„Епл“ (Apple Inc.) планира да започне со производство на „ајфон 14“ (iPhone 14) во Индија околу два месеца по првичното пуштање на производот од Кина.
Компанијата работи со добавувачи за да го зголеми производството во Индија и да го скрати доцнењето во производството на новиот iPhone, според извори запознаени со ова прашање. Apple, кој долго време ги произведуваше повеќето од своите iPhone телефони во Кина, бара алтернативи откако администрацијата на Кси Џинпинг се судри со американската влада и наметна заклучувања низ целата земја поради пандемијата, што ја наруши економската активност.
Аналитичари како Минг-Чи Куо од TF International Securities Group изјавија дека очекуваат Apple да го испорача следниот iPhone од двете земји приближно во исто време, што би било значаен репер во напорите на производителот да го диверзифицира својот синџир на снабдување и да создаде потпора.
Foxconn Technology Group, главниот производител на iPhone, го проучувал процесот на испорака на компоненти од Кина и склопување на уреди iPhone 14 во својата фабрика надвор од јужниот индиски град Ченаи, велат изври, кои побарале да останат анонимни бидејќи станува збор за доверливи информации. Целиот процес вклучувал и разгледување на различни начини за одржување на високите стандарди за доверливост на Apple.
Bloomberg Mercury
Apple и Foxconn на крајот утврдиле дека годинава е невозможно да се очекува истовремено стартување на производството во Индија и Кина, иако тој потег останува како долгорочна цел, велат изворите. Првите iPhone 14 телефони од Индија најверојатно ќе бидат готови кон крајот на октомври или ноември, по првичното претставување на уредот во септември, посочуваат познавачите.
Портпаролот на Apple со седиште во Купертино, Калифорнија одбил да ги коментира ваквите дојави. Од Foxconn исто така веднаш не одговориле на барањата за коментар.
Redington India Ltd., која дистрибуира производи на Apple во земјата, порасна за дури 9,5 отсто по првичниот извештај на Bloomberg.
Усогласувањето со кинеското темпо на производство на iPhone би означило голема пресвртница за Индија, која ја промовира својата атрактивност како алтернатива во време кога заклучувањето поради Ковид-19 и американските санкции ја загрозуваат позицијата на Кина како „фабрика на светот“. Склопувањето на iPhone уреди често вклучува координација помеѓу стотици добавувачи и исполнување на крајно тесни рокови и ригорозни контроли за квалитет на Apple.
Некои луѓе од Apple и Foxconn се надевале дека симултаното производство во Индија ќе започне оваа година, но тоа никогаш не бил официјален план. За да обезбеди непречено лансирање, Apple сакаше прво да се фокусира на забрзување на операциите во Кина, а потоа да го разработи индиското производство, според еден од изворите.
Партнерите на Apple почнаа да прават iPhone-и во Индија во 2017 година, со што беше означен почетокот на долгогодишните напори за градење производствени капацитети во земјата. Покрај тоа што нуди поддршка за тековните операции, земјата со 1,4 милијарда жители е перспективен потрошувачки пазар, а администрацијата на премиерот Нарендра Моди понуди финансиски стимулации за техничко производство во рамките на својата програма „Направи во Индија“.
.webp){kind=icon}
