-компанија е планирана за 7 јуни, додека спојувањето на „Кредит суис АГ“ (Credit Suisse (Schweiz) AG) и „УБС Свицерленд АГ“ (UBS Switzerland AG) се очекува во третиот квартал на 2024 година, се наведува во соопштението на банката. Почнувајќи од денеска, УБС ги „наследи сите права и обврски“ на „Кредит суис“, вклучувајќи ги и ненамирените должнички инструменти, се истакнува во соопштението.

„Кредит суис“ не тргуваше како посебен ентитет од 13 јуни, кога беше финализиран првиот дел од спојувањето. Акциите на банката беа избришани од берзата во Швајцарија и во Њујорк.