text size
Притисокот од ЕЦБ и од Фед врз каматните стапки влезе на рамна територија. Тоа не значи пауза во рестриктивната политика, бидејќи повисоките нивоа на каматни стапки што се постигнати досега обезбедуваат поддршка за механизмот за пренос да продолжи да се движи, укажуваат од аналитичкиот тим на „Блумберг Адрија“ во новата анализа објавена на „Блумберг Адрија инсајт“.
„Преовладува расположението ’повисоки камати на подолг период’ бидејќи стапките на инфлација, иако моментално се во фаза на дезинфлација, сè уште се во црвената зона, покажуваат отпорност и се над долгорочните цели. Тоа особено се однесува на индикаторите за базичната инфлација, кои ја демонстрираат нејзината лепливост“, велат аналитичарите.
Кога станува збор за регионот Адрија, нашите аналитичари посочуваат дека централните банки во Србија и во Македонија исто така се на стендбај во однос на нивните клучни стапки.
„Тврдоглавите стапки на инфлација ја задржаа рестриктивната позиција на централните банки, кои ја користат задолжителната резерва за поефикасно да ја апсорбираат ликвидноста“, велат аналитичарите.
Тие додаваат дека кога станува збор за пазарите на капитал, годинава е солидна за словенечките и хрватските берзански индекси, кои надминаа голем дел од индексите во Европа, како и оние од другите земји во регионот Адрија, но сепак се послаби од повеќето индекси во Централна и Источна Европа.
„Обврзниците сега стануваат сè поатрактивна класа на средства поради забавувањето на инфлацијата и крајот на зголемувањето на каматните стапки на централните банки“, велат аналитичарите.
Тие укажуваат дека хрватскиот индекс CRO10 ги надмина другите берзански индекси во регионот Адрија од почетокот на годината до денес, најмногу поради робусните перформанси на „Подравка“ и „Кончар“, кои заедно сочинуваат 36 проценти од целиот индекс.
„Понатаму, словенечкиот SBITOP забележа солиден годишен перформанс, првенствено поттикнат од силниот ефект на НЛБ, која забележа пораст од 32 процента. Спротивно на тоа, другите индекси од БиХ, Србија и од Македонија покажаа маргинални флуктуации“, се наведува во анализата.
Од нашиот аналитички тим додаваат дека приносите и распонот на државните обврзници од 10 години во регионот Адрија паднаа во просек за 40 б.п. годинава.
„Оваа компресија на приносот може да им се припише на забавувањето на растот на инфлацијата и на крајот на зголемувањата на каматните стапки од страна на ЕЦБ, што придонесува за постабилни финансиски пазари и репозиционирање на инвеститорите во долгот на пазарите во развој“, велат аналитичарите.
Тие посочуваат дека Македонија има петгодишни обврзници деноминирани во евра, кои паднаа за 50 б.п., додека БиХ има само краткорочни обврзници. Според нив, евидентен е сличен тренд во поширокиот регион, освен во Полска, каде што приносите остануваат под нагорен притисок поради промените во Владата и близината со Украина.
Нашите аналитичари очекуваат во 2024 година да има континуирано забавување на инфлацијата, што најверојатно ќе доведе до пад на приносите на државните обврзници низ регионот Адрија.
„Дополнително, предвидуваме дека централните банки ќе иницираат намалување на каматните стапки во втората половина од 2024 година. Тоа приспособување на политиката е поттикнато од видливата монетарна рестриктивност, која не се демонстрира само преку забавувањето на темпото на инфлацијата туку и преку намалената кредитна активност на домаќинствата и претпријатијата поради влијанието на повисоките каматни стапки“, велат аналитичарите.
Во однос на инвестициите во регионот Адрија, аналитичарите очекуваат раст во секторите поврзани со јавните инвестиции и ги гледаат како клучни економски двигатели во наредните години.
„Секторите како што се градежништвото, производството на електрична опрема и оние што се вклучени во зелената транзиција се клучни корисници. Банкарскиот сектор ќе се соочи со помала профитабилност во 2024 година поради падот на нето-каматната маржа како резултат на повисоките пасивни каматни стапки и побавното кредитирање“, велат аналитичарите.
Без да навлегуваат во специфични детали за компаниите, нашите аналитичари се неутрални во однос на очекувањата за акциите на технолошките и енергетските компании со оглед на нивните високи вреднувања, додека имаат послаби очекувања за другите постабилни сектори (прехранбена индустрија, фармација, финансиски услуги...), бидејќи, според нив, би била потребна мешавина од изразена рецесија и поостри намалувања на стапките за да се зголеми атрактивноста на тие компании.
