Загрепската берза, консултантската компанија „Мазарс“ (Mazars) и технолошката компанија „Пословна интелигенција“ (Poslovna inteligenija) потпишаа договор што го означува почетокот на создавањето напредно решение за автоматско вреднување на компаниите засновано на машинско учење: Истражувачки проект за вештачка интелигенција (Artificial Intelligence Research Project).
Проектот е финансиран од ЕБОР (EBRD), со поддршка на фондот за техничка соработка „Тајван бизнис ЕБРД“ (Taiwan Business EBRD Technical Cooperation), а со оглед на потенцијалот, учесниците очекуваат голем интерес во Хрватска, но и во регионот.
„Една од тешкотиите со кои се соочуваат котираните компании во Хрватска и на регионалните пазари е отсуството на аналитички мониторинг, што им отежнува на инвеститорите да донесуваат одлуки за вложување, а достапноста на таквите анализи значи и придонес за транспарентноста на пазарот“, се наведува во соопштението на Загрепската берза.
Во првата фаза на развој решението ќе овозможи подготовка на автоматизирани извештаи за процена на вредноста на акциите за котираните друштва.
Загрепската берза планира во втората фаза на развој да го поврзе решението со технологија за вештачка интелигенција (ВИ). Идејата е да се овозможи автоматизација и да се забрзаат aнализите што-ако (what-if), а со тоа да се придонесе за ефективноста на истражувањата на вредноста на компаниите, објаснуваат тие.
ZSE
Целта на решението е да обезбеди пристап до вреднување за сите учесници, а придобивките од решението ќе се одразат во зголемена достапност на истражувања, значително намалување на времето потребно за собирање податоци, помало потпирање на човечки ресурси, што ќе значи и намалена можност за грешки, можност за побрза процена на вредноста на акциите, како и овозможување за користење едноставни алатки за анализа на податоците.
Загрепската берза претходно учествуваше во сличен проект поддржан од ЕБОР, кој овозможи аналитички мониторинг на дел од котираните друштва и покажа дека постои голема потреба од ваков тип на извештаи и податоци.
Договорот го потпишаа Ивана Гажиќ, претседателка на Управниот одбор на Загрепската берза, Кристијан Чиноти, главен партнер на консултантската компанија „Мазарс“, и Слаѓана Крпиќ, членка на Управниот одбор на „Пословна интелигенција“, а комплетирањето на проектот е најавено за крајот на 2024 година.
.webp){kind=icon}