„Алибаба“: Имаме вештачка интелигенција што ги надминува „Опен еј-ај“ и „Гугл“

По претставувањето на кинескиот четбот со вештачка интелигенција (ВИ) Дипсик (DeepSeek), сега во прв план доаѓа нов кинески модел. Кинескиот технолошки гигант „Алибаба“ (Alibaba) неодамна ја претстави својата најнова серија модели на вештачка интелигенција - Квен 2.5 (Qwen 2.5). Станува збор за напреден визуелно-јазичен модел што комбинира разбирање на слики и текст и е со отворен код (open-source), што значи дека е достапен за истражувачи, програмери и компании низ светот. Неговото претставување доаѓа само неколку дена по лансирањето на конкурентскиот модел Дипсик (DeepSeek), што јасно ја покажува сè посилната трка во развојот на напредни системи за ВИ.

Колку е моќен Квен 2.5-ВЛ? 

Според интерните тестови на тимот „Квен“ (Qwen), моделот Квен 2.5 (Qwen 2.5-VL) надминува некои од најпознатите модели за ВИ од САД. Конкретно, треба да биде попрецизен и помоќен од ГПТ-4о (GPT-4o) на „Опен еј-ај“ (OpenAI), моделот Клод 3.5 (Claude 3.5 Sonnet) на компанијата „Антропик“ (Anthropic) и Џеминај 2.0 (Gemini 2.0 Flash) на „Гугл“ (Google), особено во области како што се анализа на видеозаписи, математички пресметки и разбирање документи.

Овие иновации отвораат нови можности за примена на моделот во различни индустрии, тврдат од „Алибаба“. На пример, во финансискиот сектор може да анализира визуализации на податоци, во здравството да интерпретира медицински слики, додека во правните и административните процеси може да ги автоматизира подготовката и прегледот на документи. Развојниот тим истакнува дека моделот исто така одлично препознава објекти и чита текст во слики, овозможувајќи  попрецизно разбирање сложени визуелни сценарија.

Во изјавата објавена при претставувањето на моделот, „Алибаба“ наведува: „Нашите модели ги споредуваме со најнапредните модели на денешницата и со модели од слична големина. Квен 2.5-ВЛ (Qwen2.5-VL-72B-Instruct) постигнува конкурентни резултати во референтните тестови, кои опфаќаат решавање универзитетски задачи, математика, разбирање документи, општо одговарање на прашања, разбирање видеозаписи и работа како визуелен агент“.

 

 

Тестирањата исто така покажаа дека моделот постигнува ниво на перформанси слично на Дипсик, но со дополнителни подобрувања во интерпретацијата на визуелни податоци и анализа на сложени сетови информации.

 

„Алибаба“ (и Кина) ги предизвикуваат „Опен еј-ај“ и „Гугл“ 

Според пишувањето на „Тек кранч“ (TechCrunch), „Алибаба“ со новата серија модели директно ги предизвикува американските гиганти во ВИ како „Опен еј-ај“ и „Гугл“ . Ова е значително поместување во индустријата за ВИ, бидејќи досега водечките модели ги развиваа главно американски компании.

„Алибаба“ се разликува од своите западни конкуренти во клучен аспект – отвореноста на кодот, што е пристап што го одбра и „Дипсик“. Со тоа им овозможува на истражувачите и програмерите да го приспособат моделот на сопствените потреби, без ограничувања што често ги следат комерцијалните модели, како оние од „Опен еј-ај“.

Претставувањето на моделот Квен 2.5-ВЛ доаѓа во момент кога Кина интензивно ги зголемува своите инвестиции во развој на вештачка интелигенција. Аналитичарите истакнуваат дека пазарот за ВИ станува сè пофрагментиран, бидејќи се појавуваат регионални алтернативи на западните решенија. „Блумберг“ (Bloomberg) извести дека компании како „Дипсик“ привлекуваат сè повеќе инвестиции бидејќи нудат алтернативни модели со отворен код, кои можат да им конкурираат на постојните системи.

Геополитичка димензија: Може ли САД да ја запрат кинеската револуција во ВИ?

Кина не само што ги стигнува американските гиганти за ВИ туку во некои аспекти поставува нови правила на игра. Според пишувањето на списанието „Економист“ (The Economist), обидите на САД да го забават кинескиот развој на вештачка интелигенција досега имаа ограничен ефект. Американската влада воведе санкции за извоз на напредни полупроводници и хардвер клучен за работа на најсовремените модели за ВИ. Но се чини дека кинеските развивачи најдоа начини како да ги заобиколат тие пречки и да продолжат со развојот.

Френсис Јанг, инвеститор во технолошки стартапи во Шангај, за „Економист“ изјави: „За компаниите што сакаат да работат во Кина, користењето локални модели со ВИ сега е речиси неопходност. Тоа повеќе не е прашање на избор, туку стратегиска одлука што обезбедува пристап до ресурси и ги намалува ризиците во случај на нови санкции“.

Тоа значи дека претпријатијата што работат на кинескиот пазар сè повеќе ќе зависат од локалните решенија во вештачката интелигенција, што дополнително може да го ослаби влијанието на американските технолошки компании.

Акциите на „Алибаба“ во пораст 

Веста за новиот модел Квен 2.5-ВЛ брзо стигна и до берзанските инвеститори. Вчера акциите на „Алибаба“ (ADR) со кои се тргува на американската берза пораснаа речиси за седум проценти, додека од почетокот на годината остварија раст од 13 проценти. Во моментов една акција ADR на „Алибаба“ вреди 96 долари. Аналитичарите се оптимисти во поглед на инвестициите - дури 82 процента од нив препорачуваат купување, а 12-месечната целна цена е поставена на 119 долари. Некои пооптимистички аналитичари проценуваат дека цената може да достигне и 136 долари.

Сепак, постои и предупредување – кинеската регулатива е непредвидлива, па инвестирањето во такви акции носи одредени ризици.